បរទេស ៖ យោងទៅតាមប្រភពព័ត៌មានពី  The Conversation​ បានរាយការណ៍ថា ចិននឹងរឹតបន្តឹងលើការនាំចេញហ្គាលីយ៉ូម (gallium) និង ហ្គេម៉ាញ៉ូម (germanium) ដែលជាធាតុសំខាន់សម្រាប់ផលិតបន្ទះឈីប semiconductor ចាប់ពីខែសីហា ឆ្នាំ២០២៣ខាងមុខនេះតទៅ។

អ្នកនាំចេញធាតុសំខាន់ទាំងពីរនេះនឹងត្រូវការអាជ្ញាប័ណ្ណពិសេសដើម្បីអាចនាំចេញពីប្រទេសចិន ដោយសាររដ្ឋាភិបាលចិនគឺជាអ្នកគ្រប់គ្រងលើការផ្គត់ផ្គង់ធាតុទាំងពីរនេះធំជាងគេ។ ការរឹតបន្តឹងនេះនឹងបង្កគ្រោះថ្នាក់ដល់ក្រុមហ៊ុនផលិតបច្ចេកវិទ្យាលោកខាងលិចជាច្រើនដែលប្រើធាតុទាំងនេះដើម្បីបង្កើតផលិតផលរបស់ពួកគេ។ លើសពីនេះ វាគឺជាការឆ្លើយតបទៅនឹងលោកខាងលិចដែលរឹតបន្តឹងលើការនាំចេញបន្ទះឈីប និងបច្ចេកវិទ្យាកម្រិតខ្ពស់ទៅកាន់ប្រទេសចិន ដែលអាចប៉ះពាល់ដល់វិស័យជាច្រើនដូចជា វិស័យការពារជាតិ និងសន្តិសុខចិន។

ស្របពេលនេះដែរ ហ្គាលលីញ៉ូមត្រូវបានប្រើជាសមាសធាតុនៅក្នុងឧបករណ៍អេឡិចត្រូនិក ដូចជា យានជំនិះអគ្គិសនី ឧបករណ៍ចាប់សញ្ញា ឧបករណ៍ទំនាក់ទំនងវិទ្យុកម្រិតខ្ពស់ LED និងឧបករណ៍ Blu-Ray ហើយការប្រើប្រាស់ឧបករណ៍ទាំងនេះកំពុងកើនឡើងយ៉ាងខ្លាំង។ សារធាតុរ៉ែហ្គាលីយ៉ូម និងហ្គេម៉ាញ៉ូម គឺស្ថិតនៅក្នុងបញ្ជីនៃធាតុសំខាន់ៗរបស់សហភាពអឺរ៉ុប និងសហរដ្ឋអាមេរិក ហើយចក្រភពអង់គ្លេសចាត់ទុកហ្គាលីយ៉ូមមានសារៈសំខាន់ចំពោះផលប្រយោជន៍ផលិតកម្មរបស់ខ្លួន។

មិនត្រឹមតែប៉ុណ្ណោះ វិធានការនាំចេញថ្មីរបស់ចិនគឺអាស្រ័យលើកត្តាមួយចំនួន រួមទាំងភាពតឹងតែងនៃការគ្រប់គ្រង និងការឆ្លើយតបរបស់រដ្ឋាភិបាល និងក្រុមហ៊ុនពីលោកខាងលិច។ លើសពីនេះ ការត្រួតពិនិត្យការនាំចេញថ្មីនេះអាចនឹងធ្វើឲ្យតម្លៃសារធាតុទាំងពីរថ្លៃជាងមុន និងការដឹកជញ្ជូនយូរជាងធម្មតា។ ប្រសិនតម្លៃកាន់តែថ្លៃ និងបង្ភភាពលំបាកដល់ក្រុមហ៊ុនលោកខាងលិចក្នុងការផលិតឧបករណ៍អេឡិចត្រូនិក នោះវាអាចធ្វើឱ្យតម្លៃផលិតផលកាន់តែថ្លៃសម្រាប់អ្នកប្រើប្រាស់ និងពិបាកប្រកួតប្រជែងជាមួយក្រុមហ៊ុនចិនផងដែរ។ ក្នុងអំឡុងពេលរាតត្បាតកូវីដ-១៩ ការខ្វះខាតឈីបជាសកលបានប៉ះពាល់យ៉ាងខ្លាំងដល់ការផលិតបច្ចេកវិទ្យា ដែលមានផលប៉ះពាល់យ៉ាងសំខាន់ទៅលើសេដ្ឋកិច្ចពិភពលោក។ ដូច្នោះហើយ ក្រុមហ៊ុនផលិតនៅភាគខាងលិចអាចបង្ខំផ្លាស់ប្តូរខ្សែសង្វាក់ផ្គត់ផ្គង់របស់ពួកគេឡើងវិញ ដែលនាំឲ្យការចំណាយថ្លៃ និង ភាពស្មុគស្មាញក្នុងការការបង្កើនផលិតកម្មពីប្រភពផ្សេងជំនួស។ បច្ចុប្បន្ននេះ សង្គ្រាមបច្ចេកវិទ្យារវាងប្រទេសចិន និងលោកខាងលិចកាន់តែមានភាពតានតឹង ខណៈដែលចិនគ្របដណ្តប់លើការផ្គត់ផ្គង់សម្ភារៈសំខាន់ៗជាច្រើនដែលត្រូវបានគេស្គាល់ថាជាលោហៈធាតុកម្រ ក៏ដូចជាសម្ភារៈផ្សេងទៀតដែលត្រូវការសម្រាប់ការផ្លាស់ប្តូរថាមពលស្អាត។

គួរឲ្យបញ្ជាក់ផងដែរថា ចិនគ្រប់គ្រងប្រហែល ៦០ ភាគរយនៃការផ្គត់ផ្គង់ធាតុហ្គេម៉ាញ៉ូមទាំងអស់របស់ពិភពលោក ដែលវាបង្កចេញពីធាតុសំខាន់​ពីរ​គឺ ​ស័ង្កសី និង​ ​ធ្យូងថ្ម។ កាលពីមុន អ្នកផលិតហ្គេម៉ាញ៉ូមសំខាន់ពីរគឺរុស្ស៊ី និងអ៊ុយក្រែន ប៉ុន្តែសង្រ្គាមបានប៉ះពាល់ដល់ការផ្គត់ផ្គង់ទៅលោកខាងលិច ដោយនៅចន្លោះឆ្នាំ២០១៧-២០២០ រុស្ស៊ីផ្គត់ផ្គង់ហ្គេម៉ាញ៉ូម ៩ ភាគរយនៃតម្រូវការសរុបរបស់សហរដ្ឋអាមេរិក។ ក្នុងពេលនេះដែរ រុស្ស៊ីអាចនឹងគ្រោងបង្កើនផលិតកម្មហ្គេម៉ាញ៉ូមសម្រាប់ទីផ្សារក្នុងស្រុករបស់ខ្លួន។ លើសពីនេះ ហ្គេម៉ាញ៉ូមក៏មានឥទ្ធិពលដល់ឧស្សាហកម្មថាមពលផងដែរ ដោយសារធ្យូងថ្មសំបូរទៅដោយធាតុត្រូវបានដុត។

មិនត្រឹមតែប៉ុណ្ណោះ ចិនមានចំណែកប្រហែល ៨០ ភាគរយនៃការផ្គត់ផ្គង់ហ្គាលលីញ៉ូមរបស់ពិភពលោក ដែលភាគច្រើនធាតុនេះបង្កមកពីការផលិតអាលុយមីញ៉ូម។ ជាធម្មតាហ្គាលីយ៉ូមមិនងាយប្រឈមនឹងបញ្ហាកង្វះខាតទេ ប៉ុន្តែឥឡូវនេះ ការផ្គត់ផ្គង់មានកម្រិតដោយសារកង្វះសមត្ថភាពផលិត។ ហ្គាលលីញ៉ូមត្រូវបានប្រើប្រាស់ក្នុងការកែច្នៃ wafers semiconductor ដែលជាចំណិតស្តើងនៃ semiconductor សម្រាប់ប្រើក្នុងសៀគ្វីអេឡិចត្រូនិក៕