សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមដំណាច់ឆមាសទី១ នៃឆ្នាំ២០២៣នេះ ព្រលានយន្តហោះអន្តរជាតិសៀមរាប-អង្គរ បានសម្រេចការងារប្រមាណ៩៨ភាគរយហើយ ដោយនៅសេសសល់គឺជាការងាររៀបចំសម្អាត និងត្រៀមខ្លួនសម្រាប់ទទួលយន្តហោះចុះចតនៅក្នុងព្រលានយន្តហោះអន្តរជាតិ។ ព្រលានយន្តហោះមួយនេះដែរ អាចទទួលយន្តហោះប្រភេទខ្នាតធំប៊ូអ៊ីងចុះចតបានដោយរំពឹងថានឹងទទួលបានអ្នកដំណើរបន្ថែមរាប់លាននាក់ទៀតនៅឆ្នាំ២០២៤។
ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរស៊ីវិល បានបង្ហាញថា បច្ចុប្បន្ននេះ ព្រលានយន្តហោះអន្តរជាតិសៀមរាប-អង្គរ កំពុងរៀបចំដើម្បីត្រៀមដាក់ដំណើរការនៅអំឡុខែតុលា ឆ្នាំ២០២៣ខាងមុខនេះ ដោយក្រុមហ៊ុនកំពុងទទួលយកបុគ្គលិកពីព្រលានយន្តហោះអន្តរជាតិសៀមរាបចាស់មកព្រលានយន្តហោះថ្មី មុននឹងព្រលានយន្តហោះចាស់ត្រូវបានបិទ។ បុគ្គលិកដែលបម្រើការនៅព្រលានយន្តហោះអន្តរជាតិសៀមរាបចាស់ ដែលមកបម្រើការនៅព្រលានថ្មីនឹងត្រូវរក្សាតួនាទីដូចមុនដដែល ឬអាចប្រសើរជាងមុន អាស្រ័យលើការវាយតម្លៃពីសមត្ថភាព ។
ឯកឧត្តមបន្ថែមថា ៖
“អាកាសយានដ្ឋានអន្តរជាតិសៀមរាបអង្គរនេះ នឹងមានសមត្ថភាពទទួលយន្តការហោះចុះចតធុនធំប្រភេទប៊ូអ៊ីង ដែលមានចំនួនរហូតដល់ជិត៤០ចំណត អាចទទួលបានអ្នកដំណើរបានពី៧លាននាក់ក្នុងឆ្នាំនេះ និង ១០,៥លាននាក់នៅក្នុងឆ្នាំ២០២៣ និង២០៤០ ខាងមុខ ក៏ដូចជាអាចទទួលជើងហោះហើរបានពី ៥ម៉ឺន ៨ពាន់ជើងក្នុងមួយឆ្នាំ (២០២៣) ទៅ ៨ម៉ឺន ៦ពាន់ជើងក្នុងមួយឆ្នាំចាប់ពីឆ្នាំ២០៣០ ទៅឆ្នាំ២០៤០។”
បើតាមរបាយការណ៍ពីក្រុមហ៊ុនអភិវឌ្ឍន៍ព្រលានយន្តហោះនេះបានឱ្យដឹងថា ទំហំនៃការវិនិយោគព្រលានយន្តហោះនេះ ដំបូងឡើយគ្រោងនឹងចំណាយត្រឹម ៨៨០លានដុល្លារអាមេរិក ប៉ុន្តែជាក់ស្ដែងព្រលានយនុ្តហោះនេះត្រូវដល់ទៅ ១ ១០០លានដុល្លារអាមេរិក ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានលើកឡើងថា តាមរយៈព្រលានយន្តហោះសៀមរាបអង្គរ និងផ្លូវជាច្រើនខ្សែនៅក្នុងខេត្តសៀមរាបដែលទើបសាងសង់រួចរាល់រួចនឹងអាចទាក់ទាញសក្ដានុពលវិនិយោគ និងទេសចរណ៍មកកាន់ទឹកដីខេត្តសៀមរាបក៏ដូចជាប្រទេសកម្ពុជាទាំងមូលបន្ថែមទៀត ។
សម្ដេចតេជោក៏បានបញ្ជាក់ថា សៀមរាបនឹងក្លាយជាប៉ូលសេដ្ឋកិច្ចពិសេសដ៏សំខាន់មួយសម្រាប់ប្រទេសកម្ពុជា ហើយនឹងជំរុញឱ្យខេត្តជាប់នឹងសៀមរាបទទួលបានសក្ដានុពលបន្ថែមទៀតដែរ ។
រាជរដ្ឋាភិបាលកម្ពុជាក៏បានចុះហត្ថលេខារួចរាល់លើគម្រោងសិក្សាផ្លូវល្បឿនលឿនភ្នំពេញ សៀមរាប ប៉ោយប៉ែត ដែលសង្ឃឹមថាផ្លូវនេះនឹងចាប់ផ្ដើមសាងសង់នៅពេលឆាប់ៗខាងមុខនេះផងដែរ ៕
Account
Security
Favourite Content