បរទេស ៖ នាថ្ងៃទី៣ ខែវិច្ឆិកា ឆ្នាំ២០២៦​ ខាងមុខនេះ ការបោះឆ្នោតពាក់កណ្តាលអាណត្តិសម្រាប់ពលរដ្ឋអាម៉េរិកនឹងប្រព្រឹត្តទៅខណៈដែលមានប្រធានបទក្តៅៗជាច្រើនបានកើតមានឡើងក្រោមការដឹកនាំដោយប្រធានាធិបតី​ លោក Donald Trump ។

ចូលកាន់តំណែងជាលើកទី ២ ភ្លាម លោក Trump បានបង្កភាពភ្ញាក់ផ្អើលជាច្រើន គិតចាប់ពីការដំឡើងពន្ធគយបដិការលើបណ្តាប្រទេសនានាស្ទើរមួយពិភពលោក, ការកាត់បន្ថយថវិកាជំនួយទៅឲ្យអង្គការសហប្រជាជាតិ, ការបង្កើតក្រុមប្រឹក្សាអង្គការសន្តិភាព BoP ,​ ការប្តូរក្រសួងការពារជាតិទៅជាក្រសួងសង្គ្រាម, ការទម្លាក់មេដឹកនាំរបបវេណេស៊ុយអេឡា និងចុងក្រោយ គឺបង្កសង្គ្រាមជាមួយនឹងអ៊ីរ៉ង ដែលកំពុងបង្កើតបានជារលកវិបត្តិថាមពលយ៉ាង់ធ្ងន់ធ្ងរសម្រាប់ពិភពលោកទាំងមូល។

តាមរយៈការស្ទាបស្ទង់មតិបណ្តោះអាសន្នមួយដែលទទួលបានលទ្ធផលកាលពីថ្ងៃចុងសប្ដាហ៍កន្លងទៅនេះ និងត្រូវបានបង្ហាញដោយ Emerson College បានបង្ហាញឱ្យឃើញពីការខកចិត្តរបស់ពលរដ្ឋអាម៉េរិកចំពោះការដឹកនាំដោយប្រធានាធិបតីអាម៉េរិក លោក Donald Trump នាពេលកន្លងមកនេះ ជាពិសេស​ ការបញ្ឆេះភ្លើងសង្គ្រាមនៅមជ្ឈិមបូព៍ាដែលកំពុងអូសបន្លាយរហូតមកដល់ពេលបច្ចុប្បន្ន។

ជាមួយនឹងការស្ទាបស្ទង់មតិខាងលើនេះគេសង្កេតឃើញថា ស្ទើរតែពាក់កណ្តាលបានបោះឆ្នោតផ្តល់ពិន្ទុកម្រិតអន់បំផុតចំពោះកិច្ចការងារគោលនយោបាយរបស់លោក Trump ខណៈដែលមានតែប្រមាណ ២៤ភាគរយប៉ុណ្ណោះដែលគាំទ្រខ្លាំងទៅលើទង្វើរបស់ Trump ហើយមានប្រមាណជា​ ៥៣ភាគរយបានលើកឡើងថា​ រដ្ឋបាលរបស់លោក Trump មិនបានគិតគូរអំពីគោលនយោបាយអាម៉េរិកជាមុននោះទេ (America First) ។ យ៉ាងណាក្តី សម្រាប់ការបោះឆ្នោតពាក់កណ្តាលអាណត្តិនាពេលខាងមុខនេះ គឺមិនមែនជាការបោះឆ្នោតសំដៅទៅលើបុគ្គលលោក Trump ផ្ទាល់នោះទេ ប៉ុន្តែគឺសំដោទៅលើសមាជិកភាពនៅរដ្ឋសភា និងព្រឹទ្ធសភារបស់អាម៉េរិក។​ យ៉ាងណាក៏ដោយ ប្រសិនបើបក្សសាធារណៈរបស់លោក Trump ចាញ់ឆ្នោត ឬធ្លាក់ចុះសំឡេងគាទ្រ វានឹងធ្វើឲ្យមានផលប៉ះពាល់យ៉ាងខ្លាំងទៅដល់ឥទ្ធិពល និងប្រសិទ្ធភាពនៃការដឹកនាំរបស់លោក Trump ដែលនៅសេសសល់ក្នុងរយៈពេល២ឆ្នាំខាងមុខទៀតយ៉ាងប្រាកដ។

ក្នុងករណីដែលបក្សសាធារណៈដែលមានលោក​ Trump ជាប្រមុខ​ចាញ់ឆ្នោតនាពាក់កណ្តាលអាណត្តិខាងមុខនេះ រាល់ការរៀបចំសេចក្ដិព្រាងច្បាប់ច្បាប់ ក៏ដូចជាការសម្រេចលើផែនការថវិកានានាក្រោមរដ្ឋបាលប្រធានាធិបតី Trump នឹងត្រូវជួបឧបសគ្គ ដោយសារតែសំឡេងគាំទ្រនៃសន្លឹកឆ្នោតទាំងនៅក្នុងសភា ក៏ដូចជាព្រឹទ្ធសភា​ មានចំនួនកៅអីតិចជាងបក្សម្ខាងទៀត។​ កាន់តែគ្រោះថ្នាក់ជាងនេះទៅទៀត បក្សដែលឈ្នះឆ្នោតនៅពាក់កណ្តាលអាណត្តិនឹងទទួលបានសិទ្ធិគ្រប់គ្រាន់ក្នុងការរៀបចំឲ្យគណកម្មការណាមួយក្នុងសភា​ បើកការស៊ើបអង្កេតទៅលើករណីណាមួយដែលសង្ស័យថាមានដំណើរការមិនប្រក្រតីនៅក្នុងរដ្ឋបាលរបស់លោក Trump បូករួមទាំងក្រុមមន្ត្រីជួរគណៈរដ្ឋមន្ត្រី សូម្បីតែលោកប្រធានាធិបតិ Donald Trump ផ្ទាល់តែម្តងផងដែរ។ រូបភាពបែបអវិជ្ជមានទាំងនេះអាចធ្វើឲ្យខូចខាតដល់ប្រសិទ្ធភាព និងកេរ្ត៍ឈ្មោះរបស់គណបក្សសាធារណៈ ឬអាចធ្វើឲ្យមានបញ្ហាដល់ការបោះឆ្នោតសកលរបសបក្សនៅពេលផុតអាណត្តិខាងមុខ។

ដូច្នេះមានន័យថា ប្រសិនបើរដ្ឋបាលលោក Trump ចាញ់ឆ្នោតនៅពាក់កណ្តាលអាណត្តិខាងមុខនេះ ក្រៅពីបាត់បង់ទំនុកចិត្តពីសំណាក់មហាជន ថែមទាំងកើតមានឧបសគ្គជាច្រើនក្នុងការដឹកនាំ ក៏ដូចជាការសម្រេចចិត្តទៅលើផែនការណាមួយ ជាពិសេស អាចកើតមានការស៊ើបអង្កេតទៅលើបុគ្គល ដែលកាន់តែប៉ះពាល់ដល់កេរ្តិ៍ក្នុងភាពជាអ្នកដឹកនាំប្រទេសមហាអំណាចកំពូលនៅលើពិភពលោក៕