សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្រហុកខ្ទិះ ជាឈ្មោះមុខម្ហូបមួយប្រភេទដែលគេនិយមទទួលទាន ជាពិសេសផ្ទាប់ជាមួយនឹងបន្លែដែលជាអន្លក់គឺកាន់តែឆ្ងាញ់ពិសា ខណៈដែលភាគច្រើនត្រូវបានគេលើកឡើងថាជាអាហារប្រចាំតំបន់របស់អ្នកខេត្តបាត់ដំបង។
ម្លិះវិសាល ជាយីហោអាជីវកម្មប្រហុកខ្ទិះមួយកន្លែង ដែលមានទីតាំងស្ថិតនៅភូមិសាលាបាឡាត់ សង្កាត់អូម៉ាល ក្រុងបាត់ដំបង ខេត្តបាត់ដំបង កំពុងមមាញឹកក្នុងផលិត និងផ្គត់ផ្គង់ក្នុងរូបភាពប្រហុកខ្ទិះបែបថ្មី មានអនាម័យ រសជាតិឆ្ងាញ់ប្លែក ជាពិសេសមិនមានក្លិនឆួលប្រហុកខ្លាំងដែលអាចទទួលទានជាមួយបាយក៏បាន ទទួលទានជាមួយនំប៉័ងក៏បាន ខណៈអាជីវកម្មលក្ខណៈគ្រួសារមួយនេះក៏កំពុងត្រៀមពង្រីកការផលិតរបស់ខ្លួនឱ្យកាន់តែច្រើននៅឆ្នាំ២០២៤ខាងមុខនេះ។
លោក ឡាយ សុវិសារ ជាស្ថាបនិករបស់អាជីវកម្មប្រហុកខ្ទិះអនាម័យខាងលើ បានមានប្រសាសន៍ឱ្យដឹងថា៖
«យើងបង្កើតអាជីវកម្មនេះឡើងដោយសារយើងចង់ឱ្យមានការចេះសន្សំសំចៃពេលសម្រាប់អ្នកដែលរវល់ការងារខ្លាំង ដែលពួកគាត់បានញ៉ាំនូវប្រហុកខ្ទិះមានរសជាតិឆ្ងាញ់ ចំណាយពេលតិច មានរសជាតិដូចស្នាដៃអ្នកផ្ទះ ហើយនៅឆ្នាំ២០២៤ខាងមុខនេះ យើងនឹងត្រៀមការផលិតដោយផ្ដោតលើផលិតផលចំនួន ៣មុខគឺប្រហុកខ្ទិះ កន្ទុយហេះ និងសណ្ដែកដីបំពងគ្រឿង»។
លោកបន្តថា បន្ទាប់ពីការចុះបញ្ជី និងស្វែងរកប្រភពផ្គត់ផ្គង់វត្ថុធាតុដើមក្នុងស្រុកបានគ្រប់គ្រាន់ហើយ លោកមានគម្រោងពង្រីកការផលិតឱ្យបានមួយតោន ឬស្មើនឹង ៨០០កែវក្នុងមួយថ្ងៃ។ ចំពោះតម្លៃរបស់ប្រហុកខ្ទិះនេះវិញ ត្រូវបានគេលក់ក្នុងតម្លៃ ១៤ ០០០រៀលក្នុងមួយកែវដែលមានចំណុះ ២៥០ក្រាម ដែលបងប្អូនអាចទិញទៅភ្លាម និងអាចទទួលទានបានភ្លាមតែម្ដង ហើយអតិថិជនរបស់ប្រហុកខ្ទិះនេះភាគច្រើនជាអ្នករស់នៅខេត្តបាត់ដំបងផ្ទាល់ និងអ្នកកម្ម៉ង់ទិញនៅរាជធានីភ្នំពេញផងដែរ។
សម្រាប់ចំណុចពិសេសរបស់ប្រហុកខ្ទិះនេះ គឺបងប្អូនអាចញ៉ាំជាមួយនំប៉័ងក៏បាន ដោយសារផលិតផលប្រហុកខ្ទិះនេះមិនសូវធុំក្លិនប្រហុកខ្លាំងនោះទេ ពោលគឺអ្នកទទួលទានអាចញ៉ាំពេញមាត់ ថែមទាំងមានក្លិនឈ្ងុយ ហើយបើទទួលទានជាមួយនឹងបន្លែស្រស់ៗ ស្រួយៗ គឺកាន់តែឆ្ងាញ់។ បន្ថែមលើនេះ ប្រហុកខ្ទិះម្លិះវិសាលក៏អាចរក្សាទុកបានយូរ ដែលអាចទុកនៅក្រៅបានរយៈពេលមួយសប្ដាហ៍ និងទុកក្នុងទូរទឹកកកបានដល់ទៅរាប់ខែ។ នេះអ្វីដែលម្ចាស់អាជីវកម្មខាងលើបានបញ្ជាក់ប្រាប់។
ពាក់ព័ន្ធនឹងការផលិតវិញ ត្រូវបានស្ថាបនិកខាងលើរៀបរាប់បន្ថែមទៀតថា ការផលិតគឺមានដំណាក់កាលខុសគ្នា ដូចជា ការត្រៀមវត្ថុធាតុដើមរួមមានដូចជា ប្រហុក សាច់ជ្រូក៣ជាន់ ម្ទេសក្រៀម ស្លឹកក្រូចសើច ខ្ទិះដូង គល់ស្លឹកគ្រៃ ល្មៀត រំដេង ខ្ទឹមស ស្ករ ប្រេងឆា បន្ទាប់មកត្រូវរៀបចំជ្រើសយកតែវត្ថុធាតុដើមណាដែលមានគុណភាពល្អយកទៅលាងសម្អាត ចិញ្ច្រាំសាច់ ចិញ្ច្រាំប្រហុក ពូតខ្ទិះដូង ទើបចាប់ផ្ដើមចម្អិនដោយលីងគ្រឿងទាំងអស់ចូលគ្នារហូតដល់ស្ងួតទឹកល្អ ទើបអាចធ្វើការវេចខ្ចប់ឱ្យបានត្រឹមត្រូវល្អ។
គួរបញ្ជាក់ដែរថា សម្រាប់ការចាប់ផ្ដើមដំបូង គឺតាំងពីមុនការរីករាលដាលនៃជំងឺកូវីដ១៩ ដែលលោកបានចំណាយដើមទុនប្រមាណ ៥០០ ដុល្លារក្នុងការទិញឧបករណ៍ប្រើប្រាស់ លុះពេលផលិតត្រូវចំណាយលើវត្ថុធាតុដើម និងសម្ភារសម្រាប់វេចខ្ចប់ផងដែរ។ សម្រាប់ផលិតផលរបស់ ម្លិះវិសាល ក្រៅពីប្រហុកខ្ទិះ ក៏មានផលិតនូវអាហារចម្អិនស្រាប់ផ្សេងទៀត ដូចជា សណ្ដែកដីបំពងគ្រឿង ត្រីបណ្ដូលអំពៅបំពងគ្រឿង និងម្ទេសគ្រឿងផងដែរ៕
Account
Security
Favourite Content