បរទេស ៖ យោងទៅតាមប្រភពព័ត៌មានពី Weforum បានរាយការណ៍ថា សត្វដំរី​ដើរតួនាទីយ៉ាងសំខាន់នៅក្នុងប្រព័ន្ធអេកូឡូស៊ី សេដ្ឋកិច្ច និង ជួយប្រឆាំងនឹងបម្រែបម្រួលអាកាសធាតុទូទាំងពិភពលោក ប៉ុន្តែការប្រម៉ាញ់ភ្លុកដំរីនៅទ្វីបអាហ្វ្រិកបានធ្វើឲ្យពូជដំរីព្រៃអាហ្វ្រិក និងដំរីសាវ៉ាណាអាហ្រ្វិកប្រឈមជិតផុតពូជ។

អង្គការអន្តរជាតិសម្រាប់ការអភិរក្សធម្មជាតិ (IUCN) បានលើកឡើងថា ចំនួននៃប្រភេទពូជដំរីទាំងពីរបានធ្លាក់ចុះមកសល់ត្រឹម ៤១៥ ០០០ ក្បាលតែប៉ុណ្ណោះ ជាពិសេសដំរីព្រៃអាហ្វ្រិកបានថយចុះខ្លាំងគួរឱ្យព្រួយបារម្ភ។ ដូចនេះហើយ មនុស្សគួរតែបញ្ឈប់ការបរបាញ់ជាបន្ទាន់ និង ធានាថាមានជម្រកសមរម្យគ្រប់គ្រាន់សម្រាប់ពូជដំរីទាំងពីរនេះ។

តាមរយៈការសហការរវាងក្រុមហ៊ុនបច្ចេកវិទ្យាហូឡង់ Hack the Planet និងក្រុមអ្នកវិទ្យាសាស្ត្រអង់គ្លេសនៅសាកលវិទ្យាល័យ Stirling បានរួមគ្នាបង្កើតកាមេរ៉ាថ្មីមួយដែលអាចជួយការពារដំរី និងសត្វព្រៃផ្សេងទៀត។ ឧបករណ៍ដែលដំណើរការដោយ AI ភ្ជាប់ដោយផ្ទាល់ទៅផ្កាយរណប និងបញ្ជូនព័ត៌មានតាមពេលវេលាជាក់ស្តែងទៅកាន់មន្ត្រីអនុរក្សព្រៃឈើ ឬអ្នកភូមិក្នុងតំបន់។ ជាធម្មតា ឧបករណ៍ត្រួតពិនិត្យបែបនេះជារឿយៗពិបាកដំណើរការនៅក្នុងទីតាំងដាច់ស្រយាល ដោយសារមានអ៊ីនធឺណិតមិនល្អ ឬពិបាកចាប់សំឡេង។

អ្នកស្រាវជ្រាវនៅសាកលវិទ្យាល័យ Stirling លោក Robin Whytock បានលើកឡើងថា ទិន្នន័យពេលវេលាពិតពីកាមេរ៉ាឆ្លាតវៃ និងឧបករណ៍ចាប់សញ្ញាផ្សេងទៀតអាចជួយពួកគាត់ក្នុងការត្រួតពិនិត្យ និងការពារប្រព័ន្ធអេកូឡូស៊ីដែលរងការគំរាមកំហែងបំផុតរបស់ពិភពលោក។ ទិន្នន័យពេលវេលាអាចត្រូវបានគេប្រើប្រាស់ដើម្បីធ្វើការសម្រេចចិត្តបានប្រសើរជាងមុនក្នុងអំឡុងពេលស្ថានភាពដ៏សំខាន់ណាមួយ។ ក្នុងអំឡុងពេលហោះហើរនៅ Gabon ប្រព័ន្ធកាមេរ៉ាបានថតរូបជាង ៨០០ ក្នុងរយៈពេល ៧២ ថ្ងៃ ហើយរូបថតដំរីចំនួន ២១៧ សន្លឹកត្រូវបានថត។ គំរូ AI សម្រេចបាននូវភាពត្រឹមត្រូវ ៨២ ភាគរយក្នុងការទទួលស្គាល់សត្វដំរី។ មិនត្រឹមតែប៉ុណ្ណោះ បច្ចេកវិទ្យា​នេះ​អាច​រក​ឃើញ​ប្រភេទ​សត្វ​ផ្សេង​ទៀត​ក៏​ដូច​ជា​មនុស្ស​ដែរ។ ដូច្នេះ វាអាចតាមដានសកម្មភាពរវាងមនុស្ស និងសត្វព្រៃ និងសកម្មភាពខុសច្បាប់នៅក្នុងតំបន់ការពារទាំងនោះ ព្រមទាំងអាចរារាំងដំរីមិនឱ្យចូលភូមិបានទៀតផង។ កញ្ចប់កម្មវិធី AI នេះមានឈ្មោះថា PAWS (ជំនួយការពារសម្រាប់សុវត្ថិភាពសត្វព្រៃ) កំពុងត្រូវបានប្រើប្រាស់នៅក្នុងតំបន់ការពារនៅក្នុងប្រទេសជាង ៦០ ជុំវិញពិភពលោក។  

យោងទៅតាមប្រភពដដែលបានបញ្ជាក់ថា ប្រទេស Gabon គឺជាជម្រករបស់សត្វដំរីព្រៃអាហ្រ្វិកដែលមានដំរីចំនួនប្រហែល ៩៥ ០០០ ក្បាល ហើយតំបន់នេះត្រូវបានគេចាត់ទុកថាជាជម្រកដ៏សំខាន់នៃប្រភេទពូជសត្វជាច្រើន និងជាជម្រករបស់សត្វដំរីច្រើនជាងប្រទេសដទៃទៀត។ តំបន់នេះត្រូវបានគេប៉ាន់ប្រមាណថា មានព្រៃឈើគ្របដណ្តប់រហូតដល់ ៨៥ ភាគរយនៃផ្ទៃដីសរុបរបស់ប្រទេសហ្គាបុង។ មិនត្រឹមតែប៉ុណ្ណោះ សត្វដំរីជួយជំរុញឲ្យព្រៃឈើកាន់តែរឹងមាំល្អ និងផ្តល់អត្ថប្រយោជន៍សម្រាប់អាកាសធាតុ ក៏ដូចជាជីវចម្រុះផងដែរ។​ យោងទៅតាមការសិក្សាមួយនៅឆ្នាំ២០១៩ បានរកឃើញថា ដំរីព្រៃមានសមត្ថភាពក្នុងការផ្ទុកកាបូនបានច្រើន។ ដូចនេះហើយ នៅពេលដែលពួកវារស់នៅតាមព្រៃឈើមាន​ដើមឈើ​ធំៗ គឺវាអាច​ផ្ទុក​កាបូន​បានកាន់តែ​ច្រើន៕