សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងផ្លូវក្រវាត់ក្រុងទី៣ ដែលតភ្ជាប់ពីផ្លូវជាតិលេខ១ ដល់ផ្លូវជាតិលេខ៦ គ្រោងនឹងបញ្ចប់នៅក្រោយចូលឆ្នាំខ្មែរខាងមុខនេះ ពោលគឺអំឡុងខែឧសភា ឆ្នាំ២០២៣ ប៉ុន្តែបើក្រឡេកទៅមើលការអភិវឌ្ឍនៅតាមបណ្ដោយផ្លូវមួយនេះកំពុងមានការទាក់ទាញអ្នកអភិវឌ្ឍន៍កាន់តែខ្លាំង ជាពិសេសនៅតំបន់ប៉ែកខាងត្បូងរាជធានីភ្នំពេញ។
ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍លើកឡើងកាលពីពេលថ្មីៗនេះថា ផ្លូវក្រវាត់ក្រុងទី៣ ជាផ្លូវដ៏មានសារសំខាន់ក្នុងការបញ្ចៀសចរាចរណ៍នៅក្នុងក្រុងភ្នំពេញ ជាពិសេសអ្នកធ្វើដំណើរពីខេត្តមួយទៅខេត្តមួយដោយមិនចាំបាច់ឆ្លងកាត់ក្រុងភ្នំពេញ។ គម្រោងផ្លូវនេះត្រូវបានពន្យារពេលបញ្ចប់ការដ្ឋានជិតមួយឆ្នាំ ដោយសារតែក្រុមហ៊ុនសាងសង់បានស្នើសុំដោះស្រាយបញ្ហានានា ប៉ុន្តែក្រុមហ៊ុនក៏បានសន្យាថានឹងបញ្ចប់នៅអំឡុងខែឧសភា ឆ្នាំ២០២៣នេះ។
ឯកឧត្តមបន្តថា ៖
“ដើម្បីបញ្ចៀសការកកស្ទះចរាចរណ៍នៅក្នុងភ្នំពេញ រាជរដ្ឋាភិបាលគ្រោងនឹងសាងសង់ផ្លូវក្រវាត់ក្រុងជាបន្តបន្ទាប់ជាក់ស្ដែងពេលនេះ យើងកំពុងសាងសង់ផ្លូវក្រវាត់ក្រុងទី៣ ហើយក៏គ្រោងនឹងសាងសង់ផ្លូវក្រវាត់ទីក្រុងទី៤ បន្តទៀត។ សម្រាប់ការសាងសង់ក្រវាត់ក្រុងនេះដែរ ក៏បានផ្ដល់នូវឱកាសវិនិយោគថ្មីៗនៅតាមបណ្ដោយផ្លូវនោះផងដែរ ហើយសម្រាប់គម្រោងក្រវាត់ក្រុងទី៣នេះដែរក៏បានឃើញថាមានការទាក់ទាញការវិនិយោគជាបន្តបន្ទាប់ដោយរំពឹងថានឹងទាក់ទាញកាន់តែខ្លាំងនៅពេលគម្រោងនេះសាងសង់រួចរាល់”
បើតាមអ្នកអភិវឌ្ឍន៍លំនៅឋានជាច្រើននៅក្បែរៗគម្រោងផ្លូវទី៣បានយកចំណុចនេះធ្វើជាការឃោសនាដើម្បីលក់គម្រោងរបស់ខ្លួនទៅកាន់អតិថិជន ជាក់ស្ដែងនៅក្បែរៗផ្លូវក្រវាត់ក្រុងទី៣នេះមានគម្រោងអភិវឌ្ឍន៍លំនៅឋានកាន់តែច្រើនចាប់ផ្ដើមលេចរូបរាងឡើងបន្តបន្ទាប់គ្នា។
អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានមានប្រសាសន៍ថា នៅតំបន់ខាងត្បូងរាជធានីភ្នំពេញគេឃើញមានការអភិវឌ្ឍលើលំនៅឋាន និងគម្រោងជាច្រើនទៀត ដោយសារតែតំបន់ខាងត្បូងភ្នំពេញមានគម្រោងហេដ្ឋារចនាសម្ព័ន្ធច្រើន និងថ្មីៗ ហើយក្នុងនោះក៏មានគម្រោងផ្លូវក្រវាត់ក្រុងទី៣នេះផងដែរ ។
ជាការកត់សម្គាល់ នៅតាមបណ្ដោយផ្លូវក្រវាត់ក្រុងនៅក្នុងរាជធានីភ្នំពេញ ក៏ឃើញថាមានការទាក់ទាញលើការអភិវឌ្ឍអចលនវត្ថុក៏មានសក្ដានុពលក្នុងនោះផ្លូវក្រវាត់ក្រុង២ ក៏កំពុងប្រែមុខមាត់ពីតំបន់ស្ងប់ស្ងាត់ទៅជាតំបន់ដែលមានការអភិវឌ្ឍលើលំនៅឋានតម្លៃខ្ពស់ និងតំបន់អាជីវកម្មដ៏មមាញឹកផងដែរ៕
Account
Security
Favourite Content