ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃទី៧ ខែមីនា នេះ បានស្នើទៅកាន់ក្រសួង ស្ថាប័ន និងភាគីពាក់ព័ន្ធឱ្យចូលរួមគាំទ្រអនុវត្តការងារបញ្រ្ជាបយេនឌ័រ និងភាពអង់អាចរបស់ស្ត្រីចំពោះកិច្ចការអាទិភាពមួយចំនួន។ ការស្នើរបស់សម្ដេចនេះ ធ្វើឡើងនាឱកាសពិធីអបអរសាទរទិវាសិទ្ធិនារីអន្តរជាតិលើកទី១១២។

ជាមួយគ្នានេះ ដើម្បីឈានទៅបង្កើនការយកចិត្តទុកដាក់លើស្ត្រី ក៏ដូចជាដើម្បីការរស់នៅដោយស្មើភាពគ្នា សម្ដេចតេជោ ហ៊ុន សែន បានលើកឡើងនូវកិច្ចការអាទិភាពចំនួន ៨ ដែលទាមទារឱ្យភាគីពាក់ព័ន្ធចូលរួមអនុវត្តទាំងអស់គ្នា។ កិច្ចការអាទិភាពទាំងនោះរួមមាន ៖

១. គ្រប់ក្រសួងស្ថាប័នបន្តយកចិត្តទុកដាក់ និងបញ្រ្ជាបយេនឌ័រទៅក្នុងក្របខ័ណ្ឌគោលនយោបាយកម្មវិធីជាតិ រួមទាំងកម្មវិធីកែទម្រង់នានា ក្របខ័ណ្ឌជាតិគាំពារសង្គម កម្មវិធីប្រែប្រួលអាកាសធាតុ និងការអភិវឌ្ឍបៃតង

២. បន្តលើកកម្ពស់ការចូលរួម និងពង្រឹងភាពជាអ្នកដឹកនាំរបស់ស្ត្រីក្នុងវិស័យសាធារណៈ នយោបាយ និងវិស័យឯកជន

៣. បង្កើនការវិនិយោគក្នុងការពង្រឹងសក្កានុពលរបស់ស្ត្រីក្នុងវិស័យសេដ្ឋកិច្ចឌីជីថល និងសេដ្ឋកិច្ចបៃតង តាមរយៈការអភិវឌ្ឍសហគ្រិនភាពរបស់ស្ត្រី ការលើកកម្ពស់សេដ្ឋកិច្ចគ្រួសាររបស់ស្ត្រី ការគាំទ្រដល់សេដ្ឋកិច្ចដែលគិតគូរពីស្ត្រីទៅក្នុងអំណាច សេដ្ឋកិច្ច និងក្នុងការសម្រេចចិត្តនានា

៤. បង្កើនការចូលរួមរបស់ស្ត្រី និងក្មេងស្រីក្នុងវិស័យឌីជីថល វិទ្យាសាស្ត្រ បច្ចេកវិទ្យា វិស្វកម្ម សិល្បៈ ច្នៃប្រឌិត និងគណិតវិទ្យា STEM លុបបំបាត់គម្លាតយេនឌ័រក្នុងវិស័យឌីជីថល និងការពង្រីកកម្មវិធីបណ្ដុះបណ្ដាលវិជ្ជាជីវៈដល់យុវជន និងស្ត្រី

៥. បន្តដាក់ចេញវិធានការ និងមធ្យោបាយសមស្របនានា ដើម្បីលើកកម្ពស់ការសិក្សារបស់សិស្សជានារីនៅកម្រិតឧត្តមសិក្សា និងក្រោយឧត្តមសិក្សា

៦. បន្តទប់ស្កាត់រាល់ទម្រង់នៃអំពើហិង្សាលើក្មេងស្រី និងស្ត្រី តាមរយៈការអនុវត្តផែនការសកម្មភាពជាតិទប់ស្កាត់អំពើហិង្សាលើស្ត្រី ពង្រីកវិសាលភាព និងគុណភាពនៃសេវាឆ្លើយតបជាពហុវិស័យជួយជនរងគ្រោះ ការផ្ដល់សេវាផ្នែកច្បាប់ដោយឥតគិតថ្លៃ និងពង្រឹងការអនុវត្តទាំងអស់

៧. បន្តលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ តាមរយៈការពង្រីកវិសាលភាពកម្មវិធីមាតាបិតាភាព និងការអប់រំកូនតាមបែបវិជ្ជមាន និងពង្រីកវប្បធម៌អហិង្សា ព្រមទាំងកសាងគ្រួសារ ប្រកដោយសុខដមរម្យនា ៨. បន្តអនុវត្តវិធានការគាំពាសង្គមប្រកបដោយបរិយាបន្ន តាមរយៈការពង្រីវិសាលភាពអនុវត្តក្រប ខ័ណ្ឌគាំពាសង្គមឱ្យដល់ក្រុមជនងាយរងគ្រោះ និងបាត់បង់ឱកាសផ្សេងៗក្នុងសង្គម ទាំងវិស័យ សេដ្ឋកិច្ច ក្នុងប្រព័ន្ធនិងក្រៅប្រព័ន្ធ និងគាំទ្រសុខមាលភាពមាតា និងទារកដើម្បីធានាបានការសម្រេចនូវការគ្របដណ្ដប់សុខភាពជាតិសកលសំដៅធានាពលរដ្ឋគ្រប់រូបទទួលបានដោយសមធម៌៕