បាត់ដំបង ៖ ស្របទៅនឹងការណែនាំរបស់ប្រមុខរាជរដ្ឋាភិបាលកម្ពុជាទៅលើការចេះយកបញ្ហាបិតព្រំដែនមកកែប្រែទៅជាឱកាសពង្រឹងសមត្ថភាព និងពង្រីកទីផ្សារក្នុងស្រុកឱកាន់តែទូលាយនោះ កសិដ្ឋានចិញ្ចឹមមាន់យកស៊ុតមួយកន្លែង ស្ថិតនៅក្នុងខេត្តបាត់ដំបង បាន និងកំពុងមានភាពមមាញឹកក្នុងការបង្កើនលទ្ធភាពផលិតឱ្យបានលើសពី ១ម៉ឺនគ្រាប់ក្នុង ១ថ្ងៃ ជាមួយនឹងការបំប៉នមេមាន់ជំទន់បន្ថែមប្រមាណ១ម៉ឺនក្បាលទៀត ដែលអាចទទួលបានផលនៅអំឡុងខែកញ្ញាខាងមុខនេះ ពោលគឺសរុបអាចទទួលបានជិត២ម៉ឺនគ្រាប់ក្នុង១ថ្ងៃ។

លោក មឿន ចាន់រិទ្ធ ជាម្ចាស់កសិដ្ឋានចិញ្ចឹមមាន់មួយកន្លែងស្ថិតនៅភូមិតាប៉ុន ឃុំតាប៉ុន ស្រុកសង្កែ ខេត្តបាត់ដំបង បានប្រាប់ឱ្យដឹងថា បច្ចុប្បន្ន ស៊ុតមាន់គឺមានតម្រូវការខ្ពស់ ខណៈដែលតម្លៃលក់ចេញក៏ទទួលបានកាន់តែប្រសើរជាងមុន ជាពិសេស ក្រោមស្មារតីជាតិនិយមរបស់បងប្អូនប្រជាជនខ្មែរ ងាកមកគាំទ្រផលិតផលក្នុងស្រុកកាន់តែច្រើនក្រោយការបិតច្រកព្រំដែនកម្ពុជា-ថៃ។

ម្ចាស់កសិដ្ឋានរូបនេះបន្តថា៖

«បច្ចុប្បន្នកសិដ្ឋានយើងអាចផលិតស៊ុតបានប្រមាណ ៩០០០គ្រាប់ប្រចាំថ្ងៃ ដើម្បីលក់ទៅកាន់ខាងសៀមរាបដែលមានទាំងសណ្ឋាគារ និងផ្សារទំនើប ក្នុងតម្លៃជិត ៥០០រៀលក្នុងមួយគ្រាប់ ដោយតម្លៃនេះល្អគួរសម ដោយសារខ្មែរយើងមានស្មារតីគាំទ្រផលិតផលក្នុងស្រុកច្រើនជាងមុន ឯការផ្គត់ផ្គង់នៅតាមម៉ាតក៏មានកំណើនខ្ពស់ ដែលយើងផ្គត់ផ្គង់ស្ទើរមិនគ្រប់»។

ចំពោះទំហំកសិដ្ឋានចិញ្ចឹមមាន់យកស៊ុតខាងលើនេះមានរហូតដល់ចំនួន ១២០០០ម៉ែត្រការេ ប៉ុន្តែបច្ចុប្បន្ននេះ ប្រើមិនទាន់បានពាក់កណ្ដាលនៃទំហំដីសរុបនៅឡើយ ខណៈដែលរូបលោកកំពុងចិញ្ចឹម និងបំប៉នមេម៉ាន់ជំទង់បន្ថែមទៀត។

លោកបញ្ជាក់ថា ៖

«យើងចិញ្ចឹមមាន់យកស៊ុតមាន ២ពូជ គឺពូជអ៊ីវ៉ាប្រោន និងពូជហត់ឡាញ ដែលត្រូវការរយៈពេលចិញ្ចឹម ១៨សប្ដាហ៍ទើបមាន់អាចឱ្យស៊ុតលើកដំបូងបានក្នុងបរិមាណតិចតួច ហើយវានឹងកើនឡើងបន្តិចម្ដងៗរហូតដល់អាយុ២ឆ្នាំទើបជម្រុះស៊ុតអស់ ហើយបន្តលក់ទៅឱ្យឈ្មួញលក់សាច់ក្នុងមួយក្បាល ៨០០០-៩០០០រៀល។ បើបូកចំណូលពីការលក់ស៊ុតប្រចាំថ្ងៃ និងការលក់មាន់សាច់ដែលជម្រុះអស់ស៊ុត យើងអាចទទួលបានច្រើន ប៉ុន្តែក៏ត្រូវចំណាយទៅលើថ្លៃចំណីដែរ ព្រោះយ៉ាងហោចណាស់ក្នុងមួយថ្ងៃអស់ប្រមាណជិត៤០០ដុល្លារឯណោះ»។

ដោយឡែកពាក់ព័ន្ធទៅនឹងបច្ចេកទេសក្នុងការមើលថែវិញ លោក មឿន ចាន់រឹទ្ធិ បានប្រាប់ឱ្យដឹងថា ត្រូវមានការយកចិត្តទុកដាក់ឱ្យបានដិតដល់ ព្រោះមាន់មានសុខភាពខ្សោយជាងសត្វចិញ្ចឹមដទៃទៀត ពោលគឺទាមទារឱ្យមានការតាមដានវារាល់ថ្ងៃ និងមានប្រើជាប្រភេទវីតាមីន ថ្នាំបំបាត់ស្ត្រេស ថ្នាំលាងថ្លើម និងថ្នាំជំនួយឱ្យមាន់ស៊ីចំណីច្រើនជាដើម។ ក្រៅពីនេះ ក៏មានការរៀបចំជាប្រព័ន្ធបាញ់ទឹកនៅលើដំបូលដើម្បីកាត់បន្ថយកំដៅនៅក្នុងរដូវក្ដៅ លុះដល់រដូវវស្សាគឺមិនចាំបាច់ប្រើនោះទេ ដោយសារតែសត្វមាន់អាចធន់នឹងអាកាសធាតុត្រជាក់បាន។

លើសពីនេះ អ្នកចិញ្ចឹមក៏ត្រូវតាមដានដោយផ្ដោតទៅលើលាមកជាប្រចាំ និងធ្វើការកត់សម្គាល់ ថាតើវាមានស្ថានភាពបែបណា រាគបែបណា ហើយគួរដាក់ថ្នាំអ្វីដើម្បីព្យាបាល។  ក្រៅពីនេះ មុខរបរចិញ្ចឹមមាន់យកស៊ុតនេះក៏មានជួបប្រទះនូវបញ្ហាច្រើនដែរ ដែលក្រៅពីចេះបច្ចេកទេសក្នុងការចិញ្ចឹម ការថែទាំ និងការព្យាបាលជំងឺសត្វ នៅមានបញ្ហាទីផ្សារមួយទៀត ព្រោះមានដៃគូប្រកួតប្រជែងច្រើន ដែលក្រៅប្រកួតជាមួយអ្នកចិញ្ចឹម និងផលិតក្នុងស្រុក ក៏មានការនាំចូលពីប្រទេសជិតខាងដែរ រហូតធ្វើឱ្យតម្លៃធ្លាក់ចុះនៅត្រឹមប្រមាណ៣០០រៀលក្នុងមួយគ្រាប់(ខ្នាតល្អ) ប៉ុន្តែពេលនេះ ទីផ្សារស៊ុតមាន់ក្នុងស្រុកកំពុងមានភាពល្អប្រសើរដែលជាកម្លាំងចិត្តសម្រាប់អ្នកចិញ្ចឹម ក៏ដូចជាម្ចាស់កសិដ្ឋានផងដែរ។

គួររំឭកថា លោក ចាន់រិទ្ធ ធ្លាប់មានជំនាញផ្នែកខាងដាំស្លរ ប៉ុន្តែនៅឆ្នាំ២០២៣ ដោយមើលឃើញពីតម្រូវការទីផ្សារស៊ុតមាន់មានភាពទូលំទូលាយ លោកបានសម្រេចចិត្តបង្កើតជាកសិដ្ឋានចិញ្ចឹមមាន់យកស៊ុតតែម្ដង។ នៅថ្ងៃអនាគត ប្រសិនបើទីផ្សារ ក៏ដូចជាតម្រូវការស៊ុតមាន់នៅតែល្អប្រសើរ លោកចង់ពង្រីកកសិដ្ឋានចិញ្ចឹមមាន់យកស៊ុតនេះឱ្យកាន់តែធំ ដែលអាចប្រកួតប្រជែងជាមួយកសិដ្ឋានក្រៅស្រុកបាន៕