ភ្នំពេញ ៖ កំណាត់​ផ្លូវក្រវាត់ក្រុង​ទី៣ ត្រង់ចំណុចគល់ស្ពានអាកាស​ជម្ពូវ័ន្ត ​បាន និងកំពុងក្លាយជា​ទីតាំងបង្កើតអាជីវកម្ម​ដល់​ពលរដ្ឋដើម្បីបង្កើនប្រាក់ចំណូលយ៉ាង​មានប្រជា​ប្រិយ​ ដោយទីតាំង​នេះ ហាក់​បីដូចជា​ផ្សាររាត្រីតូច​មួយ​សម្រាប់ពលរដ្ឋ​មក​សម្រាកកម្សាន្ត​នៅពេល​សាយ័ណ្ហ  ។

បើ​យើងធ្វើដំណើរ​ចេញពី​ស្ពានអាកាស​នៃផ្លូវក្រវាត់ក្រុងទី៣ ត្រង់ចំណុច​ផ្លូវជាតិលេខ​៤ ទៅផ្លូវជាតិលេខ​៣ យើងនឹងមើលឃើញ​មានអាជីវករ​ជាច្រើនដាក់លក់​ចំណីចំណុក​អាហារ​សម្រន់ និងភេសជ្ជៈ​សម្រាប់ទទួលស្វាគមន៍​បងប្អូនពលរដ្ឋមកពីទីជិត​ទីឆ្ងាយ​ មក​សម្រាក​លំហែអារម្មណ៍​នៅទីនោះ ដែលទីតាំងនេះ​ចាប់ផ្ដើម​មានពលរដ្ឋមក​លេង​ និង​បង្កើតមុខ​របរជាហូរហែ ក្រោយពេលផ្លូវក្រវាត់ក្រុង​ទី​៣ បានសាងសង់ ​និងដាក់ដំណើរការ​រួចរាល់ ។​

ពីមុន​តាមបណ្ដោយផ្លូវក្រវាត់ក្រុងទី​៣នេះ គឺមិនមានអាជីវកម្ម​ និងមិនមានផ្ទះនោះទេ ពោលគឺមានតែភាពស្ងប់ស្ងាត់ ប៉ុន្តែ​បន្ទាប់ពីផ្លូវនេះបានដាក់ដំណើរការ​មកក៏ឃើញថា មានពលរដ្ឋធ្វើដំណើរ​ឆ្លងកាត់ក៏ច្រើន ហើយទីតាំង​ខ្លះ​ត្រូវម្ចាស់​ដីចាក់បំពេញស្មើនឹ​ងផ្លូវ ទើបធ្វើឱ្យកាន់តែងាយស្រួលដល់អាជីវករបង្កើត​អាជីវកម្មលក់ដូរ​រក​ចំណូល​បានបន្ថែម​ ។

ក្រៅពី​ការ​បង្កើត​មុខ​របរ​ជូនពលរដ្ឋ​នៅតំបន់​ក្បែរ​ៗ​នោះហើយ​ ផ្លូវក្រវាត់ក្រុងទី៣ ក៏បានជួយជំរុញ​សក្ដានុពល​បន្ថែម​ដោយនៅតាមបណ្ដោយផ្លូវនេះចាប់ផ្ដើម​មានសំណង់​តូចធំ ឃ្លាំង​ស្តុកទំនិញ អាជីវកម្ម​ការ៉ាសសាំង​ និង​ផ្ទះរបស់ពលរដ្ឋ ដូច្នេះ​ នាពេលឆាប់ៗនេះ តំបន់​តាមបណ្ដោយផ្លូវក្រវាត់ក្រុងទី៣ នឹង​កាន់តែមានការអភិវឌ្ឍខ្លាំងឡើង​បន្ថែមទៀត ។

អ្វីដែល​ធ្វើឱ្យ​តំបន់​តាមបណ្ដោយផ្លូវ​មួយនេះកាន់តែមានសក្ដានុពល និងទាក់ទាញ​បន្ថែមទៀតនោះ គឺការ​បើកដំណើរការ​អាកាសយានដ្ឋានអន្តរជាតិ​តេជោ​ នៅស្រុក​កណ្ដាលស្ទឹង ខេត្តកណ្ដាល ដោយរំពឹងថា​ចរាចរណ៍​ឆ្លងកាត់​ផ្លូវក្រវាត់ក្រុងទី៣ នឹង​កាន់តែមមាញឹក ហើយការ​បង្កើតអាជីវកម្ម​ នៅតាមបណ្ដោយផ្លូវនេះក៏កាន់តែច្រើន​ឡើង​ ។

អ្នកជំនាញនៃវិស័យ​អចលនទ្រព្យបានមើលឃើញថា ​ទីតាំង​ផ្លូវ​ក្រវាត់ក្រុងទី​៣ នឹង​កាន់តែមានសក្ដានុពល​ និងមមាញឹកខ្លាំង ខណៈអាកា​សយានដ្ឋានអន្តរជាតិតេជោក៏ទើបតែបើកដំណើរការ​កាលពីប៉ុន្មានថ្ងៃមុននេះដែរ ។ តាមរយៈអាកាស​យានដ្ឋានអន្តរជាតិតេជោនេះដែរ នឹងធ្វើឱ្យចរាចរណ៍​លើ​ផ្លូវក្រវាត់ក្រុង​ទី ៣ ឬមហា​វិថីស៊ីជីនពីង​កាន់តែមានអ្នកឆ្លងកាត់​ច្រើន ដូច្នេះការ​បង្កើ​តរបរ​នៅតាមបណ្ដោយផ្លូវនេះក៏កាន់តែច្រើននៅពេលអនាគត ។

បើអ្នកជំនាញ​អចលនទ្រព្យ​ជាច្រើន​បានបង្ហាញពីទស្សនស្រដៀងគ្នាថា នៅពេលមានការអភិវឌ្ឍ​ហេដ្ឋារចនាសម្ព័ន្ធ​ថ្មីៗជាពិសេស​ផ្លូវ​ថ្នល់​ នឹង​ជួយឱ្យ​តំបន់នៅតាមបណ្ដោយផ្លូវ​ទាំង​នោះ កាន់តែមានភាពទាក់ទាញ ផ្ដល់អត្ថប្រយោជន៍ជាច្រើនទាំង​ការ​ដឹកជញ្ជូន ការធ្វើដំណើរ និងផ្ដល់​ប្រាក់ចំណូលបន្ថែម​ដល់​ពលរដ្ឋរស់​នៅតាម​ដង​ផ្លូវ​​ ដោយអាច​បង្កើតអាជីវកម្ម​ថ្មី ។ ក្រៅពីនេះ ការសាងសង់ផ្លូវ​ថ្មីៗនេះដែរ ក៏បានជួយជំរុញតម្លៃដីធ្លីនៅតាមបណ្ដោយផ្លូវ​បានមួយកម្រិត​ផងដែរ ៕