សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងអំឡុងពេលដំណើរទស្សនកិច្ចជាផ្លូវការនៅសាធារណរដ្ឋកូរ៉េរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រតិភូសភាពាណិជ្ជកម្ម ដឹកនាំដោយអ្នកឧកញ៉ា ឡាវ កាង អនុប្រធានសភាពាណិជ្ជកម្មកម្ពុជា បានទៅទស្សនកិច្ចតំបន់សេដ្ឋកិច្ចផាំងយូ តិចនូ វាឡី ។ ទស្សនកិច្ចនេះ មានគោលបំណងស្វែងយល់ពីប្រវត្តិសាស្ត្រក្នុងការបង្កើតតំបន់សេដ្ឋកិច្ច កត្តាជោគជ័យ ហេដ្ឋារចនាសម្ព័ន្ធ ដែលគាំទ្រដល់អាជីវកម្មដែលទើបតែបង្កើតថ្មី ព្រមទាំងគម្រោងគាំទ្រជាច្រើន ដើម្បីជួយឲ្យក្រុមហ៊ុនទាំងនោះអាចបង្កើតចំណូល និងនាំចេញផលិតផល និងសេវាកម្ម ទៅកាន់ទីផ្សារពិភពលោក។
ផាំងយូ តិចនូ វាឡី គឺជាតំបន់សេដ្ឋកិច្ចដែលនាំមុខក្នុងការគាំទ្រ និងជំរុញដល់ការសិក្សា និងស្រាវជ្រាវបច្ចេកវិទ្យាព័ត៌មាន បច្ចេកវិទ្យាជីវសាស្ត្រ បច្ចេកវិទ្យា cloud បច្ចេកវិទ្យា AI បច្ចេកវិទ្យាវិស័យយោធា បច្ចេកវិទ្យាណានូ និងហ្គេម ដែលស្ថិតនៅលើផ្ទៃដី ២១០ ហិកតា និងមានវត្តមានក្រុមហ៊ុមហ៊ុនធំៗ ដែលមានមជ្ឈមណ្ឌលស្រាវជ្រាវ និងអភិវឌ្ឍន៍ ដូចជា សាមសុង ហីយុនដាយ ជាដើម និងក្រុមហ៊ុនទើបបង្កើតថ្មីចំនួន ១៦២២ ក្រុមហ៊ុន។
ដោយឡែក ឯកឧត្តម ម៉េង និមល អគ្គនាយករងសភាពាណិជ្ជកម្មកម្ពុជា និងប្រតិភូសភាពាណិជ្ជកម្មកម្ពុជាបានបំពេញទស្សនកិច្ចរោងចក្រកែច្នៃជីវថាមពលចម្រាញ់ចេញពីសំបកគ្រាប់ស្វាយចន្ទីរបស់វិទ្យាស្ថានស្រាវជ្រាវថាមពលកូរ៉េនៅទីក្រុងសេអ៊ូល។
ទស្សនកិច្ចនេះ ធ្វើឡើងដើម្បីសិក្សាស្វែងយល់អំពីបច្ចេកវិទ្យាក្នុងការកែច្នៃគ្រាប់ស្វាយចន្ទីឲ្យអស់លទ្ធភាពទៅជាជីវថាមពលធ្យូង និងជីសរីរាង្គ ដែលនឹងជួយបង្កើតតម្លៃបន្ថែមដល់គ្រាប់ស្វាយចន្ទី។ គម្រោងចម្រាញ់ជីវថាមពលចេញពីសំបកគ្រាប់ស្វាយចន្ទីនៅកម្ពុជា ត្រូវបានផ្តួចផ្តើមឡើងដោយវិទ្យាស្ថានស្រាវជ្រាវថាមពលកូរ៉េ និងមានការគាំទ្រពីក្រសួងវិទ្យាសាស្ត្រ និងបច្ចេកវិទ្យា និងក្រសួងពាណិជ្ជកម្ម ឧស្សាហកម្ម និងថាមពលរបស់ប្រទេសកូរ៉េ៕
Account
Security
Favourite Content