សៀមរាប ៖ ខ្ជាយខ្មៅ ឬប្រទាលថ្លើមឆ្កែ ជាដំណាំឱសថមួយប្រភេទដែលបងប្អូននៅតំបន់ភ្នំគូលែនកំពុងដាំ និងកែច្នៃសម្ងួតទៅជាម្សៅខ្ជាយខ្មៅដែលមានប្រយោជន៍ច្រើនចំពោះសុខភាព មានគុណភាពខ្ពស់ និងមានទីផ្សារល្អ។

លោក សំបូរ វណ្ណា ជាកសិករដាំខ្ជាយខ្មៅ នៅស្រុកស្វាយលើ ខេត្តសៀមរាបបានមានប្រសាសន៍ប្រាប់ឱ្យដឹងថា លោកទើបតែបានចាប់ផ្ដើមដាំខ្ជាយប្រភេទនេះដោយយល់ថា វាមានអត្ថប្រយោជន៍ច្រើន ពិសេសអាចយកធ្វើជាឱសថដែលមានទីផ្សារល្អ លក់បានតម្លៃថ្លៃ ដោយខ្ជាយស្ងួតអាចលក់បានតម្លៃ ១៤០០០រៀលក្នុងមួយគីឡូក្រាម(លក់បោះដុំ) ឯការលក់រាយអាចលក់បាន ២ម៉ឺនរៀលក្នុងមួយគីឡូក្រាមផងដែរ។  

លោកបន្ថែមថា ៖

«នៅពេលចាប់ផ្ដើមដាំ ដោយសារតែវាជាដំណាំថ្មី យើងអត់ដឹងពីបច្ចេកទេសដាំ ឬការរៀបចំដីនោះទេ តែក៏ឃើញអ្នកក្នុងភូមិដាំជាបន្តបន្ទាប់ យើងក៏ចាប់ផ្ដើមដាំដែរ។ លុះទទួលបានការបណ្ដុះបណ្ដាលពីខាងអង្គការ Agrisud ដែលប្រាប់ពីបច្ចេកទេសដាំ និងការស្រាវជ្រាវតាមអ៊ីនធឺណេតបន្ថែមទៀតក៏ចាប់ផ្តើមអាចទទួលបានទិន្នផលកើនឡើងជាបន្តបន្ទាប់»។

ជាមួយគ្នានេះ លោកក៏បានរៀបរាប់ពីបច្ចេកទេសនៃការដាំដុះផងដែរថា ដំណាំខ្ជាយខ្មៅនេះជាដំណាំត្រូវការម្លប់​ ៥០ភាគរយ ដែលកសិករអាចដាំបាននៅតាមចន្លោះរងចំការស្វាយ ឬចំការដូងជាដើម ហើយដីដែលល្អសម្រាប់ដាំគឺប្រភេទដីក្រហម និងជាតំបន់ដែលខ្ពស់ពីនីវ៉ូទឹកសមុទ្រទើបខ្ជាយខ្មៅមានប្រសិទ្ធភាពខ្ពស់បាន ដូចជាតំបន់ភ្នំជាដើម។

សម្រាប់រយៈពេលនៃការដាំ ក្នុងមួយឆ្នាំគេអាចដាំបានតែម្ដងប៉ុណ្ណោះ ព្រោះគេត្រូវការរយៈពេលប្រមាណ ៨ខែទើបអាចប្រមូលផលបាន ដែលជាធម្មតាគេដាំនៅចន្លោះខែមេសាដល់ខែមិថុនា បើពុំដូច្នោះទេ ខ្ជាយខ្មៅមិនអាចឱ្យផលជាមើមល្អនោះទេ។ ចំណែកការរៀបចំដី គឺត្រូវលើករងសម្រាប់ដាំ និងមានប្រើប្រាស់ជីលាមកគោមកបន្ថែម ទើបអាចដាក់ដាំមើមខ្ជាយបានដោយទុកចម្ងាយប្រមាណ ១.៥ x ២តឹក ចន្លោះពីគុម្ពមួយទៅគុម្ពមួយទៀត។

ទាក់ទងនឹងការដាំទៀតសោត គេប្រើប្រាស់មើម ដោយយកខ្នែងតូចៗទៅកប់ដីដាំតែម្ដង ហើយមិនចាំបាច់ស្រោចទឹកនោះទេ លុះដល់ខែវស្សាធ្លាក់ភ្លៀងមកទើបមើមខ្ជាយចាប់ផ្ដើមដុះលូតលាស់ ហើយគេក៏អាចចាប់ផ្ដើមថែសម្អាតស្មៅ និងដាក់ជីបំប៉នឱ្យការលូតលាស់បានល្អ ហើយបន្ទាប់ពីដាំរួចហើយ គេអាចប្រមូលផលខ្ជាយខ្មៅបានល្អនៅក្នុងអំឡុងខែមករា ។

ពាក់ព័ន្ធនឹងបរិមាណទិន្នផលខ្ជាយ ក្នុងមួយម៉ែត្រការ៉េអាចប្រមូលផលបានប្រមាណ ១គីឡូក្រាម ឬត្រឹម កន្លះគីឡូក្រាមក្នុងករណីខ្ជាយដើមខ្លះរលួយខូចដោយសារបញ្ហាក្រា។ មួយវិញទៀត ដំណាំប្រភេទនេះក៏ចាញ់ក្លិនក្រអូបដូចជាទឹកអប់ ឬសាប៊ូជាដើម ហេតុនេះនៅពេលមើលថែដកស្មៅត្រូវមានការប្រុងប្រយ័ត្នចៀសវាងខូចគុណភាពខ្ជាយ។

ចុងក្រោយ លោក វណ្ណា ក៏មានមតិដែរថា​ សម្រាប់បងប្អូនដែលរស់នៅតំបន់ខ្ពស់ពីនីវ៉ូទឹកសមុទ្រអាចចាប់ផ្ដើមដាំប្រភេទដំណាំខ្ជាយខ្មៅនេះបាន ព្រោះមានអត្ថប្រយោជន៍ច្រើនចំពោះសុខភាព និងអាចលក់ទៅឱ្យក្រុមកែច្នៃបន្តក្នុងទីផ្សារល្អ៕