សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
នៅក្នុងឱកាសនៃការរៀបចំពិធីបុណ្យចូលឆ្នាំថ្មីប្រពៃណីជាតិខ្មែរដែលទើបតែកន្លងផុតទៅថ្មីៗនេះ ជាការកត់សម្គាល់ស្ទើរតែគ្រប់វត្តអារាម ស្ថាប័នរដ្ឋ ក្រុមហ៊ុនវិស័យឯកជន ក៏ដូចជាតាមលំនៅដ្ឋានក្នុងសហគមន៍នានា តែងមានការតុបតែងលម្អជាមួយនឹងមួកស្លឹកត្នោតយ៉ាងស្រស់ស្អាត ខណៈដែលអាជីវកម្មលក់សម្ភារៈតុបតែងលម្អបែបខ្មែរមួយកន្លែងនៅរាជធានីភ្នំពេញអាចលក់បានរហូតដល់ជាង ៣ម៉ឺនមួកឯណោះ។
លោក ឡេង លាភផេង ជាម្ចាស់អាជីវកម្មលក់មួកស្លឹកត្នោត និងសម្ភារៈសម្រាប់តុបតែងលម្អបែបខ្មែរ ក្រោមស្លាកយីហោ «មួកស្លឹកត្នោតខ្មែរ» មានទីតាំងស្ថិតនៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ខាងក្រោយបុរីអ័រគីដេ បានប្រាប់ AMS Economy ឱ្យដឹងថា៖
«សម្រាប់ឆ្នាំនេះ អាជីវកម្មមួកស្លឹកត្នោតរបស់យើងគឺមានកំណើនខ្លាំងមែនទែន ជាក់ស្ដែងមួកស្លឹកត្នោតយើងអាចលក់បានដល់ទៅជិត ៣ម៉ឺនមួក បើធៀបទៅនឹងឆ្នាំមុនការលក់របស់យើងកើនឡើង ៣-៤ដងឯណោះ»។
លោកបន្តថា៖
«មិនត្រឹមតែមួកស្លឹកត្នោតប៉ុណ្ណោះទេ គ្រឿងតុបតែងផ្សេងទៀតក៏មានកំណើនហក់ឡើងខ្ពស់ដែរ ព្រោះថាបងប្អូនយើងចាប់ផ្ដើមគាំទ្រនូវផលិតផលខ្មែរយើងច្រើន ទោះបីមិនបានដេគ័រច្រើន ឬធំដុំ ក៏មានការតាំងលម្អតិចតួចដែរមិនថានៅតាមលំនៅដ្ឋាន បុរី ឬក្រុមហ៊ុននានា។
ម្ចាស់អាជីវកម្មខាងថលើក៏រំពឹងទុកដែរថា នៅឆ្នាំក្រោយៗនឹងនៅតែមានការគាំទ្រផលិតផលក្នុងស្រុកបន្ថែមទៀត ដែលវាជាការថែរក្សាវប្បធម៌ខ្មែរផង និងជាផ្នែកមួយដែលជួយដល់ជីវភាពក្រុមអ្នកផលិតនៅតាមសហគមន៍ផងដែរ។
គួរបញ្ជាក់ដែរថា ក្រៅពីផលិតផលដែលបង្ហាញពីអត្តសញ្ញាណខ្មែរនៃមួកស្លឹកត្នោត អាជីវកម្ម «មួកស្លឹកត្នោតខ្មែរ» ក៏មានលក់សម្ភារៈតុបតែងលម្អបែបខ្មែរតាមរដូវកាលដូចជា កញ្ចើ ល្អី ឈ្នាង អង្រុត ក្អម ស្បូវ គោមផ្កាយ ទ្រូ សង្រែក បំពង់ទឹកត្នោត ស្លាកសួស្ដីឆ្នាំថ្មី និងប្រភេទខ្សែទង់ចំរុះពណ៌ ដែលផលិតផលទាំងនេះមានតម្លៃចាប់ពី ២៥០០-១០ម៉ឺនរៀលអាស្រ័យទៅតាមប្រភេទ និងទំហំផងដែរ៕
Account
Security
Favourite Content