បរទេស៖ យោងតាមប្រភពព័ត៌មានពី Yahoo!Finance បានរាយការណ៍ថា ក្រសួងពាណិជ្ជកម្មសហរដ្ឋអាម៉េរិកបានផ្តល់ជំនួយ ៦,១ ពាន់លានដុល្លារដល់ក្រុមហ៊ុនផលិតឈីបធំជាងគេរបស់អាម៉េរិក Micron Technology ដើម្បីគាំទ្រដល់ការសាងសង់ទីកន្លែងផលិតបន្ទះឈីបអង្គចងចាំនៅរដ្ឋ Clay, New York, និង Boise ។

ការវិនិយោគនេះស្ថិតក្នុងចំណោមការវិនិយោគដ៏ធំបំផុតក្រោមច្បាប់ CHIPS និងវិទ្យាសាស្រ្ត ហើយផែនការរយៈពេលវែងតម្លៃ ១២៥ ពាន់លានដុល្លាររបស់ Micron សមស្របទៅនឹងច្បាប់ក្នុងគោលបំណងបង្កើនផលិតកម្មគ្រឿងផ្គុំឈីប semiconductor នៅសហរដ្ឋអាម៉េរិក។ គម្រោងនេះមានគោលបំណងបង្កើនចំណែករបស់សហរដ្ឋអាម៉េរិកក្នុងការផលិតអង្គចងចាំកម្រិតខ្ពស់ពី ០ ភាគរយទៅ ១០ ភាគរយនៅត្រឹមឆ្នាំ២០៣៤។ នៅចុងបញ្ចប់នៃទសវត្សរ៍នេះ គំនិតផ្តួចផ្តើមនេះនឹងបង្កើតការងារយ៉ាងហោចណាស់ ២០ ០០០ កន្លែង ។ លើសពីនេះ នាយកដ្ឋានពាណិជ្ជកម្មបង្ហើបថា ការវិនិយោគដំបូងតម្លៃ ២៧៥ លានដុល្លារមានបំណងពង្រីករោងចក្ររបស់ Micron នៅ Manassas រដ្ឋ Virginia ។ ការពង្រីកនេះមានគោលបំណងនាំយកបច្ចេកវិទ្យាសំខាន់ៗមកប្រើប្រាស់នៅក្នុងវិស័យយោធា យានយន្ត និងសន្តិសុខជាតិ។

កិច្ចព្រមព្រៀងការងាររបស់ច្បាប់ CHIPS និងវិទ្យាសាស្រ្ត រួមទាំងកម្មវិធីកម្មសិក្សាផ្សេងៗត្រូវបានបង្កើតឡើងដើម្បីកាត់បន្ថយការពឹងផ្អែករបស់សហរដ្ឋអាម៉េរិកលើអ្នកលក់បរទេស និងដោះស្រាយភាពទន់ខ្សោយនៅក្នុងខ្សែសង្វាក់ផ្គត់ផ្គង់ semiconductor ។ បន្ថែមពីនេះ វាត្រូវបានប្រើប្រាស់ដើម្បីបញ្ចប់គម្រោងរបស់ Micron ដោយធានានូវប្រសិទ្ធភាពនៃការចំណាយ និងអត្ថប្រយោជន៍សេដ្ឋកិច្ចសម្រាប់តំបន់ក្បែរនោះ។  Micron បានបង្ហាញពីគោលបំណងបស់ខ្លួនក្នុងការកសាងគ្រឿងបរិក្ខារ ឬពង្រីកប្រតិបត្តិការក្រោមគំនិតផ្តួចផ្តើមទាំងនេះ ប៉ុន្តែមិនទាន់ប្រាប់ពីកាលវិភាគជាក់លាក់ពេលណាដែលប្រតិបត្តិការទាំងនេះនឹងដំណើរការនោះទេ។

ផែនការរបស់ Micron មានសារៈសំខាន់សម្រាប់អាម៉េរិក ដោយសារពួកគេគាំទ្រកិច្ចខិតខំប្រឹងប្រែងរបស់សហរដ្ឋអាម៉េរិកកាត់បន្ថយការពឹងផ្អែកពីបរទេស, បង្ហាញពីការចូលរួមរបស់វិស័យឯកជនក្នុងការបំពេញបំណងរបស់ប្រទេសក្រោមច្បាប់ CHIPS Act, និងបង្ហាញពីគោលដៅយុទ្ធសាស្ត្ររយៈពេលវែងនៃការធានាភាពជាអ្នកដឹកនាំរបស់សហរដ្ឋអាមេរិកនៅក្នុងវិស័យបច្ចេកវិទ្យាទំនើប។

គួរឲ្យបញ្ជាក់ដែរថា ច្បាប់ CHIPS ត្រូវបានចុះអនុម័តក្នុងឆ្នាំ២០២២ ដោយផ្តល់ទឹកប្រាក់ចំនួន ៥២ ពាន់លានដុល្លារ ដើម្បីបង្កើនផលិតកម្ម semiconductor ក្នុងស្រុកនៅសហរដ្ឋអាម៉េរិក។ គោលដៅនៃច្បាប់នេះរួមមាន៖

១. ការលើកទឹកចិត្តដល់ការផលិត semiconductor ក្នុងស្រុក ដើម្បីកាត់បន្ថយការពឹងផ្អែកលើអ្នកផ្គត់ផ្គង់បរទេស

២. ដោះស្រាយភាពងាយរងគ្រោះនៃខ្សែសង្វាក់ផ្គត់ផ្គង់ដែលរងប៉ះពាល់ពីការរាតត្បាត និងភាពតានតឹងភូមិសាស្ត្រនយោបាយ

៣. លើកកម្ពស់ការប្រកួតប្រជែងរបស់សហរដ្ឋអាមេរិកនៅក្នុងវិស័យបច្ចេកវិទ្យាសំខាន់ៗដូចជា បញ្ញាសិប្បនិមិត្ត AI កុំព្យូទ័រ និងទូរគមនាគមន៍៕