សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
(ពោធិ៍សាត់)៖ នាថ្ងៃទី ២២មេសានេះ យុទ្ធនាការអន្ទាក់សូន្យដំណាក់កាលទី២ បានធ្វើឡើងនៅក្នុងស្រុកវាលវែង ក្រោមប្រធានបទ “យើងរួមគ្នាបញ្ចប់វិបត្តិនៃការដាក់អន្ទាក់និងការជួញដូរសត្វព្រៃនៅកម្ពុជា” ។ យុទ្ធនាការនេះដែរបានប្រព្រឹត្តិទៅដោយរលូន និងមានការចូលរួមយ៉ាងកុះ ករពីភាគីពាក់ព័ន្ធ។
ដូចទៅនឹងយុទ្ធនាការមុនៗ យុទ្ធនាការលើកនេះ មានការដើរដង្ហែរស្លាកបដា ស្ដីអំពីការការពារសត្វព្រៃ និងធនធានធម្មជាតិផ្សេងៗទៀត។ ដែលការដើរដង្ហែរផ្សព្វផ្សាយនេះដែរ មាននូវការចូលរួមពី ស្ថាប័នរដ្ឋ វិស័យឯកជន សង្គមស៊ីវិល សិស្សនុសិស្ស្ស និងប្រជាពលរដ្ឋនៅក្នុងតំបន់ផងដែរ។
ជាលទ្ធផល យុទ្ឋនាការអន្ទាក់សូន្យដំណាក់កាលទី១ ក្នុងឆ្នាំ២០២១កន្លងទៅ ក្រសួងបរិស្ថាន និងអង្គការដៃគូរបានដកអន្ទាក់សរុបចំនួនជាង៦ ម៉ឺនអន្ទាក់។ ហើយបន្ទាប់ពីយុទ្ធនាការអន្ទាក់សូន្យដំណាក់កាលទី១ បានបញ្ចប់ក្នុងឆ្នាំ២០២២ ចំនួនអន្ទាក់ប្រមូលបានសរុបពីតំបន់ការពារធម្មជាតិមានការថយចុះមកជាង៣ម៉ឺនអន្ទាក់។
ថ្វីបើចំនួនអន្ទាក់មិនទាន់ចុះដល់សូន្យក៏ដោយ ប៉ុន្តែវាបានបង្ហាញនិន្នាការថយចុះគួរឲ្យកត់សម្គាល់ និងបង្ហាញថាយុទ្ឋនាការអន្ទាក់សូន្យដើរលើផ្លូវត្រូវ។ នេះបើតាមការគូសបញ្ជាក់របស់ឯកឧត្តម នេត្រ ភក្ក្រា រដ្ឋលេខាធិការ និងជាអ្នកនាំពាក្យនាំក្រសួងបរិស្ថាន។
ជាមួយគ្នានេះ លោក គង់ មុនីច័ន្ទ នាយកអង្គការមូលនិធិម៉ាដក្សចូលីភីត បានមានប្រសាសន៍ដែរថា៖
“ការសិក្សាថ្មីៗនេះ បានបញ្ជាក់ឱ្យដឹងថា នៅមានសត្វព្រៃជាច្រើនប្រភេទ កំពុងរស់នៅក្នុងតំបន់ព្រៃនានា នៃប្រទេសកម្ពុជាយើង ក្នុងនោះរួមមានទាំងប្រភេទសត្វព្រៃកម្រ និងជិតផុតពូជផងដែរ”
លោកបន្តថា ការបញ្ឈប់ឲ្យបានទាំងស្រុង នូវការបរបាញ់ដាក់អន្ទាក់ចាប់សត្វព្រៃ ការជួញដូរនិងបរិភោគសត្វព្រៃ គឺជាប្រការដ៏សំខាន់ និងបន្ទាន់ ដើម្បីអភិរក្សសត្វទាំងនោះ។ ហើយយុទ្ធនាការអន្ទាក់សូន្យ គឺជាឱកាសដ៏ប្រសើរ និងទាន់ពេលវេលា ក្នុងការជួយប្តូរទស្សនៈទាន ប្រជាពលរដ្ឋកម្ពុជាទាំងអស់ ឲ្យងាកមកចូលរួមសង្គ្រោះ និងអភិរក្សសត្វព្រៃ ដ៏កម្រនិងមានតម្លៃ នៃប្រទេសយើង។
គួរបញ្ជាក់ថា យុទ្ធនាការអន្ទាក់សូន្យដំណាក់ការទីពីរនេះ ត្រូវបានចាប់ផ្តើមជាផ្លូវការនៅថ្ងៃទី០៣ ខែមីនា ឆ្នាំ២០២៣ ដើម្បីបង្កើនការយល់ដឹងជាសាធារណៈនៅក្នុងតំបន់ភូមិភាគនីរតីនៃប្រទេសកម្ពុជា អំពីផលវិបាកនៃការដាក់អន្ទាក់ប៉ះពាល់ដល់សុខភាពសាធារណៈ និងការបាត់បង់ជីវៈចម្រុះ។
យ៉ាងណាមិញ យុទ្ធនាការអន្ទាក់សូន្យដំណាក់ការទី១ កន្លងទៅបានធ្វើឡើងនៅខេត្តដូចជា ខេត្តក្រចេះ ស្ទឹងត្រែង រតនៈគិរី មណ្ឌលគិរី ព្រះវិហារ និងកំពង់ធំ។ យុទ្ធនាការនេះបានទទួលលទ្ធផលដ៏ល្អប្រសើរដោយមានអ្នកគាំទ្រចំនួន៣០០០នាក់ មានអត្ថបទចុះផ្សាយលើសពី៦០០ និងមានការផ្សាយតាមបណ្តាញផ្សព្វផ្សាយជាតិ និងអន្តរជាតិ និងក៏មានម្ចាស់ភោជនីយដ្ឋានយ៉ាងតិចចំនួន៥២នាក់ បានតាំងចិត្តបញ្ឈប់ការលក់សាច់សត្វព្រៃ៕
Account
Security
Favourite Content