ថាមពលអគ្គិសនី គឺជាតម្រូវការដ៏ចាំបាច់មួយសម្រាប់ការរស់នៅប្រចាំថ្ងៃ ក៏ដូចជាការប្រកបអាជីវកម្មផ្សេងៗ។ ដោយឡែក សម្រាប់កម្ពុជា ថាមពល​អគ្គិសនីដែលកំពុងផ្គត់ផ្គង់តម្រូវការប្រើប្រាស់នាពេលបច្ចុប្បន្ន ភាគច្រើនមានប្រភពសំខាន់មកពីទំនប់វារីអគ្គិសនី ដែលជាប្រភេទថាមពលកកើតឡើងវិញ។ យ៉ាងណាក៏ដោយ រាជរដ្ឋាភិបាលនៅតែព្យាយាមជំរុញឱ្យមានការប្រើប្រាស់ប្រាស់ថាមពលស្អាតឱ្យបានច្រើន ដើម្បីបង្កានូវផលប៉ះពាល់នានាក្នុងពេលអនាគត។

យោងតាមរបាយការណ៍កាលពីដើមឆ្នាំ២០២៣កន្លងទៅ អាជ្ញាធរអគ្គិសនី និងសេវាករឯកជនបាន​ផ្គត់ផ្គង់អគ្គិសនីប្រមាណជាង ៩៩% នៃចំនួនភូមិសរុបនៅទូទាំងប្រទេសកម្ពុជា ដោយសល់ ១%​​ ទៀត ឬភូមិចំនួន៨៨ ពុំទាន់មានការផ្គង់ផ្គង់អគ្គិសនីពីបណ្តាញជាតិទៅដល់។ ភូមិដែលនៅសល់ទាំងនោះ ភាគច្រើនមានសភាពលំបាកដែលអាជ្ញាធរអគ្គសនីមិនអាចតភ្ជាប់​បានភ្លាមៗ និងខ្លះទៀតជាភូមិលើទឹកជាដើម។

ដោយមើលឃើញពីបញ្ហានេះ ក្រុមហ៊ុន Okra បានផ្ដល់ជាដំណោះស្រាយមួយ តាមរយៈបច្ចេកវិទ្យា​ទាញយកថាមពលពីពន្លឺព្រះអាទិត្យ។ ក្រុមហ៊ុនខាងលើនេះ បានកំណត់យកប្រជាជននៅតាម​តំបន់ដាច់ស្រយាលជាប្រជាជនគោលដៅ ពោលគឺជួយសម្រាលការចំណាយថ្លៃអគ្គិសនីរបស់ពួក​គេ។

មិនត្រឹមតែផ្ដល់ជាថាមពលស្អាតដល់ប្រជាជនប៉ុណ្ណោះទេ តែ Okra ក៏មាននូវបច្ចេកវិទ្យាដែលអាចបំបែកប្រភពថាមពលអគ្គិសនីទៅកាន់ផ្ទះប្រជាពលរដ្ឋផ្សេងទៀតដែលនៅក្បែរៗគ្នាផងដែរ។ និយាយជារួមអាជីវកម្មមួយនេះ ផ្ដោតសំខាន់ទៅលើការផ្ដល់អគ្គិសនីទៅដល់សហគមន៍តែម្ដង។ ជាក់ស្ដែង កាលពីឆ្នាំ២០២៣កន្លងទៅ ក្រុមហ៊ុននេះបានរៀបចំប្រព័ន្ធសូឡាសម្រាប់ផ្ទះចំនួន ៥២ គ្រួសារ នៅសហគមន៍អណ្តែតទឹក ក្នុងភូមិក្បាលតោល ខេត្តបាត់ដំបង។ ការផ្ដល់ជូននេះ បានធ្វើឱ្យ​ប្រជាសហគមន៍មានភាពងាយស្រួលជាងមុន និងចំណាយប្រាក់តិចជាងមុនទៅលើការទិញអគ្គីសនី ពីក្រុមហ៊ុនឯកជន។ ក្រៅពីនោះ ក្រុមហ៊ុនក៏បានសហការជាមួយអង្គការដៃគូផ្សេងទៀតក្នុងការជួយគាំទ្រដល់អាជីវកម្មខ្នាតតូចនៅក្នុងសហគមន៍ដាច់ស្រយាល ដើម្បីឱ្យការរស់នៅជារួមក្នុងសហគមន៍មានភាពប្រសើរឡើង ដែលគិតមកដល់ពេលនេះ មានបណ្តាខេត្តចំនួន៤ហើយដែលទទួលបាននូវអត្ថ​ប្រយោជន៍ទាំងនោះ រួមមានដូចជា ខេត្តកំពង់ឆ្នាំង ស្វាយរៀង កំពង់ស្ពឺ និងខេត្តតាកែវ។

បច្ចុប្បន្ន ពលរដ្ឋរស់នៅតាមតំបន់ដែលមានវត្តមាន Okra ជួយគាំទ្រទាំងនោះអាចទទួលបាននូវ សេវាកម្មតម្លើង និងផ្ទាំងសូឡា ដើម្បីអាចទាញយកថាមពលអគ្គិសនីមកប្រើប្រាស់ជាមួយ​នឹងតម្លៃ​ធូរថ្លៃធៀបទៅនឹងថាមពលអគ្គិសនីដែលផ្គត់ផ្គង់ដោយក្រុមហ៊ុនឯកជន និងអគ្គិសនីកម្ពុជា ប៉ុន្តែទោះ​បីជាយ៉ាងណាក្តី វាមិនមានកម្រិតខ្ពស់ និងទូលំទូលាយដូចជាថាមពលអគ្គិសនីដែលគេផ្គត់​ផ្គង់ធម្មតា​នោះដែរ។ ដោយឡែក សកម្មភាពនេះ​មិនត្រឹមតែកើតមានឡើងនៅក្នុងប្រទេសកម្ពុជាប៉ុណ្ណោះទេ ក្រុមហ៊ុន Okra ក៏បាន និងកំពុងធ្វើសកម្មភាពស្រដៀងគ្នានេះនៅតាមបណ្ដាប្រទេសអាហ្វ្រីកខាងត្បូងផងដែរ។

គួរឲ្យដឹងដែរថា គម្រោងដែល Okra បានអនុវត្តបានជោគជ័យកន្លងមកមានដូចជា នៅភូមិស្ទឹងជ្រៅ ខេត្តកំពង់ឆ្នាំង ចំនួន ៨១ ផ្ទះ ជាមួយនឹងថាមពលប្រើប្រាស់ប្រចាំថ្ងៃ ២០១ វ៉ាត់ម៉ោងក្នុងមួយថ្ងៃ​​, នៅព្រែកស្ពាន ១៧គ្រួសារ ទំហំប្រើប្រាស់ ៣៩ គីឡូវ៉ាត់ម៉ោង , នៅតាដោកចំនួន ៣០ គ្រួសារ ៥៧គីឡូ​វ៉ាត់ម៉ោងរៀងរាល់ថ្ងៃ។ ដោយមូលហេតុទាំងនេះហើយ ទើបក្រុមហ៊ុន Okra បានជាប់ជាប្រភេទអាជីវកម្មបរិយាបន្ន ដែលជាប្រភេទអាជីវកម្មគំរូមួយ។ យ៉ាងណាមិញ ធុរកិច្ចបរិយាបន្ន គឺជាអាជីវកម្មឈរលើគោលការណ៍​អាជីវកម្មដែលបង្កើតដំណោះ​ស្រាយ​​ជាប្រព័ន្ធ មានភាពច្នៃប្រតិដ្ឋ និងមានទ្រង់ទ្រាយធំ ឆ្លើយតបទៅនឹងបញ្ហាប្រឈមពាក់ព័ន្ធរបស់​ប្រជាជនក្រីក្រ និងប្រជាជនមានចំណូលទាប (BoP និង B40)៕