បើនិយាយពីក្រូចថ្លុង គេមិនអាចមើលរំលងបានទេនូវក្រូចថ្លុងកោះទ្រង់នៃខេត្តក្រចេះរហូតក្លាយជាកសិផលសម្គាល់ភូមិសាស្ត្រ ត្បិតក្រូចថ្លុងប្រភេទនេះមានរសជាតិឆ្ងាញ់ប្លែកខុសពីក្រូចនៅតំបន់ដទៃ ។ ចង់ដឹងទេថា តើបច្ចេកនៃការដាំដុះ ការថែទាំ ពូជក្រូចថ្លុងកោះទ្រង់ខេត្តក្រចេះត្រូវបានអនុវត្តបែបណា ? ថ្ងៃនេះ សូមអ្នកទាំងអស់គ្នាមកមើលពីបច្ចេកទេសសំខាន់ៗក្នុងការបំបៅដើម និងការដាំក្រូចថ្លុងកោះទ្រង់ដូចខាងក្រោម៖
ដើម្បីដាំក្រូចថ្លុងបាន អ្វីដែលកសិករចាំបាច់ត្រូវធ្វើនោះគឺការបំបៅកូនក្រូច ដែលគេជ្រើសរើសមែកក្រូចណាដែលស្រលូនល្អ ទើបទទួលបានដើមល្អ។ ចំណែកដីសម្រាប់បំបៅ គេត្រូវយកដីនៅក្បែរៗគល់ក្រូចក៏បាន លាយជាមួយនឹងស្រកីដូងដើម្បីឱ្យវាជកទឹកល្អ បន្ទាប់មកយកកន្ត្រៃទៅចៀរក្រឡឹងជុំវិញមែកក្រូចប្រមាណ ២ធ្នាប់ដៃ ទើបបកសំបកដើមត្រង់បរិវេណនោះចេញ រួចបង្ហើបត្រង់មុខដែលចៀរសំបកចេញ ចៀសវាងវាដុះជិតវិញ។
បន្ទាប់ពីយកសំបកចេញហើយ គេត្រូវកោសរំអិលចេញសិន ទើបយកដីដែលលាយហើយទៅរុំនៅជុំវិញចន្លោះមែកដែលបានចៀរនោះ បន្ទាប់មកយកប្លាស្ទិកទំហំធំល្មមទៅរុំខ្ចប់ដី និងយកខ្សែចងផ្នែកខាងលើ ផ្នែកកណ្ដាល និងផ្នែកខាងក្រោមឱ្យជិត និងណែនល្អ។ គេទុកមែកនេះរយៈពេលពី ៣- ៥ខែ ទើបធ្វើឱ្យកូនក្រូចរឹងមាំ និងដាំបានល្អ។
ចំពោះមែកដែលកាត់ពីបំបៅខាងលើហើយ អ្នកដាំត្រូវយកវាទៅដាក់ផ្សាំក្នុងថង់ដីដែលគេអាចរក្សាទុកចន្លោះពី ១-៥ខែដើម្បីដាំ តែរយៈពេលដែល្អសម្រាប់ដាំគឺចន្លោះពី ១-៣ខែព្រោះ ឫសរបស់កូនក្រូចដុះពេញនៅក្នុងថង់។
ចំណែកការដាំ គួរទុកចម្ងាយ ៥ម៉ែត្រចន្លោះពីដើមមួយទៅដើមមួយទៀត ហើយការថែទាំក៏មិនពិបាកនោះដែរ ព្រោះនៅរដូវវស្សាមានភ្លៀងធ្លាក់គឺមិនចាំបាច់ស្រោចទឹកច្រើននោះទេ ឯនៅរដូវប្រាំងគេត្រូវការស្រោចទឹកមួយសប្ដាហ៍ម្ដង ហើយគ្រាន់តែត្រូវការពារសត្វល្អិត និងដង្កូវតិចតួចប៉ុណ្ណោះ។
សម្រាប់ការដាំដោយប្រើកូនបំបៅខាងលើនេះ គឺឆាប់ចេញផ្កា ចេញផ្លែច្រើន តែគេត្រូវបេះចេញជាមុនសិន ឬទុកត្រឹមមួយផ្លែបានហើយទើបបានផ្លែធំល្អ។ បន្ទាប់មក កសិករអាចមើលថែទាំក្រូចតាមធម្មតា និងប្រមូលផលលក់ដើម្បីលើកកម្ពស់ជីវភាពគ្រួសារបាន៕