ភ្នំពេញ៖ នៅក្នុងរយៈពេល ២ខែ ដើមឆ្នាំ២០២៥កន្លងទៅនេះ កម្ពុជារកបានចំណូលពីការនាំចេញជ័រកៅស៊ូជាង ១០៥.១២ លានដុល្លារ ខណៈដែលការនាំចេញឈើកៅស៊ូបាន ៩៦៨.៥៣០ ដុល្លារ ។ នេះបើយោងតាមរបាយការណ៍អគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ។

របាយការណ៍ដដែលបានបង្ហាញថា តម្លៃកៅស៊ូនៅដើមឆ្នាំ២០២៥នេះ មានភាពល្អប្រសើរ ពោលគឺមានតម្លៃ ១ ៩២៦ ដុល្លារក្នុងមួយតោន កើនឡើង ៤៧៥ ដុល្លារក្នុងមួយតោន ឬ ៣២,៧ ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈដែលតម្លៃឈើកៅស៊ូជាមធ្យមក្នុងរង្វង់ ៣៣០ដុល្លារក្នុងមួយម៉ែត្រគូប។

លោក ឃុន កក្កដា អគ្គនាយកស្តីទីនៃអគ្គនាយកដ្ឋានកៅស៊ូ បានបញ្ជាក់ថា សម្រាប់តែនៅក្នុងខែកុម្ភៈ ឆ្នាំ២០២៥ តម្លៃកៅស៊ូលក់ជាមធ្យមគឺ ១ ៩០៧ ដុល្លារក្នុងមួយតោន ធ្លាក់ចុះ ២៦ ដុល្លារក្នុងមួយតោន (១,៣៤ ភាគរយ) ធៀបនឹងខែមករា ។

លោក ឃុន កក្កដា បានមានប្រសាសន៍ថា ៖

«អគ្គនាយកដ្ឋាននឹងបន្តធ្វើការដើម្បីសម្រេចបាននូវគោលដៅដែលបានគ្រោងទុក និងផ្តល់លទ្ធផលវិជ្ជមាន។ យើងនឹងបន្តសហការជាមួយសមាគមកៅស៊ូជាតិ និងអន្តរជាតិលើគំនិតផ្តួចផ្តើមស្រាវជ្រាវ និងអភិវឌ្ឍន៍ក្នុងឧស្សាហកម្មកៅស៊ូ។ យើងក៏នឹងរក្សាកិច្ចសហប្រតិបត្តិការជាមួយមន្ទីរកសិកម្ម រុក្ខាប្រ​មាញ់ និងនេសាទ ក្រុមហ៊ុនចម្ការកៅស៊ូ ចម្ការកៅស៊ូជាលក្ខណៈគ្រួសារ រោងចក្រកែច្នៃ និងអ្នកពាក់ព័ន្ធផ្សេងទៀត ដើម្បីកែលម្អបច្ចេកទេសដាំដុះកៅស៊ូ និងបង្កើនការប្រមូលទិន្នន័យ»។

លោក អេង ថុង ប្រធានក្រុមប្រឹក្សាសហគមន៍កសិកម្មសំបូរមានជ័យ បានមានប្រសាសន៍ថា សហគមន៍របស់លោកជាកៅស៊ូលក្ខណៈគ្រួសារ ដែលបច្ចុប្បន្នមាន ៥០គ្រួសារធ្វើកៅស៊ូនៅលើផ្ទៃដីប្រមាណ៧០ហិកតា ប៉ុន្តែអាចមានលទ្ធភាពក្នុងការប្រមូលទិន្នផលត្រឹមតែ ១ខែ ២តោនប៉ុណ្ណោះ​ ហើយទៅឱ្យសិប្បកម្មកែឆ្នៃក្នុងស្រុកដែលមានតម្លៃសមរម្យអាចទទួលយកបាន ដែលខុសពីគ្រាមុនលក់ឱ្យឈ្មួញជាជនជាតិវៀតណាមមានភាពមិនប្រាកដប្រជា ។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់កាលពីពេលថ្មីៗនេះថា វិស័យកសិកម្មនៅតែបន្តដើរតួនាទីយ៉ាងសំខាន់ក្នុងការធានាសន្តិសុខស្បៀង ជំរុញកំណើនសេដ្ឋកិច្ច បង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋ។

ឯកឧត្តមរដ្ឋមន្ត្រី បានឱ្យដឹងថា ៖

«បច្ចុប្បន្នកម្ពុជាមានរោងចក្រ និងរោងសិប្បកម្មកែច្នៃកៅស៊ូ និងឈើកៅស៊ូចំនួន ១៧៩ កើនឡើងចំនួន៦ ធៀបនឹងឆ្នាំ២០២៣។ ឧស្សាហកម្មកៅស៊ូបានបង្កើតកា​រងារចំនួន១៤ម៉ឺនកន្លែង និងបានគាំទ្រដល់សុខុមាលភាពសេដ្ឋកិច្ចរបស់ប្រជាពលរដ្ឋចំនួន ៤២ម៉ឺនគ្រួសារ ខណៈដែលរោងចក្រផលិតសម្បកកង់រថយន្តខ្នាតធំមានចំនួន៣កំពុងដំណើរការ និងរង់ចាំទទួលទិញជ័រកៅស៊ូក្នុងស្រុក ស្ថិតនៅក្នុងខេត្តស្វាយរៀង ក្រចេះ និងក្រុងព្រះសីហនុ»។

សូមរំលឹកថា រោងចក្រផលិតសំបកកង់រថយន្ដចំនួន៣ ដែលកំពុងតែដំណើរការរួមមាន ៖

ទី១៖ ក្រុមហ៊ុន CART TIRE CO.,LTD នៅតំបន់សេដ្ឋកិច្ចពិសេស ឈីលូ ជាន ពុចាយ (ខេត្ដស្វាយរៀង) បានដំណើរការនៅឆ្នាំ២០២១ លើទំហំផ្ទៃដី ៥០ហិកតា ក្រោមទុនវិនិយោគ ៧៨៧លានដុល្លារ ដោយមានទីផ្សារនាំចេញទៅអាមេរិក, កាណាដា, សមគមន៍អីរ៉ុប និងអាស៊ី ក្រោមម៉ាកសញ្ញា «Sailun»។

ទី២៖ ក្រុមហ៊ុន GENERAL TIRES TECHNOLOGY (CAMBODIA) CO.,LTD នៅតំបន់សេដ្ឋកិច្ចពិសេស ក្រុងព្រះសីហនុ (ខេត្ដព្រះសីហនុ) បានដំណើរការ នៅឆ្នាំ២០២២ លើទំហំផ្ទៃដី២០ហិកតា ក្រោមទុនវិនិយោគ ២៩៧លានដុល្លារ ដោយមានទីផ្សារនាំចេញ ទៅអាមេរិក និងមានគម្រោងនាំចេញទៅទីផ្សារប្រទេសប្រេស៊ីល ក្រោមម៉ាកសញ្ញា «Sailun»។

ទី៣៖ រោងចក្រផលិតសំបកកង់រថយន្ដ ក្រុមហ៊ុន NEWBUSTAR (Cambodia) នៅតំបន់រដ្ឋបាលសេដ្ឋកិច្ចពិសេស យូ ប៊ី អ៊ី ស្នួល ស្ថិតនៅស្រុកស្នួល ខេត្តក្រចេះ តម្លៃជាង១៣៨លានដុល្លារ បានបើកឲ្យ ដំណើរការជាផ្លូវការ នៅថ្ងៃទី០៦ ខែកញ្ញា ឆ្នាំ២០២៤ ដោយមានទីផ្សារនាំចេញ ទៅអាមេរិក, សហគមន៍អីរ៉ុប និងប្រទេសប្រេស៊ីល ក្រោមម៉ាកសញ្ញា «DoubleStar»។

ឯកឧត្តមរដ្ឋមន្ត្រី បានបញ្ជាក់ថា វិស័យឯកជនគឺជាដៃគូដែលមិនអាចខ្វះបាន និងជាកម្លាំងចលករដ៏សំខាន់ដែលនៅពីក្រោយការអភិវឌ្ឍន៍វិស័យកសិកម្ម។ ក្រសួងកសិកម្ម ស្វាគមន៍ និងលើកទឹកចិត្តដល់ការវិនិយោគក្នុងវិស័យឯកជនកាន់តែច្រើន ដែលនឹងជួយបង្កើតការងារ បង្កើនប្រាក់ចំណូល ជំរុញការនាំចេញ និងកំណើ​នសេដ្ឋកិច្ចជាតិ។

អ្នកឧកញ៉ា លឹម ហេង បានគូសបញ្ជាក់ថា បើសិនជាមានរោងចក្រ ទទួលទិញប្រកបដោយនិរន្ដភាព ពីអ្នកផលិតកៅស៊ូនោះ នឹងធ្វើឲ្យអ្នកដាំកៅស៊ូ មានការកើនឡើង មិនត្រឹមតែប៉ុណ្ណឹងនោះទេ គឺអាចទាក់ទាញអ្នកវិនិយោគពីបរទេស មកដាំកៅស៊ូនៅក្នុងប្រទេសកម្ពុជាបន្ថែមទៀត ដែលអាចពង្រីកទំហំផ្ទៃដី ការដាំកៅស៊ូមានការកើនឡើងផងដែរ។

កាលពីឆ្នាំ២០២៤ ប្រាក់ចំណូលសរុបពីការនាំចេញផលិតផលកៅស៊ូសម្រេចបាន ៦៧១,៧លានដុល្លារ កើនឡើងជាង១៥០លានដុល្លារ បើធៀបនឹងឆ្នាំ២០២៣។ ចំណែករោងចក្រផលិតសំបកកង់ក្នុងស្រុកចំនួន ៣ បានកែច្នៃកៅស៊ូផលិតក្នុងស្រុកចំនួន ៥៨,០០០ តោន ដែលមានតម្លៃប្រហែល ៩៦,៤ លានដុល្លារ កើនឡើងជាង៥០ លានដុល្លារពីឆ្នាំ២០២៣។

សូមជម្រាបថា បច្ចុប្បន្ន ផ្ទៃដីដាំកៅស៊ូសរុបរបស់កម្ពុជាមានទំហំ ៤២៥,៤៤៣ ហិកតា ដែលក្នុងនោះ ៣៣០,២៥៩ ហិកតា (៧៨ ភាគរយ) កំពុងប្រមូលផល ខណៈដែល ៩៥,១៨៤ ហិកតា (២២ ភាគរយ) កំពុងស្ថិតក្នុងដំណាក់កាល​ដាំដុះ ។ ផ្ទៃដីកៅស៊ូកសិឧស្សាហកម្ម ២២៦ ៨៤០ហិកតា ស្មើ៥៥ភាគរយ និងផ្ទៃដីកៅស៊ូគ្រួសារ១៨០ ៣៣២ហិកតា ស្មើ ៤៤ភាគរយ៕