សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅរៀងរាល់ថ្ងៃចុងសប្ដាហ៍ ឬថ្ងៃឈប់សម្រាកក្នុងពិធីបុណ្យផ្សេងៗ ស្ពានថ្មីឆ្លងព្រែកកំពត តែងតែមានការកកស្ទះដោយសារតែកំណើនភ្ញៀវទេសចរទៅលេងច្រើន ដូច្នេះហើយរដ្ឋបាលខេត្តកំពត មានគម្រោងសាងសង់ស្ពានថ្មីមួយខ្សែទៀត ឆ្លងព្រែកកំពត ឬព្រែកកំពង់បាយ ដើម្បីសម្រួលដល់ការធ្វើដំណើររបស់ភ្ញៀវទេសចរទៅលេងខេត្តដែលមានសក្ដានុពលមួយនេះ ក៏ដូចជា តាមបណ្តារមណីយដ្ឋាននានាក្នុងខេត្ត ដូចជា ភ្នំបូកគោ ទឹកឈូ ដូងទេរ ចុងព្រែក និងរមណីយដ្ឋានកែច្នៃនៃវិស័យឯកជនផងដែរ ។
នៅក្នុងកិច្ចប្រជុំមួយកាលពីពេលថ្មីៗនេះ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានលើកឡើងថា ដោយសារតែកំណើនភ្ញៀវទេសចរមកលេងខេត្តកំពតកាន់តែច្រើន ធ្វើឱ្យមានការកកស្ទះនៅគល់ស្ពានព្រែកកំពត ខណៈដែលស្ពានចាស់ (ស្ពានឥន្ធនូ ) មានសភាពចាស់ទ្រុឌទ្រោម មិនអនុញ្ញាតឱ្យរថយន្តឆ្លងកាត់បាន ពោលគឺឆ្លងកាត់បានត្រឹមតែអ្នកថ្មើរជើង និងម៉ូតូ ដែលធ្វើឱ្យស្ពានថ្មីមានការកកស្ទះជាប្រចាំ ជាពិសេសនៅរៀងរាល់ថ្ងៃសៅរ៍ និងថ្ងៃអាទិត្យ ក៏ដូចជាថ្ងៃឈប់សម្រាកបុណ្យជាតិធំៗ។
ឯកឧត្តម អភិបាលបានបញ្ជាក់ថា ៖
«ដើម្បីកាត់បន្ថយការកកស្ទះនៅលើស្ពានថ្មី និងក្រុងកំពត រដ្ឋបាលខេត្តកំពតសម្រេចថា នឹងសាងសង់ស្ពានមួយខ្សែទៀត ឆ្លងកាត់ព្រែកកំពត ឬព្រែកកំពង់បាយនៅពេលឆាប់ៗនេះ។ ម្យ៉ាងវិញទៀត ស្ពានដែលគ្រោងនឹងសាងសង់ថ្មីនេះ មិនត្រឹមតែសម្រាប់ឆ្លងកាត់ធម្មតាប៉ុណ្ណោះទេ ប៉ុន្តែនឹងសាងសង់ឡើងតាមរចនាបថពិសេសដែលមានសោភ័ណភាព និងអាចទាក់ទាញភ្ញៀវទេសចរជាតិ និងអន្តរជាតិផងដែរ» ។
ជាមួយនឹងផែនការអភិវឌ្ឍហេដ្ឋារចនាសម្ព័ន្ធនានានៅទូទាំងក្រុងកំពត ក៏ដូចជាខេត្តទាំងមូល កាលពីពេលថ្មីៗនេះ រដ្ឋបាលខេត្តកំពត ក្រោមវត្តមានរបស់ឯកឧត្តម ម៉ៅ ធនិនបានបើកការដ្ឋានសាងសងនាឡិកាយក្សកម្ពស់៣៥ម៉ែត្រ ដោយគ្រោងនឹងបញ្ចប់នៅចុងឆ្នាំ២០២៤នេះ ពោល គឺនឹងបញ្ចប់នៅមុនឆ្លងចូលឆ្នាំសកល ២០២៤ ចូល ២០២៥ ដើម្បីទាក់ទាញទេសចរមកលេងខេត្តកំពតកាន់តែច្រើនបន្ថែមទៀត ។
លោក ជិន ណារិន នាយកប្រតិបត្តិក្រុមហ៊ុនអចលនទ្រព្យ សាន់សាញ រៀលអ៊ីស្ទេត ( Sun Shine Real Estate ) បានមានប្រសាសន៍ថា រាល់សមិទ្ធផលរបស់ខេត្តកំពតក្នុងរយៈពេលប៉ុន្មានឆ្នាំចុងក្រោយនេះ ដូចជា ឆ្នេរខ្សាច់ថ្មីតាមបណ្ដោយព្រែកកំពត រូបសំណាកសេះសមុទ្របាញ់ទឹក ទីវាលលំហែរ និងហាត់ប្រាណស្របតាមមាត់ព្រែក ក៏ដូចជាហេដ្ឋារចនាសម្ព័ន្ធនៅទូទាំងក្រុង នឹងទាក់ទាញទេសចរមកកាន់ខេត្តកំពតកាន់តែច្រើន ។ នៅពេលមានភ្ញៀវទេសចរមកកាន់កាន់តែច្រើន ក៏នឹងធ្វើឱ្យតម្រូវការសេវាកម្មផ្គត់ផ្គង់ក្នុងវិស័យទេសចរណ៍ ដូចជាផ្ទះសំណាក់ សណ្ឋាគារ ភោជនីយដ្ឋាន នឹងកាន់តែមានតម្រូវការខ្ពស់ជាងមុន ដូច្នេះ ក៏អាចទាក់ទាញវិនិយោគិនមកបណ្ដាក់ទុនវិនិយោគលើសេវាកម្មទេសចរណ៍ក្នុងខេត្តកំពតបានមួយកម្រិតទៀតផងដែរ ។
លោកបន្តថា ដោយសារតែខេត្តកំពត និងកែប ជាខេត្តដែលបំពេញតម្រូវការទេសចរណ៍ឱ្យគ្នាទៅវិញទៅមក ការសាងសង់ព្រែកជីកហ្វូណនតេជោ និងកំពង់ផែនៅខេត្តកែប ក៏នឹងធ្វើឱ្យមានការវិនិយោគបន្ថែមនៅក្នុងខេត្តកំពតបានថែមទៀតផងដែរ។ ដូច្នេះ នៅពេលអនាគត ស្ពានចាស់តែមួយនឹងមិនអាចគ្រប់គ្រាន់សម្រាប់ចរាចរណ៍បាននោះទេ ជាក់ស្ដែង បច្ចុប្បន្ននេះ រៀងរាល់ថ្ងៃសៅរ៍ និងអាទិត្យ ចរាចរណ៍កកស្ទះនៅលើស្ពាននេះរាប់ម៉ោងទៅហើយ ជាពិសេសនៅពេលព្រឹក ដូច្នេះហើយបើសិនជាមានស្ពានថ្មីមួយទៀត នឹងជួយសម្រួលចរាចរណ៍ផង និងទាក់ទាញទេសចរមកកាន់ខេត្តកំពតផង ហើយនឹងអាចជួយជំរុញការវិនិយោគផងដែរ៕
Account
Security
Favourite Content