សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ដង្កូវនាគ ឬដង្កូវត្រីនាគ ជាដង្កូវមួយប្រភេទដែលត្រូវបានគេយកធ្វើជាចំណីសម្រាប់សត្វត្រីតាំងលម្អ ជាពិសេសប្រភេទត្រីនាគដែលមានតម្លៃថ្លៃ ត្បិតគេជឿថាវាមានធាតុចិញ្ចឹមខ្ពស់ទើបធ្វើឱ្យដង្កូវនាកនេះមានទីផ្សារល្អ ។
លោក បែន សំផាន ម្ចាស់កសិដ្ឋានចិញ្ចឹមដង្កូវចម្រុះ ដែលបានចិញ្ចឹមប្រភេទដង្កូវនាគនេះបានមានប្រសាសន៍ថា៖
«បច្ចុប្បន្នយើងមានចិញ្ចឹមដង្កូវនាគប្រមាណ ៣០០-៤០០ធុង ដែលវាមានទីផ្សារល្អ និងអាចប្រមូលលក់បានរាល់ថ្ងៃ ហើយតម្លៃរបស់វាក៏ថ្លៃគួរសមបើប្រៀបធៀបទៅនឹងតម្លៃដង្គុវទូទៅ។ ដង្កូវនាគនេះ យើងអាចយកឱ្យសត្វផ្សេងៗស៊ីបាន តែដោយសារវាមានតម្លៃថ្លៃ ភាគច្រើនគេទិញយកឱ្យសត្វមានតម្លៃស៊ីដូចជាត្រីនាគជាដើម ហើយសម្រាប់ការចិញ្ចឹមដង្កូវនាគនេះ យើងអាចលក់បានក្នុងតម្លៃជាង ៤០ ០០០រៀលក្នុងមួយគីឡូក្រាម ហើយក៏មានលក់ជាមេពូជសម្រាប់យកទៅភ្ញាស់ផងដែរ»។
ម្ចាស់កសិដ្ឋានរូបនេះរៀបរាប់ទៀតថា រយៈពេលចិញ្ចឹម រាប់ចាប់តាំងពីពេលញាស់ ដល់ពេលចាប់លក់ គឺត្រូវការពេលប្រមាណ ១ខែកន្លះ ប៉ុន្តែក៏អាចទុកបានរហូតដល់ ៣ខែកន្លះ ដោយឱ្យវាលូតលាស់ទៅជាមេពូជសម្រាប់បង្កាត់វិញក៏បាន។
លោកបានបញ្ជាក់ទៀតថា ៖
«ក្នុងការបង្កាត់ពូជដង្កូវនាគ យើងត្រូវចាប់ដង្កូវមួយៗមកដាក់ក្នុងកំប៉ុងដោយឡែកៗពីគ្នា ដោយកំប៉ុងទាំងនោះមានចោះរន្ធឱ្យមានខ្យល់ចេញចូល ហើយទុករយៈពេល ៣សប្ដាហ៍ដោយបង្អត់ចំណី និងទឹក។ បន្ទាប់ពីរយៈពេល ៣សប្ដាហ៍ហើយ ដង្កូវខ្លះក្លាយជាមេពូជ ឯខ្លះទៀតមិនលូតលាស់ទេ យើងដាក់ឱ្យមាន់ស៊ីតែម្ដង។ សម្រាប់មេពូជ យើងលែងវាចេញពីកំប៉ុង លាយគ្នាមានញីមានឈ្មោលដាក់ក្នុងធុងដែលមានក្រាលចំណីនៅបាតធុង ទុកឱ្យវាបង្កាត់ពូជ និងពងបន្តទៀត លុះពេលមានពងហើយ ទើបយើងចាប់មេពូជចេញ និងបន្ថែមចំណីសម្រាប់កូនដង្កូវ»។
ពាក់ព័ន្ធនឹងការឱ្យចំណីនេះដែរ លោក ប៉ែន សំផាន បានបន្តថា សម្រាប់កូនដង្កូវគឺប្រើចំណីកូនមាន់ជាចំណីគោល ហើយក្រៅពីនេះត្រូវប្រើប្រភេទបន្លែដូចជាត្រឡាច ត្រកួនជាដើម ធ្វើជាផ្នែកមួយឱ្យដង្កូវស៊ី ជំនួសទឹក ព្រោះវាអាចស៊ីបន្លែបាន ប៉ុន្តែបន្លែត្រូវតែស្ងួតទឹកល្អ។ យ៉ាងណាក៏ដោយ ត្រូវមានការប្រុងប្រយ័ត្នសត្វស្រមោចចូលស៊ីចំណី ឬខាំដង្កូវ។
គួរបញ្ជាក់ដែរថា លោក បែន សំផាន បានចាប់ផ្ដើមមុខរបរចិញ្ចឹមដង្កូវនាគនេះប្រមាណ ២ឆ្នាំមកហើយ ដោយដំបូងឡើយលោកចង់ចិញ្ចឹមដើម្បីឱ្យមាន់ទាស៊ី ហើយបានរៀនបច្ចេកទេសពីប្រទេសជិតខាង និងទិញពូជមួយគីឡូក្រាមមកចិញ្ចឹមសាក ដោយដាក់បានប្រមាណ ២ធុង ជាមួយនឹងការចំណាយដើមទុនសាកល្បងប្រមាណ ៥០ដុល្លារ។ បន្ទាប់ពីបានធ្វើការចិញ្ចឹមសាកល្បងទទួលបានផលគួរសម លោកក៏បានពង្រីកការចិញ្ចឹមសម្រាប់លក់រហូតដល់សព្វថ្ងៃ។
ចុងក្រោយ ម្ចាស់់កសិដ្ឋានចិញ្ចឹមដង្កូវចម្រុះរូបនេះ ក៏ផ្ដាំផ្ញើផងដែរថា សម្រាប់បងប្អូនដែលមានចិញ្ចឹមសត្វ ឬក៏ចាប់អារម្មណ៍ចង់ចិញ្ចឹមដង្កូវនាគនេះ គឺអាចសាកល្បងបាន ព្រោះវាមានភាពងាយស្រួល មិនពិបាកមើលថែ ហើយអាចផ្ដល់ចំណូលគួរសមដែរ ៕
Account
Security
Favourite Content