សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់នៃក្រសួងរ៉ែ និងថាមពល បានឱ្យដឹងថា កម្ពុជាចម្រាញ់រ៉ែមាសបានជាង ៨ ៣៤៤គីឡូក្រាម និងផលិតដុំមាស ចំនួន ៩២២ដុំ ដោយទទួលបានចំណូលពីសួយសារជាង ១៣លានដុល្លារអាមេរិក ខណៈដែលដុំមាសទាំងអស់បានមកពីការចម្រាញ់រ៉ែមាស ដោយក្រុមហ៊ុនឯកជន ចំនួន៦ កំពុងមានប្រតិបត្តិការនៅក្នុងខេត្តចំនួន៥ ក្នុងប្រទេសកម្ពុជា។
ឯកឧត្តម អ៊ឹង ឌីប៉ូឡា បានបញ្ជាក់ក្នុងរបាយការណ៍ថា គិតត្រឹមថ្ងៃទី២៥ ខែកញ្ញា ឆ្នាំ២០២៣ ក្រុមហ៊ុនទាំង៦ បានចម្រាញ់មាសសរុបចំនួន ៩២២ដុំ ស្មើនឹងជាង ៨ ៣៤៤គីឡូក្រាម ជាមួយនឹងកំហាប់មាសសុទ្ធចំនួន៩០ ភាគរយ និងបានបង់សួយសារ ជាង១៣លានដុល្លារអាមេរិក។
ឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានថ្លែងឱ្យដឹងថា ទាក់ទងនឹងអាជីវកម្មរ៉ែមាសនេះ បច្ចុប្បន្នកម្ពុជាមានក្រុមហ៊ុនរុករករ៉ែមាសចំនួន ៦ ដែលបានទទួលអាជ្ញាប័ណ្ណអាជីវកម្ម ដើម្បីផលិតរ៉ែមាសពីក្រសួងរ៉ែ និងថាមពល កំពុងប្រតិបត្តិការចម្រាញ់រ៉ែមាស នៅក្នុងប្រទេសកម្ពុជា ដែលក្រុមហ៊ុនចំនួន៦ រួមមាន៖
ទី១៖ ក្រុមហ៊ុន Renaissance Minerals (Cambodia) Ltd ស្ថិតក្នុងតំបន់អូរខ្វាវ ស្រុកកែវសីម៉ា ខេត្តមណ្ឌលគិរី
ទី២៖ ក្រុមហ៊ុន Xinshan ស្ថិតនៅក្នុងតំបន់ភ្នំម្លុង ខេត្ដព្រះវិហារ
ទិ៣៖ ក្រុមហ៊ុន ឌែលខម (Delcom Cambodia) ស្ថិតនៅក្នុងតំបន់ភ្នំម្លុង ខេត្ដព្រះវិហារ
ទី៤៖ ក្រុមហ៊ុន Rong Cheng ស្ថិតនៅតំបន់ចុងផ្លាស់ ខេត្ដមណ្ឌលគិរី
ទី៥៖ ក្រុមហ៊ុន Xing Yuan ស្ថិតនៅតំបន់អូរត្រូន ខេត្តក្រចេះ
ទី៦៖ ក្រុមហ៊ុន LATE CHENG MINING DEVELOPMENT CO., LTD ស្ថិតតំបន់ភ្នំជី ខេត្តកំពង់ធំ។
ឯកឧត្តម អ៊ឹង ឌីប៉ូឡា បានបញ្ជាក់បន្ថែមថា ក្រុមហ៊ុនទាំង៦នេះ កំពុងតែចម្រាញ់រ៉ែមាសទៅតាមផែនការដែលឯកភាពជាមួយនឹងក្រសួងរ៉ែ និងថាមពល ហើយអនុលោមទៅតាមច្បាប់ និងបទបញ្ញាត្ដិជាធរមាននានាដោយមិនមានជាបញ្ហាអ្វីនោះទេ។
ក្នុងចំណោមក្រុមហ៊ុនទាំង៦នេះ គឺក្រុមហ៊ុន Renaissance Minerals នៅខេត្តមណ្ឌលគិរី ទទួលបានទិន្នផលខ្ពស់ជាងគេប្រមាណជាង ៧ ៨៤៦គីឡូក្រាម ខណៈ ៥ ក្រុមហ៊ុនទៀតទទួលបានផលតិចតួចប៉ុណ្ណោះ។ ក្រុមហ៊ុន Renaissance គ្រោងនឹងចម្រាញ់រ៉ែមាសប្រមាណ ៣ តោនជារៀងរាល់ឆ្នាំសម្រាប់រយៈពេល ៨ ឆ្នាំដំបូងនៃប្រតិបត្តិការអណ្តូងរ៉ែ ដែលមានប្រហែល ចំនួន២៥០ គីឡូក្រាមក្នុងមួយខែ។ ក្រុមហ៊ុននេះនាំចេញរ៉ែមាសទៅអូស្ត្រាលីដើម្បីចម្រាញ់។
សូមបញ្ជាក់ថា កម្ពុជាបានចាប់ផ្តើមចម្រាញ់យកមាសនៅកន្លែងរុករករ៉ែមាសក្នុងស្រុកកែវសីមា ខេត្តមណ្ឌលគិរី ចាប់តាំងពីការជីកយកមាសជាលក្ខណៈពាណិជ្ជកម្មកាលពីខែមិថុនា ឆ្នាំ២០២១ ដែលនេះជាកំណត់ត្រាជាប្រវត្តិសាស្ត្រនៃការចាប់ផ្តើមឧស្សាហកម្មចម្រាញ់រ៉ែមាសជាលើកដំបូង ដែលបាននាំមកនូវលំហូរទុនវិនិយោគពីក្រៅប្រទេសមកកម្ពុជា ការបង្កើតឱកាសការងារ និងសេដ្ឋកិច្ច ការពង្រីកនូវពិពិធកម្មខឿនឧស្សាហកម្មក្នុងស្រុក និងផលប្រយោជន៍សេដ្ឋកិច្ច សង្គមផ្សេងៗទៀតជាច្រើន សម្រាប់កម្ពុជា។
លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ រាជបណ្ឌិត្យសភាកម្ពុជា ធ្លាប់បានប្រាប់ AMS ថា ការផលិតមាសរបស់ក្រុមហ៊ុនអូស្ត្រាលី Renaissance Minerals មានការកើនឡើងគួរឱ្យកត់សម្គាល់ ដែលតួលេខបានបញ្ជាក់ដោយមន្ត្រីនៃក្រសួងរ៉ែ និងថាមពល ជាធនធានរ៉ែ និងជាសក្តានុពលដែលយើងបានទទួលបាន នឹងអាចរួមចំណែកក្នុងចរន្តសេដ្ឋកិច្ចរបស់កម្ពុជា។
លោកបណ្ឌិតបានគូសបញ្ជាក់ថា ៖
«ការធ្វើអាជីវកម្មរ៉ែរបស់ក្រុមហ៊ុនស្របច្បាប់ គឺអាចជាកាលានុវត្តភាពមួយដែលកម្ពុជាទទួលបាន ទី១ ចំណូលពីសួយសារ នៃអាជីវកម្មរ៉ែមាស ពីការវិនិយោគ ទិ២ សម្រាប់ស្រូបទាញកម្លាំងពលកម្មនៅក្នុងតំបន់ដោយបានផ្តល់ការងារដល់ប្រជាជន និងទី៣ ជាអត្តសញ្ញាណរ៉ែមាសរបស់កម្ពុជា»។
បណ្ឌិត ហុង វណ្ណៈ បានកត់សម្គាល់ថា នេះជាមូលធនសួយសារដ៏សំខាន់ ក្រៅពីចំណូលដែលបានមកពីក្រុមហ៊ុនអូស្ត្រាលី Renaissance ក៏មានក្រុមហ៊ុនដទៃទៀត ដែលបានធ្វើអាជីវកម្មរ៉ែមាស រួមជាមួយវិស័យដទៃទៀតមានវិស័យកាត់ដេរ ទេសចរណ៍ និងការនាំចេញ ព្រោះបើកាលណាអាជីវកម្មទាំងនេះរីកកាន់តែធំ វានឹងបានជំរុញដល់កំណើនសេដ្ឋកិច្ចជាតិរបស់យើង ៕
Account
Security
Favourite Content