សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខេត្តព្រះសីហនុនៅតែត្រូវបានយកចិត្តទុកដាក់បង្កើនភាពទាក់ទាញទុនវិនិយោគដ៏មានសក្ដានុពលនៅក្នុងប្រទេសកម្ពុជា។ ជាក់ស្ដែងក្រុមប្រឹក្សាអភិវឌ្ឍន៍កម្ពុជាបានផ្សព្វផ្សាយពីច្បាប់ស្ដីពីការវិនិយោគដល់បណ្ដាវិនិយោគិនទាំងក្នុង និងក្រៅប្រទេស ដើម្បីបញ្ជ្រាបព័ត៌មានបន្ថែមពីស្ថានភាពវិនិយោគ និងលក្ខខណ្ឌអំណោយផលក្នុងខេត្តនៃតំបន់សមុទ្រមួយនេះ ។
ឯកឧត្តម ទ្រី ដាលុច អគ្គលេខាធិការរងក្រុមប្រឹក្សាអភិវឌ្ឍន៍កកម្ពុជា បានមានប្រសាសន៍ថា រាជរដ្ឋាភិបាលបានខិតខំប្រឹងប្រែងយកចិត្តទុកដាក់លើវិស័យឯកជន និងឆ្លើយតបឱ្យបានទាន់ពេលវេលាទៅនឹងនិន្នាការសំខាន់ៗនៃព្រឹត្តិការណ៍នានាក្នុងតំបន់ និងសកល ព្រមទាំងច្បាមយកនូវកាលានុវត្តភាពដែលលេចចេញពីវិបត្តិតាមរយៈការដាក់ចេញនូវច្បាប់យុទ្ធសាស្ត្រដែលមានភាពឆ្លាតវៃខ្ពស់ក្នុងការប្រកួតប្រជែងដើម្បីទាក់ទាញ និងលើកទឹកចិត្តដល់វិនិយោគិនដែលជាការពង្រឹងមូលដ្ឋានគ្រឹះសម្រាប់កិច្ចអភិវឌ្ឍសេដ្ឋកិច្ចឱ្យកាន់តែរឹងមាំ ។
ឯកឧត្តម ក៏បានលើកឡើងអំពីបរិការណ៍ ដំណើរការ និងភាពចាំបាច់នៃការរៀបចំនូវច្បាប់ស្តីពីវិនិយោគ អនុក្រឹត្យស្តីពីការអនុវត្តច្បាប់ស្តីពីវិនិយោគ និងអនុក្រឹត្យស្តីពីការរៀបចំ និងការប្រព្រឹត្តទៅរបស់គណៈកម្មាធិការវិនិយោគរាជធានី-ខេត្ត ដែលសំដៅលើសិទ្ធិសម្រេចលើទុនវិនិយោគរហូតដល់ ៥លានដុល្លារ និងការបង្កើតនូវក្របខ័ណ្ឌគតិយុត្តដ៏ទូលំទូលាយ មានតម្លាភាព ភាពអាចប៉ាន់ប្រមាណទុកជាមុនបាន។
ឯកឧត្តម ឡុង ឌីម៉ង់ អភិបាលរងខេត្តព្រះសីហនុ បានបង្ហាញពីលក្ខណៈភូមិសាស្ត្រ ប្រជាសាស្ត្រ សមិទ្ធផលមួយចំនួនពាក់ព័ន្ធនឹងកិច្ចការវិនិយោគ សក្ដានុពល និងស្ថានភាពសេដ្ឋកិច្ចរបស់ខេត្តព្រះសីហនុ។
ឯកឧត្តមបានមានប្រសាសន៍បន្តថា ខេត្តព្រះសីហនុចំណូលជាមធ្យមសម្រាប់មនុស្ស ម្នាក់ (GDP) នៅឆ្នាំ២០២៣ មានចំនួន ៤.៦០២ដុល្លាអាមេរិក និងមានអាត្រាកំណើនសេដ្ឋកិច្ច ៦,៤ភាគរយ ដែលធ្វើឱ្យអត្រាភាពក្រីក្ររបស់ប្រជាពលរដ្ឋក្នុងខេត្តថយចុះមកត្រឹម ១,៦៨% នៅឆ្នាំ២០២៣ ។
នៅចំពោះមុខវិនិយោគិន ធុរជន និងអាជីករជាច្រើន នៅក្នុងពិធីផ្សព្វផ្សាយសក្ដានុពល ខេត្តព្រះសីហនុមន្ត្រីជាន់ខ្ពស់នៃ ក្រុមប្រឹក្សាអភិវឌ្ឍន៍កម្ពុជាបានធ្វើបទបង្ហាញលើប្រធានបទចំនួន ០៤ រួមមាន (១)ច្បាប់ស្តីពីវិនិយោគនិងអនុក្រឹត្យស្តីពីការអនុវត្តច្បាប់ស្តីពីវិនិយោគ និងនីតិវិធីពិនិត្យសំណើពាក់ព័ន្ធនឹងកិច្ចការច្បាប់នៃគម្រោងវិនិយោគ (២)ការជំរុញទាក់ទាញ និងការផ្តល់កិច្ចសម្រួលវិនិយោគ (៣)នីតិវិធីពិនិត្យសំណើសុំពាក់ព័ន្ធនឹងការចុះបញ្ជី, ការលើកទឹកចិត្តគម្រោងវិនិយោគ និង (៤)ការត្រួតពិនិត្យ ការវាយតម្លៃការអនុវត្តគម្រោង និងសេវាថែទាំវិនិយោគ ។
គួរបញ្ជាក់ថា រាជរដ្ឋាភិបាលកម្ពុជាបានកំណត់យកខេត្តព្រះសីហនុជាទិសដៅនៃការវិនិយោគ បន្ទាប់ពីរាជធានីភ្នំពេញ ដោយរដ្ឋាភិបាលបានដាក់ទុនវិនិយោគលើខេត្តនេះ រាប់រយលានដុល្លារអាមេរិកដើម្បីទាក់ទាញអ្នកវិនិយោគ ក្នុងនិងក្រៅប្រទេសចូលទៅតំបន់នោះ ដូចជាគម្រោងផ្លូវជាច្រើនខ្សែក្នុងខេត្តព្រះសីហនុ គម្រោងផ្លូវល្បឿនលឿន ព្រលានយន្តហោះ និងកំពង់ផែ ។ ជាលទ្ធផលក៏មានវិនិយោគិនធំៗក្នុងនិងក្រៅប្រទេសជាច្រើន បានចាប់អារម្មណ៍និងបណ្ដាក់ទុនវិនិយោគលើគម្រោងនានា ដែលធ្វើឱ្យខេត្តមួយនេះពោរពេញទៅដោយអគារខ្ពស់ៗទាំងកំពុងសាងសង់និងសាងសង់ររួច៕
Account
Security
Favourite Content