ផលិតផលខ្មែរក្នុងរយៈពេលប៉ុន្មានឆ្នាំចុងក្រោយនេះ គេសង្កេតឃើញថាចាប់ផ្ដើមរីកសុះសាយជាលំដាប់ ដោយមានទាំងប្រជាជនខ្លួនឯងបានចាប់យក និងបង្កើតអាជីវកម្មនានាដើម្បីលើកស្ទួយផលិតផលក្នុងស្រុក ព្រមទាំងអ្នក​ពាក់ព័ន្ធ​ដែលចាំជួយជំរុញ និងគាំទ្រនូវទីផ្សារលក់​ក្នុង​ស្រុក​ផងដែរ។ ប៉ុន្តែទោះជាយ៉ាងណា ម្ចាស់អាជីវកម្មទាំងនោះក៏ត្រូវការពេលវេលាបន្ថែមទៀតដើម្បីពង្រឹងគុណភាពផលិតផលរបស់ខ្លួន ឱ្យ​ឈរ​នៅលំដាប់មួយប្រៀបធៀបនឹងផលិតផលនាំចូល។ ម្យ៉ាងទៀត ផលិតកម្មក្នុងស្រុកទាំងមូល ក៏ត្រូវការពេលបន្ថែមទៀតផងដែរក្នុងការ​រួម​គ្នា​ធ្វើដើម្បីកាត់បន្ថយថ្លៃដើម។

លោកស្រី ចេន សុភាព នាយិកាសហគ្រាសកីតម្បាញខ្មែរ បានចែករំលែកក្នុងនាមខ្លួនជាម្ចាស់អាជីវកម្មដែលលក់ផលិតផលខ្មែរមួយរូបថា «គុណភាព» ជារឿងមួយដែលសំខាន់សម្រាប់ពង្រឹង និងពង្រីកទីផ្សារលក់។ ប៉ុន្តែដែលកាន់តែសំខាន់ជាងនេះទៅទៀត គឺភាពស្មោះត្រង់របស់ម្ចាស់អាជីវកម្មផ្ទាល់តែម្ដង ដែលអាចទាក់ទាញនូវទំនុកចិត្តរបស់អតិថិជន។

លោកស្រី ចេន សុភាព បានឱ្យដឹងថា ៖

“គុណភាពជាកត្តាចម្បងបំផុត ព្រោះបើអត់គុណភាពទេ យើងមិនអាចឈរ​លើទីផ្សារទេ។ តែក៏មិនមែនតែគុណភាពតែមួយមុខនោះដែរ វានៅមានកត្តាគួបផ្សំផ្សេងៗទៀត ទាំងគុណភាពផលិតផល គុណភាពសេវាកម្ម និងសោភ័ណភាពផងដែរ។ ជាបទពិសោធន៍របស់ខ្ញុំផ្ទាល់ ផលិតផលយើងដំបូងៗពិបាកធ្វើឱ្យអតិ​ថិជន​​ទុក​ចិត្តណាស់ ប៉ុន្តែបើយើងមិនធ្វើផងធ្វើម៉េចនឹងដឹង?​ ដើម្បីបង្កើន​ទំនុក​ចិត្ត​ពីអតិថិជន យើងគួរធ្វើផលិតផលដោយមានម៉ាកសញ្ញាត្រឹមត្រូវ មានការវេចខ្ចប់ឱ្យស្អាត ចុះបញ្ចីការពារ​ម៉ាកផលិត​ផល​ស្របច្បាប់ត្រឹមត្រូវ និងប្រាកដថា មានគុណភាពល្អ សេវាកម្មល្អ។”

ពាក់ព័ន្ធនឹងការយល់ឃើញមួយចំនួនដែលថា ទំនិញក្នុងស្រុកខ្វះការគាំទ្រពីប្រជាជនខាងក្នុងស្រុក​នោះ អ្នកស្រីបានលើកឡើងថា ៖

“ការពិតមុនទាមទារចង់បានការគាំទ្រពីប្រជាជនខ្មែរក្នុងស្រុក យើងត្រូវធ្វើផលិតផល​យើងឱ្យ​គេជឿសិន កុំខឹង ហើយកុំឌឺដងគេ ត្រូវងាកមកពង្រឹងសមត្ថិភាពខ្លួនយើង។ ក្រោយពេលគេមើលឃើញ គេជឿយើង គេនឹងមករកយើងដោយខ្លួន​ឯង​តែម្ដង ម្យ៉ាងទៀតគួរចូលទៅក្នុងក្រុមដែលគេបង្រៀន ហើយបើកចិត្តទទួលយកចំណេះដឹងថ្មីៗ។”

ទាក់ទិននឹងចំណុចខាងលើនេះដែរ លោកបណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនា​ភូមិមួយផលិតផលមួយ បានមានប្រសាសន៍ថា ៖

“នៅពេលយើងនិយាយដល់ការទិញសេវាកម្ម បើនិយាយពីអង្គរវត្ត ហេតុអីបានជាគេគាំទ្រស្រឡាញ់អង្គរវត្ត គឺគុណភាពនៃការសាងសង់នោះឯង។ ពេលទិញម៉ូតូ គឺចង់ទិញ ហុងដា ទូរស័ព្ទគឺទិញ iPhone គឺដោយសារផលិតផលនីមួយៗ​គេបង្កើនគុណ​ភាព ដូចសុភាសិតនៅអ៊ឺរ៉ុបដែលគេថា ទិញរបស់ដែលមានគុណភាពទើបមិនខាតលុយ​ច្រើន។”

លោកបណ្ឌិតបានបន្តទៀតថា ៖

“ចំពោះអ្នកផលិតត្រូវមានក្រមសីលធម៌ ទំនួលខុសត្រូវ សាមគ្គីភាព គុណភាព បង្កើនសោភ័ណភាព បង្កើតសក្កានុពលភាព និងតម្លៃសមរម្យ បើយើងក្ដាប់នូវរឿងទាំងនេះបាន នោះការលក់របស់យើងក៏នឹងប្រសើរជាងមុនដែរ៕”