ភ្នំពេញ ៖ កម្ពុជា និងម៉ាឡេស៊ី បានប្រកាសដាក់ឱ្យដំណើរការជាផ្លូវការគម្រោងទូទាត់ឆ្លងដែនតាមរយៈ យ្យូអរកូត រវាងប្រទេសទាំងពីរ ដើម្បីផ្តល់លទ្ធភាពឱ្យអ្នកប្រើប្រាស់ និងពាណិជ្ជករទទួលបាននូវបទពិសោធន៍ទូទាត់ប្រកបដោយប្រសិទ្ធភាព ងាយស្រួល សុវត្ថិភាព ឆាប់រហ័ស និងតម្លៃសមរម្យ។

គម្រោងទូទាត់ឆ្លងដែន តាមរយៈ យ្យូអរកួត រវាងប្រទេសទាំងពីរ ត្រូវបានធ្វើឡើងនៅថ្ងៃទី១៩ ខែកញ្ញា ឆ្នាំ២០២៨ ក្រោមអធិបតីភាព លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និងឯកឧត្តម Dato’ Seri Abdul Rasheed Ghaffour ទេសាភិបាល ធនាគារកណ្តាលម៉ាឡេស៊ី។

ពិធីនេះត្រូវបានរៀបចំឡើងក្រោមកិច្ចសហប្រតិបត្តិការដ៏រឹងមាំរវាងធនាគារជាតិនៃកម្ពុជា និងធនាគារកណ្តាលម៉ាឡេស៊ី បន្ទាប់ពីធនាគារកណ្តាលទាំងពីរបានចុះហត្ថលេខាលើអនុស្សរណៈយោគយល់ ស្តីពី “កិច្ចសហប្រតិបត្តិការផ្នែកនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់” កាលពីខែកុម្ភៈ ឆ្នាំ២០២៨ ហើយគម្រោងតភ្ជាប់ការទូទាត់ឆ្លងដែននេះ ត្រូវបានចែកចេញជាពីរដំណាក់កាល ដែលថ្ងៃនេះគឺជាថ្ងៃដែលដាក់ឱ្យដំណើរការដំណាក់កាលទី១។

នៅក្នុងដំណាក់កាលទី១ នៃការតភ្ជាប់នេះ ប្រជាជនកម្ពុជាអាចធ្វើការទូទាត់ទំនិញ និងសេវានៅប្រទេសម៉ាឡេស៊ីបាន ដោយគ្រាន់តែធ្វើការស្កេន យ្យូអរកូត (DuitNow QR Code) ដែលតាំងបង្ហាញដោយពាណិជ្ជករ តាមរយៈការប្រើប្រាស់កម្មវិធីទូទាត់បាគង (Bakong app) និងកម្មវិធីធនាគារចល័តរបស់ធនាគារមេឃប៊ែង (M2U KH app) ។ ការតភ្ជាប់ការទូទាត់ឆ្លងដែនដែលត្រូវបានដាក់ឱ្យដំណើរការប្រកបដោយជោគជ័យនៅថ្ងៃនេះ គឺដោយសារកិច្ចសហប្រតិបត្តិការដ៏រឹងមាំពីគ្រប់ភាគីពាក់ព័ន្ធរបស់ប្រទេសទាំងពីរ ដែលរួមមានទាំងធនាគារជាតិនៃកម្ពុជា ក្រុមហ៊ុន PayAlex ធនាគារ មេឃប៊ែង ដែលជាធនាគារទំនាក់ទំនង រួមទាំងគ្រឹះស្ថាន ជាសមាជិកពីប្រទេសទាំងពីរផងដែរ។

សម្រាប់ដំណាក់កាលបន្ទាប់ ប្រជាជនមកពីប្រទេសម៉ាឡេស៊ីនឹងអាចធ្វើការទូទាត់ទំនិញ និងសេវាទៅកាន់ពាណិជ្ជករនៅក្នុងប្រទេសកម្ពុជា ដោយស្កេន ខេអេចយ្យូអរកួត (KHOR Code) តាមរយៈការប្រើប្រាស់កម្មវិធីធនាគារចល័តរបស់គ្រឹះស្ថានធនាគារជាសមាជិក។

គំនិតផ្តួចផ្តើមនៃការតភ្ជាប់ការទូទាត់តាមយ្យអរកួតនេះ នឹងផ្តល់លទ្ធភាពឱ្យពាណិជ្ជករជាង ៥ លានទីតាំងនៅក្នុងប្រទេសកម្ពុជា និងប្រទេសម៉ាឡេស៊ី ដែលភាគច្រើនជាអាជីវកម្មខ្នាតតូច អាចទទួលបានអតិថិជនកាន់តែទូលំទូលាយពីប្រទេសទាំងពីរ។ ការណ៍នេះ នឹងគាំទ្រដល់សកម្មភាពពាណិជ្ជកម្ម ជំរុញវិស័យទេសចរណ៍ និងកំណើនសេដ្ឋកិច្ចនៃប្រទេសទាំងពីរ។ ព្រឹត្តិការណ៍ដ៏សំខាន់នេះ ក៏ឆ្លុះបញ្ចាំងពីចក្ខុវិស័យរួមរបស់អាស៊ាន និងគោលបំណងនៃគំនិតផ្តួចផ្តើមការតភ្ជាប់ការទូទាត់ក្នុងតំបន់សម្រាប់សមាហរណកម្មហិរញ្ញវត្ថុកាន់តែទូលំទូលាយ និងជំរុញការអភិវឌ្ឍសេដ្ឋកិច្ចប្រកបដោយបរិយាបន្ន។

ឯកឧត្តម Dato’ Seri Abdul Rasheed Ghaffour ទេសាភិបាលធនាគារកណ្តាលម៉ាឡេស៊ី បានមានប្រសាសន៍ថា កិច្ចសហការនេះនឹងធ្វើឱ្យប្រទេសទាំងពីរខិតជិតទៅរកការសម្រេចបាននូវចក្ខុវិស័យនៃប្រព័ន្ធទូទាត់សងប្រាក់ដែលមានភាពប្រទាក់ក្រឡាគ្នា និងប្រកបដោយភាពងាយស្រួល រវាងប្រទេសកម្ពុជា និងប្រទេសម៉ាឡេស៊ី។

ឯកឧត្តម បានថ្លែងបន្តថា តាមរយៈការតភ្ជាប់ការទូទាត់តាមយ្យូអរកូត ប្រតិបត្តិការទូទាត់ឆ្លងដែនរវាងប្រទេសទាំងពីរនឹងធ្វើឡើងកាន់តែឆាប់រហ័ស និងមានប្រសិទ្ធភាពជាងមុន ដែលផ្តល់នូវអត្ថប្រយោជន៍យ៉ាងសំខាន់ដល់នីតិបុគ្គល និងពាណិជ្ជកររាប់លាននៅក្នុងប្រទេសទាំងពីរ។

ឯកឧត្តម បានគូសបញ្ជាក់ថា គំនិតផ្តួចផ្តើមនេះមិនត្រឹមតែគាំទ្រដល់ការជំរុញសេដ្ឋកិច្ចនីជីថលប៉ុណ្ណោះទេ ប៉ុន្តែថែមទាំងជំរុញសកម្មភាពសេដ្ឋកិច្ចនៅទូទាំងតំបន់ ដោយប្រើប្រាស់លើភាពងាយស្រួល និងប្រសិទ្ធភាពនៃការទូទាត់តាមយ្យអរកួត។ ធនាគារកណ្តាលទាំងពីរ នៅតែបន្តការប្តេជ្ញាចិត្តជំរុញសមាហរណកម្មសេដ្ឋកិច្ច និងហិរញ្ញវត្ថុកាន់តែប្រសើរនៅក្នុងសហគមន៍អាស៊ានដោយសហការយ៉ាងជិតស្និទ្ធជាមួយដៃគូក្នុងតំបន់ ក្នុងការបង្កើនប្រសិទ្ធភាព និងសុវត្ថិភាពសេវាហិរញ្ញវត្ថុឌីជីថល។

ថ្លែងក្នុងពិធីនោះផងដែរ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានមានប្រសាសន៍ថា ព្រឹត្តិការណ៍នាថ្ងៃនេះ គឺជាសមិទ្ធផលដ៏សំខាន់មួយ ដែលឆ្លុះបញ្ចាំងពីកិច្ចសហប្រតិបត្តិការដ៏រឹងមាំរវាងធនាគារកណ្តាលទាំងពីរ និងភាគីពាក់ព័ន្ធនៃប្រទេសទាំងពីរ។

លោកជំទាវបណ្ឌិត មានប្រសាសន៍បន្តថា ការទូទាត់ឆ្លងដែននេះដើរតួនាទីយ៉ាងសំខាន់ក្នុងការជំរុញសកម្មភាពពាណិជ្ជកម្ម និងបរិយាបន្នហិរញ្ញវត្ថុនៅក្នុងប្រទេសទាំងពីរ ដែលបង្ហាញពីជំហានដ៏សំខាន់មួយឆ្ពោះទៅរកការសម្រេចបាននូវចក្ខុវិស័យនៃសហគមន៍អាស៊ាន ក្នុងការតភ្ជាប់ប្រព័ន្ធទូទាត់រាយ ដែលមានភាពរហ័ស ប្រសិទ្ធភាព និងសុវត្ថិភាព៕