សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោធិ៍សាត់ ៖ ជាទូទៅនៅពេលបច្ចុប្បន្ននេះ បើនិយាយពីការលក់ដូរចំណីអាហារមិនថានៅតំបន់ក្រុង ឬតាមបណ្តាខេត្តនោះទេ ភាគច្រើនអាជីវករតែងមានទំនោរប្រើប្រាស់ចាន់ស្នោរ ឬថង់ប្លាស្ទិកសម្រាប់វេចខ្ចប់លក់ជូនអតិថិជនដោយហេតុថា មានភាពងាយស្រួល និងលឿនរហ័ស ប៉ុន្តែពួកគាត់ហាក់មិនបានគិតគូរទៅដល់ផលប៉ះពាល់បរិស្ថាន និងសុវត្ថិភាពចំណីអាហារនោះទេ។ ដោយឡែក ងាកមកចាប់អារម្មណ៍ជាមួយនឹងអាជីវករម្នាក់ដែលជាអ្នកលក់នំចំហុយវេចដោយស្លឹកចេក រស់នៅខេត្តពោធិ៍សាត់ បែរជាជ្រើយកស្លឹកខ្លុងមកខ្ចប់នំជំនួសឱ្យការប្រើប្លាស្ទិក ហើយអាចការពារបរិស្ថានថែមទៀតផង។
អ្នកស្រី ស គឹមសាន ជាអាជីវករវេចនំចំហុយលក់ម្នាក់រស់នៅឃុំប្រមោយ ស្រុកវាលវែង ខេត្តពោធិ៍សាត់ បានមានប្រសាសន៍ឱ្យដឹងថា សម្រាប់អាជីវកម្មវេចនំចំហុយលក់នេះមិនមានទំហំធំធេងនោះទេ ពោលគឺនៅថ្ងៃធម្មតា វេចលក់ជាលក្ខណៈគ្រួសារខ្នាតតូច ដែលអាចរកចំណូលបានប្រចាំថ្ងៃប្រមាណ ៣-៤ម៉ឺនរៀលតែប៉ុណ្ណោះ លើកលែងតែមានការកុម្ម៉ង់តាមកម្មវិធីផ្សេងៗដែលអាចវេចចំនួនច្រើន ហើយប្រាក់ចំណូលក៏បានច្រើនតាមហ្នឹងដែរ។
អ្នកស្រីបានមានប្រសាសន៍បន្តថា ៖
“តាមធម្មតា នំខ្ញុំវេចលក់រាល់ថ្ងៃ ប៉ុន្តែមានចំនួនតិចតែប៉ុណ្ណោះ ព្រោះលក់នៅផ្ទះ ឬឱ្យកូនដើរលក់នៅក្នុងភូមិ លើកលែងតែមានគេកម្ម៉ង់ច្រើន ទើបបង្កើនការវេចតាមការចង់បាន។ ប៉ុន្តែអ្វីដែលប្លែក គឺការវេចខ្ចប់ដែលឆ្អិនយកជូនអតិថិជន គឺខ្ញុំមិនប្រើប្រាស់ប្រអប់ ឬថង់ប្លាស្ទិកនោះទេ ពោលគឺខ្ញុំច្នៃយកស្លឹកខ្លុងមកខ្ចប់ ហើយចង់ដោយខ្សែសង្វារចេក ដែលមានស្រាប់នៅក្នុងតំបន់”
អ្នកស្រីបន្តថា ៖
“កាលដែលខ្ញុំធ្វើបែបនេះ អាចកាត់បន្ថយចំណាយលើការទិញប្រអប់ ឬថង់ប្លាស្ទិក ព្រោះទាំងស្លឹកខ្លុង និងខ្សែសង្វារចេកសុទ្ធតែអាចរកបានដោយខ្លួនឯង។ ចំពោះស្លឹកខ្លុងត្រូវចូលទៅរកបេះនៅក្នុងព្រៃ ដោយឡែកខ្សែសង្វារចេក គឺយកស្រទបចេកច្រៀក ហើយហាលថ្ងៃជាការស្រេច។ ការធ្វើបែបនេះ ក៏បានចូលរួមកាត់បន្ថយការប្រើប្លាស្ទិក ថែរក្សាបរិស្ថាន រក្សាសុវត្ថិភាពចំណីអាហារ ហើយក៏មានសោភ័ណភាពផងដែរ”
ពាក់ព័ន្ធនឹងការប្រើប្រាស់ស្លឹកខ្លុងនេះដែរ អ្នកស្រីបានបន្តឱ្យដឹងថា ៖
“ខ្ញុំមិនមែនទើបតែប្រើនោះទេ ពោលគឺស្លឹកនេះគេនិយមប្រើតាំងពីជំនាន់មុនតាំងពីពេលមិនទាន់មានថង់ប្លាស្ទិក ដោយសារស្លឹកនេះមានសភាពធំ និងក្រាស់ល្អ ដែលគេអាចយកទៅខ្ចប់ម្ហូបអាហារបានយ៉ាងងាយស្រួល គ្រាន់តែថា មុនពេលយកទៅខ្ចប់ គេត្រូវសកយកទ្រនុងស្លឹកចេញសិន”
គួរបញ្ជាក់ថា ចំពោះប្រភេទនំដែលអ្នកស្រី ស គឹមសាន វេចលក់ជាប្រចាំរួមមានដូចជា នំគម នំបត់ នំអន្សមដូង នំអន្សមចេក និងបាយទ្រាប ជាដើម។ ក្រៅពីវេចលក់ប្រចាំថ្ងៃ អ្នកស្រីក៏ទទួលការកុម្ម៉ង់សម្រាប់កម្មវិធីបុណ្យទាន ក៏ដូចជាជប់លៀង និងពិធីមង្គលការផងដែរ ខណៈដែលជំនាញជាអ្នកវេចនំបែបខ្មែរទាំងនេះ អ្នកស្រីបានរៀនចេះតាំងពីក្មេងមកម្ល៉េះ៕
Account
Security
Favourite Content