សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា អ៊ីរ៉ាក់បានហាមឃាត់ធនាគារពាណិជ្ជក្នុងស្រុកចំនួន ៨ ពីការចូលរួមក្នុងប្រតិបត្តិការប្រាក់ដុល្លារអាម៉េរិក ដើម្បីកាត់បន្ថយការក្លែងបន្លំ ការលាងលុយកខ្វក់ និងការប្រើប្រាស់រូបិយប័ណ្ណអាម៉េរិកខុសច្បាប់ផ្សេងទៀតប៉ុន្មានថ្ងៃបន្ទាប់ពីដំណើរទស្សនកិច្ចរបស់មន្ត្រីរតនាគារកំពូលរបស់សហរដ្ឋអាម៉េរិក។
ទន្ទឹមនឹងនេះ ប្រាក់ដុល្លារអាម៉េរិក គឺជាប្រភពសំខាន់នៃរូបិយប័ណ្ណរឹងនៅក្នុងអ៊ីរ៉ាក់ដែលពឹងផ្អែកលើការនាំចូល ប៉ុន្តែធនាគារទាំងនោះត្រូវបានហាមឃាត់ពីការដេញថ្លៃប្រាក់ដុល្លារប្រចាំថ្ងៃរបស់ធនាគារកណ្តាលអ៊ីរ៉ាក់ដើម្បីផ្តោតសំខាន់លើយុទ្ធនាការរបស់អាម៉េរិកប្រឆាំងនឹងការរត់ពន្ធលុយទៅកាន់ប្រទេសអ៊ីរ៉ង់។
ក្នុងនាមជាសម្ព័ន្ធមិត្តដ៏កម្រមួយរបស់សហរដ្ឋអាម៉េរិក អ៊ីរ៉ង់មានទុនបម្រុងជាង ១០០ ពាន់លានដុល្លារដែលមើលខុសត្រូវដោយសហរដ្ឋអាម៉េរិក ហើយអ៊ីរ៉ាក់ពឹងផ្អែកយ៉ាងខ្លាំងលើសុច្ឆន្ទៈរបស់ទីក្រុងវ៉ាស៊ីនតោន ដើម្បីធានាថា លទ្ធភាពទទួលបានប្រេង និងហិរញ្ញវត្ថុមិនត្រូវបានរារាំង។ ស្របពេលនេះដែរ ធនាគារដែលត្រូវបានហាមឃាត់រួមមាន៖ Ahsur International Bank for Investment, Investment Bank of Iraq, Union Bank of Iraq, Kurdistan International Islamic Bank for Investment and Development, Al Huda Bank, Al Janoob Islamic Bank for Investment and Finance, Arabia Islamic Bank, និង Hammurabi Commercial Bank ។
ប្រធានសមាគមធនាគារឯកជនរបស់អ៊ីរ៉ាក់ ដែលតំណាងឱ្យធនាគារដែលពាក់ព័ន្ធទាំងនោះមិនបានឆ្លើយតបភ្លាមៗ ឬមានការអត្ថាធិប្បាយនោះទេ។
អ្នកនាំពាក្យរតនាគារអាម៉េរិកបាននិយាយថា ពួកគេសូមសរសើរដល់ការបន្តអនុវត្តដោយធនាគារកណ្តាលអ៊ីរ៉ាក់ដើម្បីការពារប្រព័ន្ធហិរញ្ញវត្ថុអ៊ីរ៉ាក់ពីការរំលោភបំពាន ដែលនាំឱ្យធនាគារអ៊ីរ៉ាក់មានទំនាក់ទំនងហិរញ្ញវត្ថុអន្តរជាតិ។ នៅខែកក្កដា ឆ្នាំ២០២៣ អ៊ីរ៉ាក់បានហាមឃាត់ធនាគារចំនួន ១៤ មិនឱ្យធ្វើប្រតិបត្តិការប្រាក់ដុល្លារ ដែលជាផ្នែកមួយនៃការបង្ក្រាបកាន់តែទូលំទូលាយលើការរត់ពន្ធប្រាក់ដុល្លារទៅកាន់អ៊ីរ៉ង់តាមរយៈប្រព័ន្ធធនាគារអ៊ីរ៉ាក់។ ការសម្រេចចិត្តនេះបានកើតឡើងបន្ទាប់ពីមានការស្នើសុំពីក្រុងវ៉ាស៊ីនតោន។ យ៉ាងណាមិញ ធនាគារដែលត្រូវបានហាមឃាត់ពីប្រតិបត្តិការប្រាក់ដុល្លារទាំងនោះ ត្រូវបានអនុញ្ញាតឱ្យបន្តប្រតិបត្តិការក្នុងរូបិយប័ណ្ណផ្សេងទៀត។
កាលពីសប្តាហ៍មុន មន្ត្រីដាក់ទណ្ឌកម្មកំពូលរបស់រតនាគារជាតិសហរដ្ឋអាម៉េរិក លោក Brian Nelson បានជួបជាមួយនឹងមន្ត្រីកំពូលអ៊ីរ៉ាក់នៅទីក្រុងបាកដាដ ដោយពិភាក្សាអំពីរបៀបការពារប្រព័ន្ធហិរញ្ញវត្ថុអ៊ីរ៉ាក់ និងអន្តរជាតិពីឧក្រិដ្ឋជន ក៏ដូចជាភេរវករ។ ក្នុងអំឡុងដំណើរទស្សនកិច្ច រតនាគារអាម៉េរិកបានប្រកាសចំណាត់ការប្រឆាំងនឹងធនាគារ Al-Huda ដោយចោទប្រកាន់ធនាគារនេះជាប់ពាក់ព័ន្ធក្នុងការបង្វែរប្រាក់រាប់ពាន់លានដុល្លារទៅកាន់ក្រុមដែលគាំទ្រដោយអ៊ីរ៉ង់។ ទីក្រុងវ៉ាស៊ីនតោនរំពឹងថា អ៊ីរ៉ាក់នឹងធ្វើបន្ថែមទៀត ដើម្បីជួយទប់ទល់នឹងក្រុមប្រដាប់អាវុធដែលគាំទ្រដោយអ៊ីរ៉ង់ បន្ទាប់ពីការសម្លាប់ទាហានអាម៉េរិកចំនួន ៣ នាក់។
បច្ចុប្បន្ននេះ រដ្ឋាភិបាលអ៊ីរ៉ាក់ឡើងកាន់អំណាចដោយមានការគាំទ្រពីភាគីដ៏មានអំណាចដែលគាំទ្រដោយអ៊ីរ៉ង់ និងក្រុមប្រដាប់អាវុធដែលមានផលប្រយោជន៍នៅក្នុងសេដ្ឋកិច្ចក្រៅផ្លូវការខ្ពស់របស់អ៊ីរ៉ាក់ រួមទាំងវិស័យហិរញ្ញវត្ថុដែលត្រូវបានគេមើលឃើញថាជាចំណុចក្តៅនៃការលាងលុយកខ្វក់។ យ៉ាងណាមិញ បណ្តាមន្ត្រីលោកខាងលិចបានសរសើរកិច្ចសហប្រតិបត្តិការរបស់នាយករដ្ឋមន្ត្រីអ៊ីរ៉ាក់ លោក Mohammed Shia al-Sudani ឆ្ពោះទៅរកការកែទម្រង់សេដ្ឋកិច្ច និងហិរញ្ញវត្ថុ ដែលសំដៅទប់ស្កាត់លទ្ធភាពរបស់អ៊ីរ៉ង់ និងសម្ព័ន្ធមិត្តក្នុងការទទួលបានប្រាក់ដុល្លារ និងនាំសេដ្ឋកិច្ចអ៊ីរ៉ាក់ឱ្យស្របតាមស្តង់ដារអន្តរជាតិ៕
Account
Security
Favourite Content