សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាត់ដំបង៖ តំបន់ជើងភ្នំសំពៅ ហាក់កំពុងមានប្រជាប្រិយភាព ពិសេសនាវេលាល្ងាច ដែលគេតែងតែទៅទស្សនាទិដ្ឋភាពថ្ងៃលិចនៅជើងភ្នំដ៏ស្រស់ស្អាត រួមជាមួយនឹងហ្វូងប្រជៀវចេញពីរូងផងដែរ។ ទាំងនេះជាឱកាសល្អមួយសម្រាប់អាជីវករនៅតំបន់នោះ ដែលអាចដាក់លក់អាហារសម្រន់សម្រាប់អ្នកទេសចរ អាចរកចំណូលបាន ដោយមិនចាំបាច់ទៅធ្វើការចំណាកស្រុកផងដែរ។
អ្នកស្រី មាន សុខណា អាជីវករលក់ដូរនៅជើងភ្នំសំពៅខាងកើត ខេត្តបាត់ដំបង បានមានប្រសាសន៍ប្រាប់ AMS ឱ្យដឹងថា ៖
“យើងលក់ដូរតិចតួចនៅជើងភ្នំសំពៅ គ្រាន់នឹងបានចំណូលខ្លះផ្គត់ផ្គង់គ្រួសារ ជាជាងពេលដែលចេញទៅធ្វើការនៅប្រទេសជិតខាងឃ្លាតឆ្ងាយគ្រួសារ និងកូនកំពុងរៀន។”
អ្នកស្រីបន្តថា យើងមានលក់អាហារសម្រន់ដូចជា ពងទាកូន ខ្យងអាំង ពោះគោជាដើម សម្រាប់ភ្ញៀវទេសចរមកលេងភ្នំសំពៅ ដែលជាមធ្យមអាចរកចំណូលបានប្រមាណ ១០ម៉ឺនរៀលដែរ ក្នុងមួយល្ងាច។ ចំណែកអ្នកដែលនិយមមកទទួលទានកន្លែងនេះ ភាគច្រើនជាភ្ញៀវទេសចរមកពីតាមខេត្តនានា ហើយខ្លះទៀតក៏មានជនបរទេសថែមទៀតផង។
សម្រាប់ពេលវេលាក្នុងការរៀបចំលក់វិញ អ្នកស្រីរៀបរាប់ថា យើងរៀបចំចាប់ពីម៉ោង ៣ រសៀលទៅ ដោយសារយើងចាប់ផ្ដើមលក់នៅចន្លោះម៉ោង ៤-៥ ល្ងាចប៉ុណ្ណោះ ព្រោះវាជាម៉ោងដែលគេនិយមមកទស្សនាហ្វូងប្រជៀវនៅជើងភ្នំ។ ចំណែកផលលំបាក គឺមិនសូវមាននោះទេ ដោយសារតែវាជាអាជីវកម្មតូចមួយក្បែរជើងភ្នំ ហើយអាហារសម្រាប់លក់ យើងក៏អាចចម្អិនងាយៗ ដោយខ្លួនឯងប្រចាំថ្ងៃ អ្វីដែលពិបាក គឺថ្ងៃខ្លះមេឃភ្លៀងមិនសូវមានភ្ញៀវទេសចរផ្ទាល់តែម្ដង។
គួរបញ្ជាក់ដែរថា អ្នកស្រីបានចាប់ផ្ដើមអាជីវកម្មនេះប្រមាណ ៦ ឆ្នាំមកហើយ ដែលស្ថានភាពបច្ចុប្បន្នរាងប្រសើរជាងមុន ពោលគឺមានភ្ញៀវមកជាហូរហែ ពិសេសថ្ងៃចុងសប្ដាហ៍ និងថ្ងៃបុណ្យទាន ដែលគេនិយមមកលេងកម្សាន្តនៅខេត្តបាត់ដំបង ឯថ្ងៃធម្មតាក៏មានភ្ញៀវឈានចូលមកលេងតិចតួចដែរ។
ចុងក្រោយ អ្នកស្រីក៏មានមតិដែរថា ទោះបីអាជីវកម្មនេះរកចំណូលបានមិនទៀងទាត់ អាស្រ័យតាមថ្ងៃក្ដី តែវាក៏ជាអាជីវកម្មសុចរិត ចំណាយពេលត្រឹមមួយល្ងាច ហើយយើងក៏មិនចាំបាច់ចេញទៅធ្វើការនៅប្រទេសជិតខាង និងនៅឆ្ងាយពីគ្រួសារដូចមុន៕
Account
Security
Favourite Content