សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពិធីបុណ្យចូលឆ្នាំថ្មីប្រពៃណីជាតិខ្មែរ គឺជាបុណ្យដ៏ធំ និងមានសារសំខាន់ដែលប្រជាជនខ្មែរនៅទូទាំងប្រទេស ក៏ដូចជាអ្នកដែលរស់នៅក្រៅប្រទេសមួយចំនួនតែងនាំគ្នារៀបចំប្រារព្វមិនដែលខនខានជាមួយនឹងតុបតែងលម្អនៅតាមលំនៅដ្ឋាន ស្ថាប័នរដ្ឋ – ឯកជន យ៉ាងស្រស់ស្អាត និងទទួលបានការអនុញ្ញាតឱ្យមានថ្ងៃឈប់សម្រាកពីការងារចំនួន៣ថ្ងៃជាប់គ្នាផងដែរ។
នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរនេះផងដែរ ងាកទៅចាប់អារម្មណ៍ជាមួយនឹងការរៀបចំតុបតែងលម្អទាំងនៅតាមលំនៅដ្ឋាន នៅតាមស្ថាប័នរដ្ឋ និងឯកជន ក៏ដូចជានៅតាមតំបន់ គេតែងរំលេចជាមួយនឹងការដាក់ចងព្យួរគោមផ្កាយដោយមានពន្លឺនៅខាងក្នុង ត្បិតគេយល់ថាបានបង្ហាញពីអត្ថន័យនាំមកនូវសេចក្ដីសុខសិរីជ័យមង្គលដ៏ល្អនៅក្នុងឆ្នាំថ្មី។ ចំពោះគោមផ្កាយនេះទៀតសោត ត្រូវបានគេរចនាឡើងច្រើនម៉ូត ច្រើនទំហំ និងមានពណ៌ប្លែកៗ ទៅតាមចំណង់ចំណូលចិត្តរៀងខ្លួន ដោយជួនកាលគេប្រើគោមទោលមួយមានទំហំធំជាងគេ ព្យួរនៅមុខក្លោងទ្វារផ្ទះ ឬនៅកណ្តាលភូមិ សម្រាប់ទុកជាតំណាងបណ្តូលនៃការជួបជុំ ប្រារព្ធបុណ្យចូលឆ្នាំ។
ថែមលើនេះ ការព្យួរគោមក៏មានគោលបំណងសំខាន់ៗមួយចំនួនទៀតដែរ ដូចជាជួយបំភ្លឺផ្លូវឱ្យមើលឃើញច្បាស់សម្រាប់អ្នកធ្វើដំណើរពេលយប់ប្រកបដោយដោយសុវត្ថិភាពនិងរីករាយក្នុងចិត្ត។ ដោយឡែកចំពោះការដាក់ក្នុងផ្ទះសម្បែងក៏កាន់តែបង្កើនសោភ័ណភាពយ៉ាងស្រស់ស្អាត និងចាត់ទុកជាសក្ខីភាពនៃការជូនពរជ័យពីទេវតាឆ្នាំថ្មីយាងចុះមកដល់ផែនដីឲ្យមនុស្សផងទាំងពួងមានរាសីខ្ពស់ ជោគជតាល្អគ្រប់ៗគ្នា។ ម្យ៉ាងវិញទៀត បើតាមជំនឿបែបអរូបិយយល់ថា មនុស្សយើងសុទ្ធតែទទួលឥទ្ធិពលពីផ្កាយនពគ្រោះ រួមមានភពអាទិត្យ ភពព្រះច័ន្ទ ភពអង្គារ ភពពុធ ភពព្រហស្បតិ៍ ភពសុក្រ និងភពសៅរ៍ ដែលមានការចែកវេនគ្នាបំភ្លឺពេលថ្ងៃ និងយប់ ហេតុនេះនៅពេលណាមនុស្សលោកបាត់បង់ពន្លឺពីភពផែនទាំងនេះ គេរស់នៅពុំមានសិរីមង្គលឡើយ។
ក្រៅពីការតុបតែងដោយការចងព្យួរគោមផ្កាយដូចដែលបានលើកឡើងខាងលើនេះ គេក៏ឃើញមានការនិយមយកឧបករណ៍ និងសម្ភារៈប្រើប្រាស់ប្រចាំថ្ងៃបែបប្រពៃណីខ្មែរមកតុបតែងលម្អផងដែរ ជាពិសេសនៅតាមទីតាំងរៀបចំសង្ក្រាន្ត ដូចជា ក្រមា មួកស្លឹកត្នោត ទ្រូ ឈ្នាង អង្រត់ កញ្ច្រែង ល្អី ទាំងទំហំតូច និងទំហំធំ ដើម្បីរំលឹកដល់បងប្អូនប្រជានេសាទ ក៏ដូចជាបងប្អូនប្រជាកសិករដែលបង្ករបង្កើនផលដាំដុះផងដែរ។ យ៉ាងណាក៏ដោយ គ្រប់ការរៀបចំតុបតែងលម្អនៅក្នុងពិធីដ៏ធំប្រចាំឆ្នាំរយៈពេល៣យប់៣ថ្ងៃនេះ ក៏បានផ្តល់ផលចំណូលដល់អ្នកផលិតសម្ភារៈ និងឧបករណ៍ដែលធ្វើឡើងដោយដៃដូចដែលបានរៀបរាប់ខាងលើនេះ ហើយអាជីវករដែលទិញយកមកលក់បន្តក៏ទទួលបានផលចំណេញដូចគ្នា ត្បិតថាតម្រូវការមានការកើនឡើងខ្ពស់ជាងថ្ងៃធម្មតា៕
Account
Security
Favourite Content