សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាសក់ផ្អែម មានឈ្មោះជាភាសាអង់គ្លេស Cantaloupe (Muskmelon) ជាប្រភេទដំណាំយកផ្លែថ្មីមួយ ដែលបាននាំចូលមកដាំដុះជាងមួយទសវត្សរ៍មកហើយនៅកម្ពុជា ហើយប្រជាជនទូទៅចាប់ផ្តើមស្គាល់ និងដឹងពីរសជាតិផ្អែមឈ្ងុយរបស់វា។ ដំណាំប្រភេទនេះងាយស្រួលក្នុងការដាំដុះ និងឆាប់ទទួលបានផលថែមទៀតផង។
លោក លោក នី ប៊ុនថា មានទីលំនៅស្រុកស្រែអំបិល ខេត្តកោះកុង និងជាស្ថាបនិក «រៀនដាំ» មានជំនាញផ្នែកកសិកម្ម និងជាអ្នកចូលចិត្តធ្វើវីដេអូផ្តល់ចំណេះដឹងកសិកម្មផងដែរនោះ បានមានប្រសាសន៍ឱ្យដឹងថា ដំណាំតាសក់ផ្អែមជាដំណាំងាយស្រួលដាំ ដែលអាចដាំដុះបានទាំងលក្ខណៈអាជីវកម្ម ឬក៏លក្ខណៈគ្រួសារខ្នាតតូច ហើយថែមទាំងមានទីផ្សារខ្ពស់ លក់បានតម្លៃថ្លៃគួរសមផងដែរ។
លោកបន្ថែមថា តម្លៃតាសក់ផ្អែមគេអាចលក់បានចន្លោះពី ៥ ០០០ ទៅដល់ ១២ ០០០រៀលក្នុងមួយគីឡូក្រាម ឬបងប្អូនខ្លះអាចលក់ជាផ្លែចន្លោះពី ២-៥ ដុល្លារក្នុងមួយផ្លែផងដែរ ហើយគេក៏អាចដាំជាលក្ខណៈគ្រួសារក្នុងសួនបន្លែក៏អាចដាំបាន ដោយពុំចាំបាច់ត្រូវការដីចំការធំៗនោះ។
ចំណែកការប្រមូលផលតាសក់ផ្អែមខុសៗគ្នាទៅតាមពូជ ចន្លោះពី ៦៥ – ៧៥ ថ្ងៃ ដែលរាងយូរជាងតាសក់ធម្មតាបន្តិច អាស្រ័យលើការថែទាំ និងតាមលក្ខខណ្ឌទំហំចំការដោយការដាំលក្ខណៈអាជីវកម្មគេមានប្រើជីគីមីបន្ថែមទៀត តែសម្រាប់ទំហំតូចគេអាចប្រើជីកំប៉ុស្តិ៍ដែលបានមកពីការកែច្នៃកាកសំណល់ផ្សេងៗកាន់តែប្រសើរ។
តាសក់ផ្អែមដាំដុះដោយប្រើទ្រើង ឬចំណារស្រដៀងនឹងតាសក់ចំណារដែល ប៉ុន្តែផ្លែវាមានរាងមូលៗស្រដៀងទៅនឹងផ្លែឪឡឹក។ តាសក់ប្រភេទនេះ ជាដំណាំត្រូវការពន្លឺថ្ងៃគ្រប់គ្រាន់សម្រាប់ការលូតលាស់ ហើយងាយរងជំងឺ និងសត្វល្អិតបំផ្លាញ។ យ៉ាងណាក៏ដោយ បើទោះបីវាជាដំណាំដែលអាចដាំដុះបានពេញមួយឆ្នាំ ប៉ុន្តែរដូវកាលដែលល្អសម្រាប់ដាំដុះ គឺនៅរដូវប្រាំងព្រោះថារដូវវស្សាកសិករច្រើនជួបប្រទះបញ្ហា។ គេច្រើនដាំវានៅចុងរដូវវស្សា ឬនៅពេលទឹកភ្លៀងចាប់ផ្តើមអស់ និងស្រកទឹក ពោលគឺចាប់ពីខែវិច្ឆិកា ដល់ខែកុម្ភៈ ដែលអាចប្រមូលផលនៅកំឡុងខែមករា ដល់ខែមេសា។
បើដាំដុះលើដីល្បាយខ្សាច់ តាសក់នឹងផ្តល់ផ្លែតូច តែស្រួយ និងផ្អែមជាងដីល្បាប់កណ្តេង ហើយដើម្បីឱ្យទទួលបានផល និងគុណភាពល្អ កសិករគួរប្រើប្រាស់ជីកំប៉ុស្តិ៍បីប្រភេទគឺកំប៉ុស្តិ៍គោក កំប៉ុស្តិ៍ទឹកបំប៉នស្លឹកដើម និងកំប៉ុស្តិ៍ទឹកជំនួយឱ្យផ្លែផ្អែម។
គូសបញ្ជាក់ផងដែរថា ក្រៅពីមានរសជាតិផ្អែមឈ្ញុយឆ្ងាញ់ ត្រសក់ផ្អែមមានអត្ថប្រយោជន៍យ៉ាងច្រើនដូចជាសំបូរប៉ូតាស្យូមដែលអាចរារាំងការកើនឡើននូវសម្ពាធឈាម ជួយដល់សុខភាពបេះដូង សំបូរជាតិសរសៃល្អសម្រាប់ការបន្ទោបង់ សំបូរប្រូតេអ៊ីនដែលហៅថាខូឡូចែនដែលអាចពន្យាភាពចាស់របស់ស្បែក សំបូរវីតាមីនអា និងបេតាការ៉ូទីនល្អសម្រាប់សុខភាពភ្នែក សំបូរការបូនអ៊ីដ្រាត និងអាចជួយការពារកំណរគ្រោះតម្រង់នោមបានថែមទៀតផង៕
Account
Security
Favourite Content