ស្ថិតនៅភូមិតាសី ឃុំតាម៉ឺន ស្រុកថ្មគោល ខេត្តបាត់ដំបង សហគមន៍តាសីសាមគ្គីបាន និងកំពុង​ទទួលបានការចាប់អារម្មណ៍ច្រើនពីសំណាក់ប្រជាពលរដ្ឋក្នុងតំបន់។ កន្លងមក សហគមន៍មួយនេះល្បីល្បាញទៅលើការផ្គត់ផ្គង់បន្លែសុវត្ថិភាពដែលដាំដុះនៅក្នុងផ្ទះសំណាញ់។

ចាប់តាំងពីឆ្នាំ២០១៧ រហូតមកដល់ពេលនេះ សហគមន៍បានពង្រីកសមាជិកជាបន្តបន្ទាប់​ទៅតាមបណ្តាខេត្តផ្សេងទៀតដូចជា ខេត្តព្រៃវែង កំពង់ចាម កំពង់ស្ពឺ និងខេត្តពោធិ៍សាត់ជាដើម។ ដោយឡែក ថ្មីៗនេះ សហគមន៍បានប្រកាសបើកវគ្គបណ្ដុះបណ្ដាលទៅដល់ប្រជាជនក្នុងស្រុក ប្រជាកសិករដែលមានបំណងចង់រៀនសូត្រពីការដាំដុះបន្លែសុវត្ថិភាព ជាពិសេសពលករចំណាក​ស្រុកដែលបានវិលត្រឡប់មកពីប្រទេសថៃ និងកំពុងព្រួយបារម្ភថាមិនមានការងារធ្វើនៅក្នុងស្រុក។

បើតាមលោក ណុប នុន ប្រធានសហគមន៍កសិកម្មតាសីសាមគ្គីបានឱ្យដឹងថា មូលហេតុ​ដែលនាំឱ្យលោក ក៏ដូចជាសហគមន៍ទាំងមូលផ្ដួចផ្ដើមគំនិតបើកវគ្គបណ្ដុះបណ្ដាលនេះគឺដោយសារតែកន្លងមក សហគមន៍បានប្រឈមនឹងកង្វះកម្លាំងពលកម្ម ដែលនាំឱ្យការផ្គត់ផ្គង់បន្លែសុវត្ថិភាពមិនគ្រប់តាមតម្រូវការទីផ្សារ។

បើតាមការគូសបញ្ជាក់ពីសំណាក់ប្រធានសហគមន៍ខាងលើ វគ្គបណ្ដុះបណ្ដាលបានប្រព្រឹត្តទៅ ១វគ្គហើយ និងបានបិទបញ្ចប់កាលពីថ្ងៃទី២៨ ខែកក្កដា ឆ្នាំ២០២៥ ថ្មីៗនេះ។ សម្រាប់វគ្គទី២ គឺកំពុងតែបណ្ដុះបណ្ដាលចំនួន ១៥ថ្ងៃ ដោយមានសិក្ខាកាមចូលរួម ៣០នាក់ ​ហើយគ្រោងនឹង​បន្តបណ្ដុះបណ្ដាលវគ្គទី៣ បន្តទៀត។

លោក ណុប នុន បានបន្តឱ្យដឹងថា៖​

«រយៈពេលនៃការបណ្ដុះបណ្ដាលនេះ គឺយើងធ្វើយ៉ាងណា​ឱ្យគាត់ដឹងពីរបៀបដាំដុះ និងវិធីសាស្ត្រ តាមដានសត្វល្អិត ជំងឺ និងការប្រើប្រាស់ធាតុចូល​មួយចំនួន ហើយបន្ទាប់ពីការបណ្ដុះបណ្ដាលទៅ យើងក៏នៅបន្តចុះទៅត្រួតពិនិត្យជាក់ស្ដែង និងពន្យល់​បន្ថែមដូចគ្នា ព្រោះ ១៥ថ្ងៃតិចពេក»។

ក្រៅពីការបណ្ដុះបណ្ដាលដោយឥតគិតថ្លៃទៅ សហគមន៍ក៏រ៉ាប់រងលើការស្នាក់នៅ ផ្តល់អាហារ ៣ពេល និងមានប្រាក់ឧបត្ថម្ភបន្ថែមផងដែរ ផ្អែកតាមចំណាត់ថ្នាក់ដែលសិក្ខាកាមទទួលបានក្នុងអំឡុងពេល នៃការសិក្សា។ មិនត្រឹមតែប៉ុណ្ណោះ ចប់ពីវគ្គបណ្ដុះបណ្ដាលទៅ សហគមន៍នឹងជួយរកការងារនៅតាមកសិដ្ឋាន ជាសមាជិកតាមបណ្ដាខេត្តផ្សេងៗ។ ជាក់ស្ដែង ក្រោយបញ្ចប់វគ្គទី១​ កាលពីថ្ងៃទី ២៨ កក្កដា សហគមន៍បានបញ្ជូនសិក្ខាកាមចំនួន ១០នាក់ ទៅកសិដ្ឋាននៅភ្នំតាម៉ៅ និង ១០នាក់ទៀតទៅ កសិដ្ឋាននៅក្នុងស្រុកស្វាយអន្ទរផ្ទាល់។

ជារឿយៗ សហគមន៍តែងតែបំផុសគំនិត បើកជាវេទិកាជួបជុំ រៀបចំដំណើរទស្សនកិច្ច និងវគ្គចែក រំលែកខ្លីៗ ទៅដល់ប្រជាកសិករ យុវជន និងសិស្សនិស្សិតជាដើម អំពីចំណេះដឹងកសិកម្មទំនើប និងការដាំដុះបែបវិលជុំ។ ក្នុងវគ្គនីមួយៗ មានការចូលរួមពីថ្នាក់ដឹកនាំសហគមន៍ មន្រ្តីបច្ចេកទេស និងអ្នកគ្រប់គ្រង​ការហាត់​ការ ដើម្បីធានាការបណ្ដុះបណ្ដាលដែលផ្សារភ្ជាប់នឹងការអនុវត្ត ក៏ដូចជា​បញ្ជ្រាបចំណេះដឹងស្ដីពីសារៈសំខាន់នៃបន្លែសុវត្ថិភាព។ យ៉ាងណាក៏ដោយ គោលបំណងធំបំផុតនៃការបង្កើតវគ្គចែករំលែកចំណេះដឹង វគ្គបណ្ដុះ​បណ្ដាល និងសកម្មភាពនានារបស់សហគមន៍ជាបន្តបន្ទាប់នេះគឺដោយសារ សហគមន៍ចង់​ឈានទៅបង្កើត​ផ្សារបោះដុំបន្លែសុវត្ថិភាព​ជុំវិញតំបន់​ជាប់បឹងទន្លេសាប ពង្រឹងសេដ្ឋកិច្ចតាមសហគមន៍ដែលជាការ​គាំទ្រគោលនយោបាយរបស់រាជ​រដ្ឋាភិបាល។

គួរបញ្ជាក់ថា សហគមន៍តាសីសាមគ្គី បាន និងកំពុងដាំដុះបន្លែជាច្រើនមុខដូចជា៖ ស្ពៃផ្កាខៀវ ផ្កាស ស្ពៃបូកគោ ស្ពៃក្រញាញ់ម៉ាឡេស៊ី ក្រញាញ់ផ្អែម ស្ពៃក្ដោប ខាត់ណាដើម ស្ពៃជើងទា ស្ពៃក្រញាញ់​ធម្មតា ស្ពៃខៀវ ជាដើម។ ដើម្បីធានាសុវត្ថិភាពបន្លែ សហគមន៍បានប្រើប្រាស់ផ្ទះសំណាញ់ សម្រាប់ការពារសត្វល្អិត និងជាពិសេសធានាការដាំដុះបានគ្រប់រដូវកាល។

គួរឱ្យដឹងផងដែរថា ខេត្តបានដំបងមានសហគមន៍សរុប ៨៣ សហគមន៍ តែសហគមន៍ដែលមាន​កម្រិត​ល្អមាន ២ សហគមន៍គឺសហគមន៍តាសីសាមគ្គី ក្នុងស្រុកថ្មគោល និងសហគគមន៍​ពន្លឺ​ពេជ្យចិន្តា ក្នុងស្រុក​ភ្នំព្រឹក។ ក្រៅពីនេះសហគមន៍ដែលមធ្យមគឺមាននៅក្នុង ស្រុកមោងឫស្សី ស្រុកបាណន់ និង ស្រុកបវេល (ជាសហគមន៍ផលិតពូជ)៕