សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា ប្រធានាធិបតីអាម៉េរិក លោក Donald Trump គ្រោងនឹងដំឡើងពន្ធអត្រាខ្ពស់លើការនាំចូលទំនិញពីឥណ្ឌា ពាក់ព័ន្ធនឹងករណីដែលប្រទេសនេះបន្តទិញប្រេងពីប្រទេសរុស្ស៊ី។
Donald Trump បានបង្ហោះនៅលើ Truth Social ថា ៖
«ឥណ្ឌាមិនត្រឹមតែទិញប្រេងពីរុស្ស៊ីក្នុងបរិមាណដ៏ច្រើននោះទេ ប៉ុន្តែពួកគេក៏ដាក់លក់ប្រេងទាំងនោះនៅលើទីផ្សារដោយបើកចំហដើម្បីទទួលបានប្រាក់ចំណេញដ៏ធំផងដែរ។ ពួកគេមិនខ្វល់ថា មានមនុស្សប៉ុន្មាននាក់នៅអ៊ុយក្រែនត្រូវបានសម្លាប់ដោយសារសង្រ្គាមរុស្ស៊ីនោះទេ ដោយសារតែបញ្ហានេះ ខ្ញុំនឹងត្រូវដំឡើងពន្ធលើឥណ្ឌា»។
យ៉ាងណាមិញ Trump មិនបានបញ្ជាក់លម្អិតពីអត្រាពន្ធដែលនឹងត្រូវបានដំឡើងនោះទេ ប៉ុន្តែកាលពីសប្តាហ៍មុន លោកបានប្រកាសពីផែនការដំឡើងពន្ធ ២៥% លើទំនិញដែលនាំចូលពីឥណ្ឌា ហើយ ប្រទេសនេះអាចនឹងប្រឈមមុខនឹងការពិន័យផងដែរ។ Trump បានលើកឡើងថា ការចរចាពាណិជ្ជកម្មជាមួយប្រទេសឥណ្ឌាកំពុងតែបន្ត ប៉ុន្តែត្រូវបានជាប់គាំងដោយសារការខ្វែងគំនិតគ្នាខាងភូមិសាស្ត្រនយោបាយ។ ទន្ទឹមនឹងនេះ ប្រភពពីរដ្ឋាភិបាលឥណ្ឌាបានបង្ហើបថា ឥណ្ឌានឹងបន្តទិញប្រេងពីរុស្ស៊ីដដែលបើទោះបីជាមានការគំរាមកំហែងពី Trump ក៏ដោយ។
កាលពីថ្ងៃចន្ទ ឥណ្ឌា បានច្រានចោលជាផ្លូវការនូវការរិះគន់ពីអាម៉េរិក និងសហភាពអឺរ៉ុប ដោយចាត់ទុកថា វាមិនសមហេតុផលដែលពួកគេកំណត់គោលដៅលើប្រទេសណាដែលនាំចូលប្រេងពីរុស្ស៊ី។ អ្នកនាំពាក្យក្រសួងការបរទេសរបស់ឥណ្ឌាលោក Randhir Jaiswal បាននិយាយនៅក្នុងសេចក្តីថ្លែងការណ៍មួយថា ៖ ឥណ្ឌានឹងចាត់វិធានការចាំបាច់ទាំងអស់ដើម្បីការពារផលប្រយោជន៍ជាតិ និងសន្តិសុខសេដ្ឋកិច្ច។ ការនាំចូលប្រេងរបស់ឥណ្ឌាគឺជាភាពចាំបាច់ដែលបង្ខំដោយសារស្ថានភាពទីផ្សារពិភពលោក។ នៅក្នុងសេចក្តីថ្លែងការណ៍ ឥណ្ឌាបញ្ជាក់ដែរថា ខ្លួនបានចាប់ផ្តើមទិញប្រេងពីរុស្ស៊ីក្នុងបរិមាណដ៏ច្រើន បន្ទាប់ពីបណ្តាញផ្គត់ផ្គង់មួយចំនួនត្រូវបានបង្វែរទៅអឺរ៉ុប ដោយសារជម្លោះរុស្ស៊ី-អ៊ុយក្រែន។
ថ្មីៗនេះ Trump បានរិះគន់អំពីតួនាទីរបស់ឥណ្ឌានៅក្នុងក្រុមប្រទេស BRICS ដោយហៅក្រុមនេះថាជាអរិភាពចំពោះផលប្រយោជន៍របស់អាម៉េរិក ប៉ុន្តែឥណ្ឌាបានច្រានចោលអំពីការរិះគន់នេះ ដោយលើកឡើថា ប្លុកនេះនឹងលើកកម្ពស់ផលប្រយោជន៍របស់ប្រទេសកំពុងអភិវឌ្ឍន៍។ មិនត្រឹមតែប៉ុណ្ណោះ មន្ត្រីឥណ្ឌាក៏បានសម្តែងការខកចិត្តចំពោះ Trump ម្តងហើយម្តងទៀត ដោយសារគាត់ទាមទារមុខមាត់សម្រាប់ការសម្របសម្រួលបទឈប់បាញ់រវាងឥណ្ឌា និងប៉ាគីស្ថានកាលពីខែឧសភា ខណៈដែលឥណ្ឌាអះអាងថាខ្លួនដោះស្រាយជម្លោះនេះទ្វេភាគី។ លើសពីនេះ Trump ដាក់សម្ពាធកាន់តែខ្លាំងឡើងលើឥណ្ឌា បន្ទាប់ពីលោកបានបង្ហាញពីសញ្ញានៃការដាក់ទណ្ឌកម្មថ្មីលើទីក្រុងមូស្គូ ប្រសិនបើប្រទេសនេះមិនឈានដល់កិច្ចព្រមព្រៀងសន្តិភាពជាមួយអ៊ុយក្រែន៕
Account
Security
Favourite Content