សៀមរាប ៖ គណៈប្រតិភូរៀបចំសន្និសីទស្វាយ​ចន្ទីពិភពលោក ក្នុងឱកាសចូលជួបសម្តែងការគួរសមជាមួយឯកឧត្តមរដ្ឋមន្ត្រីក្រសួងបរិស្ថាន បានកោតសរសើរចំពោះប្រទេសកម្ពុជា ដែលបានផលិតគ្រាប់ស្វាយចន្ទីមានគុណភាពល្អដាច់គេ ក្នុងទំហំជាង១ លានតោន ក្នុង ១ ឆ្នាំ ព្រមទាំងបានបង្ហាញពីអត្ថប្រយោជន៍ក្នុងការផ្សព្វផ្សាយវិស័យស្វាយចន្ទីកម្ពុជា ទៅកាន់សកលលោក។

ក្នុងជំនួបនេះផងដែរ គណៈប្រតិភូរៀបចំសន្និសីទស្វាយចន្ទីពិភពលោក រួមមាន ៖ លោក Srivat​sava G នាយកប្រតិបត្តិ និងលោក Vinayak Meharwade នៃក្រុមហ៊ុន Eventell Global Advisory Private Limited និងលោក អាន តារា ប្រធានក្រុមប្រឹក្សាភិបាលនៃសហព័ន្ធស្វាយចន្ទីកម្ពុជា បានពិភាក្សានិងប្រឹក្សាយោ​បល់ សុំគោលការណ៍ណែនាំ ពីឯកឧត្តម សាយ សំអាល់ ដើម្បីរៀបចំសន្និសីទស្វាយចន្ទីពិភពលោកឆ្នាំ ២០២៤ ដែលគ្រោងនឹងប្រព្រឹត្តទៅនៅលើទឹកដីអង្គរ ទីរួមខេត្តសៀមរាប។

លើសពីចំណីអាហារដែលជួយសុខភាពរបស់មនុស្ស ផលិតផលស្វាយចន្ទីអាចយកទៅកែច្នៃក្នុងគោលបំណងផ្សេងៗ រួមមាន សាច់ផ្លែស្វាយចន្ទីជាអេតាណុល សម្បកស្វាយចន្ទីចម្រាញ់ជាប្រេង ឬជីវឥន្ធនៈ កំទិចសម្បកដែលបានចម្រាញ់រួចជាប្រភពចំហេះយ៉ាងល្អក្នុងឧសហ្សាហកម្ម និងជាពិសេសជាងនេះទៅទៀតនោះដំណាំ និងផលិតផលស្វាយចន្ទីផ្តល់ឥណទានកាបូនខ្ពស់សម្រាប់ជួយចូលរួមកាត់បន្ថយបម្រែបម្រួលអាកាសធាតុបានយ៉ាងខ្លាំងផងដែរ។ នេះបើតាមការបញ្ចាក់របស់គណៈប្រតិភូរៀបចំសន្និសីទស្វាយចន្ទីពិភពលោក។

នាឱកាសនេះដែរ អង្គប្រជុំសង្ឃឹមយ៉ាងមុតមាំថា សន្និសីទស្វាយចន្ទីពិភពលោកឆ្នាំ ២០២៤ នឹងរួមចំណែកយ៉ាងសំខាន់ក្នុងការជួយរួមចំណែកគាំទ្រគោលនយោបាយជាតិស្វាយចន្ទី និងប្រសាសន៍របស់ សម្តេចតេជោ នាយករដ្ឋមន្ត្រី ដែលចង់ប្រែក្លាយប្រទេសកម្ពុជា ជាអធិរាជស្វាយចន្ទី ក្នុងការផលិតគ្រាប់ស្វាយចន្ទីទាំងបរិមាណ គុណភាព និងធ្វើការកែច្នៃនាំចេញទៅកាន់ទីផ្សារធំៗនៅលើពិភពលោក។

ទាក់ទិននឹងចំណុចនេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា ក៏ធ្លាប់បានប្តេជ្ញាយ៉ាងមោះមុតក្នុងការសហការជិតស្និទ្ធជាមួយអង្គភាពពាក់ព័ន្ធទាំងអស់ ដូចជាសហគមន៍ និងសហព័ន្ធស្វាយចន្ទីកម្ពុជា ក្រសួងពាណិជ្ជកម្ម និងធនាគារអភិវឌ្ឍន៍ជនបទ និងកសិកម្ម ធ្វើយ៉ាងណាអាចសម្រេចគោលដៅនេះឱ្យខានតែបាន ដើម្បីប្រែក្លាយកម្ពុជាជាអធិរាជស្វាយចន្ទីនាពេលអនាគត។
គួររំលឹកថា កម្ពុជាបាននឹងកំពុងផលិតស្វាយចន្ទីមានគុណភាពប្រកួតប្រជែងនៅទីផ្សារជាតិ និងអន្តរជាតិ ដែលការនាំចេញបានកើនឡើងជាបន្តបន្ទាប់ ទោះបីជាស្ថិតក្នុងស្ថានភាពនៃជំងឺកូវីដ-១៩ និងតម្រូវការផលិតផលកសិកម្មនាំចេញមានការថយចុះយ៉ាងណាក៏ដោយ។
បើយោងតាមរបាយការណ៍សភាពការណ៍កសិកម្ម របស់ក្រសួងកសិកម្មរុក្ខាប្រមាញ់ និងនេសាទ រយៈពេល០ ២ ខែ ក្នុងឆ្នាំ២០២៣ កម្ពុជាបាននាំចេញគ្រាប់ស្វាយចន្ទីសរុបចំនួន ១១៤ ១៩៣,៩៣ តោន ទៅកាន់ប្រទេសចំនួន០៤ គឺប្រទេសវៀតណាម (១១៤ ១៤០,៥៣តោន) ប្រទេសជប៉ុន(២៧តោន) ប្រទេសថៃ(២០តោន) និងប្រទេសកូរ៉េ (៦,៤០តោន)៕