ភ្នំពេញ ៖ ក្រុមហ៊ុនធំៗចំនួន៣ បានសម្លឹងឃើញឱកាសវិនិយោគនៅព្រះរាជាណាចក្រកម្ពុជាលើវិស័យថាមពល និងសេដ្ឋកិច្ចឌីជីថល ហើយបានមកស្វែងយល់ និងសុំការប្រឹក្សាយោបល់ពីរាជរដ្ឋាភិបាលកម្ពុជា។

ពាក់ព័ន្ធការវិនិយោគនេះ ក្រុមហ៊ុនចំនួន៣ រួមមានក្រុមហ៊ុន Management Venture Asia (Cambodia) ក្រុមហ៊ុន Toyo Ventures Holdings Berhad និងក្រុមហ៊ុន China Energy Engineering Investment Cooperation (CEEIC) ដឹកនាំដោយលោក Wang Honggang អគ្គនាយករងក្រុមហ៊ុន CEEIC នាព្រឹកថ្ងៃទី២៥ ខែមេសា ឆ្នាំ២០២៤ បានចូលជួបសម្ដែងការគួរសម និងពិភាក្សាការងារជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។

កិច្ចប្រជុំនានេះត្រូវបានរៀបចំឡើងស្របតាមសំណើសុំរបស់ក្រុមហ៊ុនក្នុងការចូលមកឈ្វេងយល់អំពីសក្ដានុពល និងឱកាសវិនិយោគនៅកម្ពុជា ក្នុងនោះ ក្រុមហ៊ុនមានចំណាប់អារម្មណ៍លើវិស័យសេដ្ឋកិច្ចឌីជីថល និងវិស័យថាមពល ពិសេសថាមពលកកើតឡើងវិញ។

ឯកឧត្តមឧបនាយករដ្ឋមន្ត្រី ស៊ុន ចាន់ថុល បានស្វាគមន៍ចំពោះបេសកកម្មរបស់ក្រុមហ៊ុនមកសិក្សាអំពីបរិយាកាសវិនិយោគរបស់កម្ពុជា។ ជាមួយគ្នានេះ ឯកឧត្តមឧបនាយករដ្ឋមន្ត្រី បានលើកឡើងអំពីហេតុផលសំខាន់ៗដែលក្រុមហ៊ុនគួរជ្រើសរើសកម្ពុជា ជាទីតាំងវិនិយោគ រាប់ចាប់ពីបរិយាកាសគាំទ្រវិនិយោគិនរបស់រដ្ឋាភិបាល សុខសន្តិភាព ស្ថិរភាពអតិផរណា ស្ថិរភាពអត្រាប្តូរប្រាក់ទីផ្សារកម្ពុជា និងការតភ្ជាប់ទីផ្សារទៅតំបន់ និងពិភពលោក ភាពបើកចំហនៃច្បាប់វិនិយោគដែលវិនិយោគិនបរទេសមានសិទ្ធជាម្ចាស់កម្មសិទ្ធិ១០០%នៃជំនួញរបស់ខ្លួននៅកម្ពុជា ក៏ដូចជាការយកចិត្តទុកដាក់រៀបចំហេដ្ឋារចនាសម្ព័ន្ធគាំទ្រ និងគម្រោងផែនការនានាដែលបាននិងកំពុងសាង់សង់ពេញផ្ទៃប្រទេសជាដើម។

គួរបញ្ជាក់ថា៖ មន្ត្រីជាន់ខ្ពស់​កម្ពុជា​នៅតែ​បន្ត​ផ្សព្វផ្សាយ​​ពីច្បាប់​វិនិយោគ​ថ្មី​នៃព្រះរាជា​ណា​ច​​ក្រ​កម្ពុជា​​ទៅដល់​បណ្ដាវិនិយោគិន​បរទេស​​ជា​បន្តបន្ទាប់ និងទទួលបាន​ការ​​វិនិយោគ​ថ្មីៗចូលមកកម្ពុជា​ជាច្រើន​គម្រោង​ផងដែរ ។ ជាក់ស្ដែង​បើតាម​របាយការណ៍​ស្ថិតិ​របស់​ក្រុមប្រឹក្សាអភិវឌ្ឍន៍កម្ពុជា​បាន​បង្ហា​ញ​ថា ​ក្នុង​រយៈពេល១ត្រីមាស​ដំបូង​ក្នុងឆ្នាំ ២០២៤​ ក្រុមប្រឹក្សា​អភិវឌ្ឍន៍​កម្ពុជា​បាន​ចុះបញ្ជី​គម្រោង​វិនិយោគ​ថ្មីនិង​​គម្រោងពង្រីក​ផលិតកម្ម​វិនិយោគ​នៅកម្ពុជា​ចំនួន១០៦​គម្រោងនិង​មានទុន​វិនិយោគ​សរុប​ចំនួន ២,២​ពាន់​​​លានដុល្លារ​អាមេរិក។​

ក្រៅពីនេះ ក៏មាន​ក្រុមវិនិយោគ​បរទេស​ជាច្រើនទៀត​ បាន និងកំពុង​ស្វែងរក​ការ​បណ្ដាក់​ទុន​វិនិយោគថ្មីៗនៅ​ក្នុង​ប្រទេស​កម្ពុជា​បន្ថែ​ម​ស្រប​នឹង​រាជរដ្ឋាភិបាល​ បាន និងកំពុង​ផ្ដល់​អត្ថ​ប្រយោ​ជ​ន៍​​ជាច្រើនដល់​បណ្ដា​វិនិ​យោ​គិន​​តាម​រយៈច្បាប់​វិនិយោគ​ថ្មី​នៃព្រះរាជាណាចក្រកម្ពុជានៅឱកាស​នេះ ៕