សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងសម្រួលដល់វិនិយោគិនដែលស្នើសុំចុះបញ្ជីគម្រោងវិនិយោគនៅក្នុងប្រទេសកម្ពុជា ក្រុមប្រឹក្សាអភិវឌ្ឍន៍កម្ពុជា បានប្រកាសដាក់ឱ្យប្រើប្រាស់ហត្ថលេខាអេឡិចត្រូនិក និងត្រាអេឡិចត្រូនិក លើឯកសារទម្រង់ឌីជីថលចេញពីប្រព័ន្ធគ្រប់គ្រងគម្រោងវិនិយោគនៅកម្ពុជា ឬហៅកាត់ថា ប្រព័ន្ធ cdcIPM ។
យោងតាមសេចក្ដីជូនដំណឹងរបស់ក្រុមប្រឹក្សាអភិវឌ្ឍន៍កម្ពុជា កាលពីចុងសប្ដាហ៍មុននេះបានឱ្យដឹងថា ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពី សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានក្រុមប្រឹក្សាអភិវឌ្ឍន៍កម្ពុជា ឯកសារទម្រង់ឌីជីថលចេញពីប្រព័ន្ធ cdcIPM ត្រូវបានកំណត់ឱ្យប្រើប្រាស់ហត្ថលេខាអេឡិចត្រូនិក ( e-Signature ) និងត្រាអេឡិចត្រូនិក (e-Stamp ) ដោយមានភ្ជាប់ QR Code ទៅដែនជាតិ.gov.kh ដើម្បីផ្ទៀងផ្ទាត់ ។ រាល់ឯកសារទម្រង់ឌីជីថលដែលមានកាលបរិច្ឆេទ ចាប់ពីថ្ងៃចុះហត្ថលេខានេះតទៅ អាចត្រូវបានទាញយកពីប្រព័ន្ធcdcIPM ទៅប្រើប្រាស់ និងមានតម្លៃជាឯកសារច្បាប់ដើម ដោយអនុលោមទៅតាមច្បាប់ និងបទប្បញ្ញតិ្តពាក់ព័ន្ធជាធរមាន ។
បើតាមសេចក្ដីជូនដំណឹងនេះបានបញ្ជាក់ថា អ្នកដាក់ពាក្យស្នើសុំ ឬវិនិយោគិនដែលអនុវត្តគម្រោងវិនិយោគមិនតម្រូវឱ្យផ្ដល់ឯកសារនានាដែលមានស្រាប់នៅក្នុង ឃ្យូ.អ.កូដ នៃឯកសារទម្រង់ឌីជីថលខាងលើទៅក្រសួង ស្ថាប័នរដ្ឋបាលរាជធានី ខេត្ត មន្ទីរ ឬអង្គភាពដែលពាក់ព័ន្ធនឹងការចុះបញ្ជីពាក់ព័ន្ធ និងការពិនិត្យអនុលោមភាពនៃការអនុវត្តគម្រោងវិនិយោគសោះឡើយ ។
ប្រព័ន្ធគ្រប់គ្រងគម្រោងវិនិយោគកម្ពុជា ត្រូវបានដាក់ឱ្យប្រើប្រាស់ជាផ្លូវការប្រមាណជាងមួយឆមាសកន្លងទៅ សម្រាប់ការផ្ដល់សេវាចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ ( QIP) និងទទួលបានលទ្ធផលជោគជ័យជាទីកត់សម្គាល់ ។ ការដាក់ចេញនូវយន្តការបច្ចេកវិទ្យាឌីជីថលនេះ ស្របតាមយុទ្ធសាស្ត្របញ្ចកោណ ដំណាក់កាលទី១ ដើម្បីចូលរួមជំរុញការធ្វើបរិវត្តកម្មឌីជីថល កសាងម៉ូដែលថ្មីនៃកំណើន សំដៅពន្លឿននីតិវិធី កាត់បន្ថយពេលវេលា ផ្ដល់សេវាសាធារណៈ និងបង្កើនទំនុកចិត្តជូនវិនិយោគិនដែលមានបំណងបណ្ដាក់ទុនវិនិយោគនៅកម្ពុជា ។
បើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញថា ក្នុងរយៈពេល៦ខែដើមឆ្នាំ ២០២៥នេះ ក្រុមប្រឹក្សាអភិវឌ្ឍន៍កម្ពុជាបានទទួលចុះបញ្ជីគម្រោងវិនិយោគចំនួន ៣៧៣គម្រោង និងមានទុនវិនិយោគចុះបញ្ជីប្រមាណ ៥,៨ពាន់លានដុល្លារអាមេរិក ។
តាមរយៈប្រព័ន្ធគ្រប់គ្រងគម្រោងវិនិយោគនៅកម្ពុជា cdcIPM ដែលបានប្រកាសឱ្យប្រើប្រាស់ហត្ថលេខា និងត្រា លើឯកសារទម្រង់ឌីជីថលនេះ នឹងអាចទាក់ទាញគម្រោងវិនិយោគមកកាន់កម្ពុជាបន្ថែមទៀត ហើយអាចទាក់ទាញគម្រោងវិនិយោគកាន់តែច្រើនបន្ថែមមកបណ្ដាក់ទុនវិនិយោគបង្កើតឱកាសការងារជូនពលរដ្ឋបានមួយកម្រិតផងដែរ ៕
Account
Security
Favourite Content