សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
រដ្ឋធានីប៉េកាំង៖ ប្រទេសកម្ពុជា និងចិន បានចុះហត្ថលេខាជាផ្លូវការលើពិធីសារភូតគាមអនាម័យ ដើម្បីបើកផ្លូវឱ្យមានការនាំចេញផ្លែខ្នុរស្រស់ ពីកម្ពុជាទៅកាន់ទីផ្សារប្រទេសចិន។ កិច្ចព្រមព្រៀងនេះត្រូវបានចុះហត្ថលេខានៅទីក្រុងប៉េកាំង ដោយរដ្ឋមន្ត្រីក្រសួងកសិកម្មកម្ពុជា និងរដ្ឋមន្ត្រីអគ្គរដ្ឋបាលគយចិន (GACC)។
ដើម្បីជំរុញកិច្ចសហប្រតិបត្តិការ និងពាណិជ្ជកម្មកសិកម្ម រវាងកម្ពុជា និងចិន ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោកជំទាវ Sun Meijun រដ្ឋមន្ត្រីនៃអគ្គរដ្ឋបាលគយចិន កាលពីថ្ងៃទី១៥ ខែកក្កដា ឆ្នាំ២០២៦ បានចុះហត្ថលេខាលើឯកសារសំខាន់ៗចំនួនពីរ រួមមាន៖ ១. អនុស្សរណៈនៃការយោគយល់គ្នា ស្ដីពីកិច្ចសហប្រតិបត្តិការលើវិស័យចត្តាឡីស័កដំណាំ និងបសុសត្វ និងការនាំចេញ-នាំចូលចំណីអាហារដែលមានសុវត្ថិភាព។ ២. ពិធីសារ ស្ដីពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែខ្នុរស្រស់ពីកម្ពុជាទៅកាន់ប្រទេសចិន ។
ឯកសារសំខាន់ៗទាំងពីរនេះ គឺជាជំហានគន្លឹះដ៏មានសារៈសំខាន់ក្នុងការបើកផ្លូវ និងពង្រីកសក្ដានុពលទីផ្សារកសិកម្មរបស់កម្ពុជាទៅកាន់ប្រទេសចិន ដើម្បីឆ្លើយតប និងទាញយកប្រយោជន៍ឱ្យបានជាអតិបរមាពីសមិទ្ធផលនេះ។
នេះគឺជាសមិទ្ធផលថ្មីមួយទៀត ដែលឆ្លុះបញ្ចាំងពីកិច្ចខិតខំប្រឹងប្រែងយ៉ាងសកម្ម របស់រាជរដ្ឋាភិបាលកម្ពុជា ក្នុងការចរចាបើកទីផ្សារអន្តរជាតិ និងកសាងទំនុកចិត្តលើគុណភាពកសិផលខ្មែរ។ ពិធីសារភូតគាមអនាម័យ (SPS) នេះ បានកំណត់យ៉ាងច្បាស់នូវលក្ខខណ្ឌបច្ចេកទេស ចាប់តាំងពីដំណាក់កាលថែទាំ ប្រមូលផល សម្អាត កែច្នៃ វេចខ្ចប់ រហូតដល់ការដឹកជញ្ជូន។ គោលដៅចម្បង គឺដើម្បីធានាថាគ្រប់កសិផលដែលនាំចេញ គ្មានផ្ទុកមេរោគ សារធាតុគីមី សត្វល្អិតចង្រៃ ឬជំងឺឆ្លង ដែលអាចបង្កហានិភ័យដល់សុខភាពមនុស្ស សត្វ និងដំណាំឡើយ។
យោងតាមក្រសួងកសិកម្ម រុក្ខាប្រមាញ់ និងនេសាទ ការនាំចេញខ្នុរទៅទីផ្សារចិននេះ ចម្ការ និងរោងចក្រវេចខ្ចប់ត្រូវតែចុះបញ្ជីទទួលស្គាល់ដោយ GACC ហើយត្រូវអនុវត្តតាមស្ដង់ដារ GAP និង IPM ដើម្បីធានាសុវត្ថិភាពពីសត្វល្អិត និងសារធាតុគីមី។ ដំណាក់កាលប្រមូលផល សម្អាត និងកែច្នៃ ត្រូវមានអនាម័យខ្ពស់។ ផ្លែខ្នុរនឹងត្រូវដឹកជញ្ជូនទៅកាន់មជ្ឈមណ្ឌលហុងស៊ីងក្នុងប្រទេសចិន ដោយប្រើប្រាស់ផ្លូវដឹកជញ្ជូនឆ្លងកាត់ឡាវ ដែលចំណាយពេលត្រឹមមួយសប្តាហ៍។
ក្រសួងកសិកម្ម ក៏បានអំពាវនាវ ដល់អ្នកផលិត និងអ្នកនាំចេញទាំងអស់ ឱ្យយកចិត្តទុកដាក់ខ្ពស់ក្នុងការ រៀបចំខ្សែច្រវាក់ផលិតកម្មរបស់ខ្លួនឱ្យបានល្អ និងអនុវត្តតាមស្តង់ដារអនាម័យ ព្រមទាំងតម្រូវការភូតគាមអនាម័យរបស់ប្រទេសចិន ឱ្យបានម៉ឺងម៉ាត់ជាទីបំផុត។ក្រសួង ក៏បានជំរុញឱ្យកសិកររៀបចំខ្លួនឱ្យស្របតាមលក្ខខណ្ឌខាងលើ ដើម្បីចាប់យកឱកាសទីផ្សារនេះ ដើម្បីធានាបាននូវការនាំចេញដោយជោគជ័យ និងរក្សាបាននូវកេរ្តិ៍ឈ្មោះកសិផលកម្ពុជា ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានមានប្រសាសន៍ថា នេះជាការបើកផ្លូវនាំចេញផ្លែខ្នុរស្រស់ ទៅកាន់ប្រទេសចិន ជាជំហានដ៏មានសារៈសំខាន់មួយ សម្រាប់ប្រជាកសិករ និងវិស័យឯកជនកម្ពុជាទាំងអស់ ហើយបើមានទីផ្សារ កសិករ ឬអ្នកចម្ការ ចាប់ផ្ដើមដាំកាន់តែច្រើន ដែលពីដើមមកយើងមានចម្ការខ្នុរ ត្រឹមតែជាលក្ខណៈគ្រួសារប៉ុណ្ណោះ ។
អ្នកឧកញ៉ា បន្តថា កន្លងមកតាមរយៈការតភ្ជាប់កម្ពុជា ទៅឡាវ និងការដឹកតាមរថភ្លើងទៅប្រទេសចិន បានធ្វើជាបន្តបន្ទាប់ ដោយកន្លងមកបាននាំចេញផ្លែទុរេន ។ ឥឡូវនេះមានខ្នុរ ដែលបរិមាណផ្លែខ្នុរ ក៏មានច្រើនដែរ និងជាផ្លែឈើកសិផលរបស់កសិករខ្មែរ ដែលត្រូវបានចិនអនុញ្ញាតឱ្យចូលទីផ្សារចិនបាន តាមរយៈការត្រួតពិនិត្យភូតគាមអនាម័យ។
អ្នកឧកញ៉ា មានប្រសាសន៍ថា៖
“និយាយឱ្យចំទៅ ការបង្កើតទីផ្សារថ្មី ការនាំចេញខ្នុរជារឿងល្អ ។ ការនាំចេញ នឹងជំរុញឱ្យផលិតផលក្នុងស្រុក មានការរីកចម្រើន កសិករយើងអាចមានឱកាសដាំខ្នុរ ហើយការមានទីផ្សារខ្នុរ នាំចេញទៅចិននេះ ចម្ការខ្នុរនឹងចាប់ផ្ដើមពង្រីកខ្លួន៕”
Account
Security
Favourite Content