ស្វាយរៀង ៖ ដោយមើលឃើញពីសក្តានុពលវិនិយោគនៅកម្ពុជា ក្រុមហ៊ុន Nex Healthcare Co., Ltd. ដែលមានប្រភពមកពីប្រទេសចិន បានសម្រេចបោះទុនវិនិយោគចំនួន ២៧៣ លានដុល្លារ ក្នុងការសាងសង់រោងចក្រផលិតស្រោមដៃ និងឧបករណ៍បរិក្ខាពេទ្យ នៅតំបន់សេដ្ឋកិច្ចពិសេសខេត្តស្វាយរៀង។

ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានថ្លែងក្នុងពិធីបញ្ចុះបឋមសិលាសាងសង់រោងចក្រខាងលើថា ក្រុមហ៊ុន​ Nex Healthcare Co., Ltd.​ ដែលមានមុខសញ្ញាវិនិយោគផលិតស្រោមដៃ (PVC & Rubber) និងឧបករណ៍បរិក្ខារពេទ្យ​ មានទីតាំងស្ថិតក្នុងតំបន់សេដ្ឋកិច្ចពិសេស ឈីលូ ខេត្តស្វាយរៀង​ ក្នុងទំហំទុនវិនិយោគ​ប្រមាណ​ ២៧៣​ លានដុល្លារអាមេរិក​ នៅលើផ្ទៃដី​ទំហំ​ ២១ហិកតា។ ក្រុមហ៊ុន​នេះជាក្រុមហ៊ុនបុត្រសម្ព័ន្ធរបស់ក្រុមហ៊ុន Shadong Blue Sail Health Technology Co., Ltd. មកពីខេត្តសានដុង ប្រទេសចិន​ ដែលគេដឹងថាជាក្រុមហ៊ុនផលិតស្រោមដៃការពារសុខភាពជាប់ចំណាត់ថ្នាក់លេខ៣​ នៅទូទាំងពិភពលោក, រីឯឧបករណ៍​ពិនិត្យ​បេះដូងជាប់ចំណាត់ថ្នាក់លេខ៤​ ទូទាំងពិភពលោក និងជាប់លេខ ២​ នៅក្នុងប្រទេសចិន។

ការកើនឡើងនៃចំនួន​គម្រោងវិនិយោគ​ជាបន្តបន្ទាប់​ ក៏ដូចជាតំបន់សេដ្ឋកិច្ចពិសេសនាពេលនេះ បានសបញ្ជាក់អំពីការអភិវឌ្ឍន៍របស់តំបន់សេដ្ឋកិច្ចពិសេសដែលបាន និងកំពុងទាក់ទាញវិនិយោគិន មកបណ្តាក់ទុនវិនិយោគជាហូរហែរ ព្រមទាំងបានបង្កើតការងារ និងលើកកម្ពស់ជីវភាពបងប្អូនប្រជាពលរដ្ឋ ជាពិសេស បានជំរុញឱ្យមានកំណើនសេដ្ឋកិច្ចជាតិផងដែរ។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា នៅរយៈពេលប៉ុន្មានឆ្នាំចុងក្រោយនេះ ខេត្តស្វាយរៀងមានភាពទាក់ទាញ ការវិនិយោគកាន់តែច្រើនឡើងៗ ដោយសារមានភាពអំណោយផលក្នុងការដឹកជញ្ជូនទំនិញទៅក្រៅប្រទេស កាត់តាមប្រទេសវៀតណាម ខណៈដែលកម្ពុជាមានប្រព័ន្ធអនុគ្រោះពន្ឋ EBA GSP និងកិច្ចព្រមព្រៀងពណិជ្ជកម្មសេរីជាដើម ពិសេសក្រុងបាវិតគឺជាមជ្ឈមណ្ឌលកំសាន្ត ដែលសំបូរដោយអគារកាស៊ីណូ សណ្ជាគារ និងភោជនីយដ្ឋានយ៉ាងសំបូរបែប ក្រោមការខិតខំរបស់រាជរដ្ឋាភិបាលបង្កើតឱ្យមានតំបន់សេដ្ឋកិច្ចពិសេសនៅក្នុងក្រុងបាវិត ខេត្តស្វាយរៀង ដែលជាចលករនំាឱ្យវិនិយោគទាំងក្នុង និងក្រៅប្រទេស ទៅបោះទុនសង់រោងចក្រនៅទីនោះកាន់តែច្រើនឡើងៗ។

លោក អ៊ូ សុខឿន ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តស្វាយរៀង បានឱ្យដឹងថា គិតមកទល់ឆ្នាំ២០២៤ ខេត្តស្វាយរៀងមានតំបន់សេដ្ឋកិច្ចពិសេសចំនួន ៩កន្លែង មានរោងចក្រសហគ្រាសសរុបចំនួន១៨៩ និងមានកម្មករនិយោជិត សរុបចំនួន៩៩១,៣៦៣នាក់ ស្រីចំនួន៥៥,៣៥៣នាក់ ក្នុងនោះកម្មករនិយោជិតខ្មែរចំនួន ៨៨,៣៣៥នាក់ ស្រី ៥៤៤៩៩នាក់ កម្មករនិយោជិតបរទេសចំនួន ២,៣៨៥នាក់ ស្រី៥៥០នាក់។ ក្រៅពីតំបន់សេដ្ឋកិច្ចពិសេស ខេត្តស្វាយរៀងនៅមានរោងចក្រសហគ្រាស សរុបចំនួន ៨១៤ និងមានកម្មករនិយោជិត សរុបចំនួន៤៨,៨៤៦នាក់ ស្រីចំនួន២៥,៣៩៧នាក់ ក្នុងនោះកម្មករនិយោជិតខ្មែរចំនួន ៤៧,៧២៧នាក់ ស្រី ២៥,១៦៤នាក់ បរទេសចំនួន ១,១១៩នាក់ ស្រី ២៣៣នាក់៕ ដោយ ៖ វិន ឈុនហ៊ាត