បរទេស ៖ ដោយកាសែត Telegraph របស់ចក្រភពអង់គ្លេស កាលពីពេលថ្មីៗនេះបានចេញផ្សាយថា ក្រុម hackers របស់ប្រទេសកូរ៉េខាងជើងបានបំបែកកំណត់ត្រាមួយក្នុងប្រវត្តិសាស្ត្រពិភពលោកដោយប្រើពេលវេលាត្រឹមតែ២នាទីអាចលួចលុយគ្រីបតូដែលមានតម្លៃរហូតទៅដល់ ១,៥ពាន់លានដុល្លារចេញពីប្រព័ន្ធអ៊ិនធឺណេត។

របាយការណ៍ដែលត្រូវបានបង្កើតឡើងដោយក្រុមអ្នកស្រាវជ្រាវសន្តិសុខសម្រាប់ប្រព័ន្ធអ៊ិនធឺណេតនៃក្រុមហ៊ុន Bybit បានរកឃើញកាលពីសប្តាហ៍មុនថា ទឹកលុយរាប់រយលានដុល្លារដែលមាននៅក្នុងទីផ្សារជូញដូរលុយគ្រីបតូប្រភេទ Ethereum ត្រូវបានលួចដោយក្រុមមានទំនាក់ទំនងជាមួយនឹងរដ្ឋាភិបាលទីក្រុងព្យុងយ៉ាង។

នៅក្នុងនោះអ្នកជំនាញមកពីក្រុមហ៊ុន Sygnia និង Verichains ក៏បានពន្យល់ដែរថា ការលួចចូលប្រតិបត្តិការជួញដូរបានជោគជ័យដោយក្រុម hacker របស់កូរ៉េខាងជើងគឺកើតឡើងដោយសារតែបញ្ហាចន្លោះប្រហោងបច្ចេកទេសនៅក្នុងមុខងារដែលត្រូវបានគេស្គាល់ថា Safe Wallet។

គេសង្កេតឃើញថា តរឹមរយៈពេល២ថ្ងៃមុនមានហេតុការណ៍លួចដ៏ធំនេះ ក្រុម hacker របស់កូរ៉េខាងជើងដោយមានការចូលរួមជាមួយនឹងក្រុមជំនាញរបស់រដ្ឋដែលមានឈ្មោះថា Lazarus Group បានព្យាយាមចាក់បញ្ចូលលេខកូដមេរោគចូលទៅក្នុងហេដ្ឋារចនាសម្ព័ន្ធនៃមុខងារ Safe Wallet ដែលត្រូវបានប្រើប្រាស់ដោយអតិថិជនជាច្រើននៅក្នុងវេបសាយរបស់ ByBitនៅពេលដែលកំពុងដំណើរការ។

លេខកូដមេរោគទាំងនោះបានប្រែខ្លួនទៅជាគណនេយ្យមេចំនួន៣ដែលក្នុងនោះក៏មានជាគណនេយ្យរបស់ប្រធានប្រតិបត្តិរបស់ក្រុមហ៊ុន ByBit ម្នាក់ផងដែរ។

ការប្រើប្រាស់បច្ចេកទេសដ៏ស្មុគ្រស្មាញរបស់ក្រុម hacker ត្រូវបានគេពិនិត្យឃើញថា ស្ថិតនៅចំណុចសំខាន់កាលពីវេលាម៉ោងប្រមាណជា ២ និង ១៥នាទីល្ងាច ថ្ងៃសុក្រ ដោយអាចប្រមូលបានលុយគ្រីបតូ Ethereum ក្នុងចំនួនរហូតដល់ទៅ ៤០០ ០០០កាក់ ប៉ុន្តែបានប្រើប្រាស់មុខងារផ្ទេរចេញថ្មីផ្សេងទៀតដែលត្រៀមរួចជាស្រេចនោះជំនួសវិញ។

របាយការណ៍ចេញដោយ Sygnia បានសរសេរដែរថា រយៈពេលត្រឹមតែ២នាទីប៉ុណ្ណោះក្រោយពេលដែលប្រតិបត្តិការដ៏ច្រើនត្រូវបានធ្វើឡើងរួចរាល់ និងប្រកាស ពេលនោះហើយក្រុម hacker បានគេចចេញពីប្រព័ន្ធតាមដានរបស់ Bybit ជាមួយនឹងគណនេយ្យរាប់រាយលានដុល្លាររួចបាត់ទៅហើយ។

គួរឲ្យដឹងដែរថា ក្រុម hacker របស់កូរ៉េខាងជើងត្រូវបានគេជឿជាក់ថាជាអ្នកនៅពីក្រោយការលួចលុយគ្រីបតូប្រមាណជា ៦ពាន់លានដុល្លាររួចមកហើយក្នុងរយៈពេលមួយទសវត្សរ៍ចុងក្រោយនេះ៕