សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
វត្តមានរបស់តារាសម្ដែងហូលីវូត គឺអ្នកស្រី Angelina Jolie ជាលើកដំបូងមកកាន់ប្រទេសកម្ពុជានៅក្នុងឆ្នាំ២០០០ អំឡុងពេលដែលអ្នកស្រីត្រូវផលិតខ្សែភាពយន្តដ៏ល្បីឈ្មោះគឺ «Tomb Raider» ។ ក្នុងពេលដែលមកដល់ទឹកដីកម្ពុជានាពេលនោះ អ្នកស្រីហាក់ជាប់ចិត្តជាមួយភាពស្រស់ស្អាតរបស់កម្ពុជា។ ភាពស្រស់ស្អាតដែលអាចឆក់យកចំណាប់អារម្មណ៍របស់អ្នកស្រី គឺភាពកក់ក្ដៅដែលប្រជា ជនកម្ពុជាផ្ដល់ឱ្យទៅកាន់អ្នកស្រីជាមួយទំហំទឹកចិត្តរួសរាយរាក់ទាក់របស់ប្រជាជនគ្រប់រូប និងភាពស្រស់ស្អាតដែលចេញពីធនធានធម្មជាតិ។
ដោយចិត្តជាប់ជំពាក់ជាមួយទឹកដីកម្ពុជា មួយឆ្នាំក្រោយមក អ្នកស្រីបានត្រឡប់មកវិញជាមួយទីភ្នាក់ ងារជនភៀសខ្លួនរបស់អង្គការសហប្រជាជាតិ (UNHCR) ហើយរហូតដល់ឆ្នាំ ២០០៣ មូលនិធិមួយក៏ត្រូវបានបង្កើតឡើង ដោយអ្នកស្រីឱ្យឈ្មោះថា Maddox Jolie សព្វថ្ងៃជា Maddox Jolie-Pitt Foundation (MJP)។
ដោយឡែក មូលនិធិ Maddox Jolie-Pitt នេះជាកម្មវិធីអភិរក្ស និងអភិវឌ្ឍន៍សហគមន៍ដោយផ្ដោតសំខាន់លើតំបន់ការពារសំឡូតនៃខេត្តបាត់ដំបង។ រីឯគោលបំណងនៃការបង្កើតមូនិធិឡើងគឺដើម្បីផ្តល់ការគាំទ្រដល់ភូមិក្នុងតំបន់ជនបទ និងជួយការពារសត្វព្រៃ និងព្រៃឈើដែលជិតផុតពូជ។
យ៉ាងណាមិញ សកម្មភាពដំបូងរបស់មូលនិធិនាពេលនោះគឺផ្ដោតសំខាន់លើកម្មវិធីបោសសម្អាតមីន ដើម្បីធានាការរស់នៅដោយស្ងប់សុខរបស់ប្រជាជន។ ក្រោយពីរួមចំណែកច្រើនក្នុងកម្មវិធីបោសសម្អាតមីនក្នុងឆ្នាំ២០០៦ កម្មវិធី MJP បានពង្រីកការងាររបស់ខ្លួនដើម្បីរួមបញ្ចូលគម្រោងក្នុងវិស័យកសិកម្ម ការអប់រំ សមភាពយេនឌ័រ និងការថែទាំសុខភាព។
កន្លងមក មូលនិធិសម្រេចបានការងារជាច្រើនដូចជា ផ្ដល់បច្ចេកទេសចិញ្ចឹមឃ្មុំដល់ប្រជាសហគមន៍ ដើម្បីលើកស្ទួយជីវភាពរបស់ពួកគេ រួមចំណែកក្នុងកិច្ចការពារធនធានធម្មជាតិកម្ពុជាតាមរយៈកិច្ចសហការជាមួយមន្ត្រីក្រសួងបរិស្ថាន បង្កើតសកម្មភាពដាំដើមឈើ ចូលរួមអភិរក្សសត្វដំរីដែលកំពុងរស់នៅក្នុងតំបន់ការពារធម្មជាតិសំឡូត កិច្ចការពារជីវៈចម្រុះក្នុងដំណាក់កាលជំងឺកូវីដ១៩ ផ្ដល់សម្ភារៈចាំបាច់សម្រាប់មន្ត្រីឧទ្យានុរក្ស។
បន្ថែមពីនោះ មូលនិធិក៏បានរួមបញ្ចូលនូវសកម្មភាពគាំទ្រការអប់រំរបស់ក្មេងស្រី ការគាំទ្រឱ្យស្ត្រីបានបម្រើការងារក្នុងផ្នែកបរិស្ថាន (ជាមន្ត្រីឧទ្យានុរក្ស) និងការបង្កើតកម្មវិធីផ្ដល់អាហារូបត្ថម្ភដល់ក្មេងកំពុងសិក្សានៅគ្រិះស្ថានអប់រំរដ្ឋផងដែរ។
គួរជម្រាបថា តំបន់ការពារសំឡូតត្រូវបានរដ្ឋាភិបាលកម្ពុជាបានប្រកាសដាក់ជា “តំបន់ការពារ” ក្នុងឆ្នាំ១៩៩៣ ដើម្បីគាំទ្រដល់ការអភិរក្សដែលមាននិរន្តភាពនៃសត្វព្រៃ និងប្រព័ន្ធអេកូឡូស៊ី។ តំបន់នេះមានផ្ទៃដីប្រមាណ ៦០ ០០០ ហិកតានៅជិតព្រំដែនថៃ ដោយផ្ទុកនូវជីវចម្រុះក្នុងតំបន់ភាគច្រើន ជាមួយនឹងព្រៃឈើ ប្រព័ន្ធអេកូឡូស៊ី ទឹកសាប និងប្រភេទសត្វជិតផុតពូជជាច្រើនប្រភេទ៕
Account
Security
Favourite Content