សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងទៅតាមប្រភពព័ត៌មានពី CNN បានរាយការណ៍ថា ប្រទេសជប៉ុនបានចូលរួមជាមួយសហរដ្ឋអាមេរិក និងហូឡង់ក្នុងការរឹតបន្តឹងលើការលក់បន្ទះឈីបនៅក្រៅប្រទេស និងទប់ស្កាត់ការនាំចេញបច្ចេកវិទ្យាសំខាន់ៗទៅកាន់ប្រទេសចិន។
កាលពីថ្ងៃសុក្រកន្លងទៅនេះ ជប៉ុនបានប្រកាសថា ខ្លួននឹងរឹតបន្តឹងការនាំចេញឧបករណ៍ផលិតបន្ទះឈីប និងគ្រឿងអេឡិចត្រូនិកទំនើបចំនួន ២៣ ប្រភេទ។ ស្របពេលនេះដែរ រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន លោក Yasutoshi Nishimura បាននិយាយថា ច្បាប់នេះនឹងចូលជាធរមាននៅខែកក្កដា ដែលវានឹងតម្រូវឱ្យមាននីតិវិធីដ៏តឹងរ៉ឹងមួយក្នុងការនាំចេញទៅកាន់ប្រហែល ១៦០ គោលដៅ ខណៈដែលសហរដ្ឋអាមេរិក កូរ៉េខាងត្បូង និងតៃវ៉ាន់ ត្រូវបានទទួលស្គាល់ដោយប្រទេសជប៉ុនថាមានការត្រួតពិនិត្យការនាំចេញដោយប្រសិទ្ធភាព។
មិនត្រឹមតែប៉ុណ្ណោះ ការនាំចេញទាំងអស់ទៅកាន់ប្រទេសដែលមិនត្រូវបានទទួលស្គាល់ជាផ្លូវការ នឹងត្រូវចាំបាច់សុំការយល់ព្រមពីក្រសួងពាណិជ្ជកម្មជប៉ុន ហើយវិធានការថ្មីនេះគឺមានគោលបំណងការពារឧបករណ៍ពីការប្រើប្រាស់សម្រាប់វិស័យយោធា។លោករដ្ឋមន្ត្រីបានបន្ថែមផងដែរថា ពួកគេនឹងបំពេញទំនួលខុសត្រូវនៅលើឆាកអន្តរជាតិ ក្នុងនាមជាប្រទេស ដែលជាម្ចាស់បច្ចេកវិទ្យាមួយក្នុងការរួមចំណែករក្សាសន្តិភាព និងសន្តិសុខអន្តរជាតិ។
ទោះជាយ់ាងណាក្តី ក្រសួងពាណិជ្ជកម្មបានបញ្ជាក់ថា ការរឹតបន្តឹងនេះមិនសំដៅទៅលើប្រទេសណាមួយជាក់លាក់ទេ ប៉ុន្តែពួកគេនឹងធ្វើតាមការទប់ស្កាត់ជាបន្តបន្ទាប់ ដែលនឹងអនុម័តក្នុងប៉ុន្មានខែថ្មីៗនេះ ដែលជាផ្នែកមួយនៃកិច្ចខិតខំប្រឹងប្រែងអន្តរជាតិដែលសម្របសម្រួលដឹកនាំដោយទីក្រុងវ៉ាស៊ីនតោន ដើម្បីទប់ស្កាត់ការលក់ឧបករណ៍ផលិតបន្ទះឈីបទៅកាន់ប្រទេសចិន។
កាលពីខែតុលាកន្លងទៅនេះ សហរដ្ឋអាមេរិកបានហាមឃាត់ក្រុមហ៊ុនចិនពីការទិញបន្ទះឈីប និងឧបករណ៍ផលិតបន្ទះសៀគ្វីកម្រិតខ្ពស់ដោយគ្មានអាជ្ញាប័ណ្ណ រួមទាំងរឹតបន្តឹងក្រុមអាមេរិកក្នុងការផ្តល់ការគាំទ្រសម្រាប់ការអភិវឌ្ឍន៍ ឬផលិតបន្ទះសៀគ្វីនៅតាមកន្លែងមួយចំនួននៅក្នុងប្រទេសចិន។ កាលពីដើមខែនេះ ប្រទេសហូឡង់ក៏បានបង្ហាញពីការរឹតបន្តឹងថ្មីលើការលក់នូវបច្ចេកវិទ្យា semiconductor ទៅកាន់ក្រៅប្រទេស ដោយលើកឡើងពីការការពារសន្តិសុខជាតិ។ ដូច្នោះហើយ គេអាចសន្និដ្ឋានបាន ប្រទេសជប៉ុនបានចូលរួមក្នុងការពិភាក្សាជាមួយប្រទេសទាំងពីរនេះ។
ជាការឆ្លើយតបទៅនឹងបញ្ហានេះ ចិនបានប្រឆាំងយ៉ាងខ្លាំងទៅលើវិធានការរឹតបន្តឹងលើការនាំចេញបច្ចេកវិទ្យា ដោយបាននិយាយកាលពីដើមខែនេះថា ខ្លួនប្រឆាំងដាច់ខាតចំពោះវិធានការបែបនេះ។ កាលពីថ្ងៃសុក្រកន្លងទៅនេះ អ្នកនាំពាក្យក្រសួងការបរទេសចិនលោកស្រី Mao Ning បាននិយាយថា ការបំពាក់អាវុធលើបញ្ហាសេដ្ឋកិច្ច ពាណិជ្ជកម្ម និងបច្ចេកវិទ្យា ដើម្បីធ្វើឱ្យមានអស្ថិរភាពនៅក្នុងខ្សែសង្វាក់ឧស្សាហកម្មពិភពលោកដោយចេតនា គឺនឹងធ្វើឱ្យប៉ះពាល់ដល់អ្នកដទៃ និងធ្វើឱ្យប៉ះពាល់ដល់ខ្លួនឯងផងដែរ។
គួរបញ្ជាក់ផងដែរថា ប្រទេសជប៉ុន គឺជាម្ចាស់ផ្ទះមួយ ដែលផលិតឧបករណ៍ផលិតបន្ទះសៀគ្វីជាច្រើន រួមមាន Nikon (NINOY) និង Tokyo Electron ហើយភាគហ៊ុនរបស់ក្រុមហ៊ុននៅទីក្រុងតូក្យូមានការផ្លាស់ប្តូរតិចតួច កាលពីថ្ងៃសុក្រកន្លងទៅនេះ ប៉ុន្តែក្រុមហ៊ុនទាំងពីរបានបដិសេធមិនធ្វើអត្ថាធិប្បាយទេ។ នៅក្នុងរបាយការណ៍ថ្មីៗនេះ អ្នកវិភាគ Jefferies បានវាយតម្លៃពីផលវិបាកដែលអាចកើតមានចំពោះការគ្រប់គ្រងការនាំចេញរបស់ជប៉ុនទៅកាន់ចិន ដោយកត់សម្គាល់ថា Nikon មិនរំពឹងថានឹងមានផលប៉ះពាល់ធំដុំទេ ហើយការរឹតបន្តឹងនេះក៏ទំនងជាមិនមានផលប៉ះពាល់បន្ថែមទៀតដែរ ដរាបណាពួកគេមិនទៅលើសពីទណ្ឌកម្មរបស់សហរដ្ឋអាមេរិក៕
Account
Security
Favourite Content