សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ ចិនបានក្លាយជាប្រទេសដែលមានវិនិយោគិនដាក់ទុនវិនិយោគនៅកម្ពុជាច្រើនជាងគេ ជាក់ស្ដែងក្នុងរយៈពេលប្រមាណតែ២ឆ្នាំកន្លះប៉ុណ្ណោះ ចិនបានបោះទុនវិនិយោគលើគម្រោងនានារហូតដល់ជិត១០ពាន់លានដុល្លារអាម៉េរិក ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា បានបង្ហាញឱ្យដឹងថា ចាប់តាំងពីឆ្នាំ២០២៣ រហូតដល់ដំណាច់ខែមិថុនា ឆ្នាំ២០២៥នេះ វិនិយោគិនចិនបានដាក់ទុនវិនិយោគច្រើនជាងគេក្នុងចំណោមវិនិយោគិនដែលកំពុងវិនិយោគនៅកម្ពុជា ដោយរយៈពេល២ឆ្នាំកន្លះមកនេះ ចិនបានវិនិយោគគិតជាទឹកប្រាក់ប្រមាណ ៩,៩២ពាន់លានដុល្លារអាម៉េរិក ។
បើតាមរបាយការណ៍ដដែលបានបង្ហាញថា ក្នុងឆ្នាំ២០២៣ កម្ពុជាទទួលទុនវិនិយោគសរុបប្រមាណ ៤,៩២ពាន់លានដុល្លារអាមេរិក ក្នុងនោះចិនបានដាក់ទុនវិនិយោគ ប្រមាណ ៣,២៥ពាន់លានដុល្លារអាម៉េរិក ឬស្មើនឹង៦៦ភាគរយនៃទុនវិនិយោគសរុប ។ ក្នុងឆ្នាំ២០២៤ កម្ពុជាទទួលបានទុនវិនិយោគចុះបញ្ជីសរុបចំនួន ៦,៨៧ពាន់លានដុល្លារអាម៉េរិក ក្នុងនោះ ប្រភពទុនពីប្រទេសចិនមានរហូតដល់៣,៤២ពាន់លានដុល្លារអាម៉េរិក ឬស្មើនឹងពាក់កណ្ដាលនៃទុនវិនិយោគសរុប ។
ដោយឡែកក្នុងរយៈពេល៦ខែ ដើមឆ្នាំ២០២៥នេះ តាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាក៏បានបង្ហាញឱ្យឃើញថា កម្ពុជាទទួលទុនវិនិយោគចុះបញ្ជីចំនួន ជិត ៥,៨ពាន់លានដុល្លារអាម៉េរិកក្នុងប្រភពទុនវិនិយោគមកពីប្រទេសចិន មានរហូតដល់ ៣,២៤ពាន់លានដុល្លារអាម៉េរិក ឬស្មើនឹង៥៦ភាគរយនៃទុនវិនិយោគចុះបញ្ជីសរុបក្នុងរយៈពេល៦ខែកន្លងមកនេះ ។
នៅក្នុងជំនួបពិភាក្សាការងារជាមួយគណៈប្រតិភូក្រុមហ៊ុន Xingtai Shunhe Biotechnology មកពីខេត្តហឺប៉ី ប្រទេសចិនកាលពីថ្ងៃទី ២៣ ខែកក្កដា ឆ្នាំ២០២៥កន្លងទៅនេះ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានជម្រាបជូនពីស្ថានភាពដ៏ល្អប្រសើរនៃវិនិយោគនៅកម្ពុជា ជាពិសេសរំហូរវិនិយោគចិនមកកម្ពុជាមានការកើនទ្បើងគួរជាទីកត់សម្គាល់ដោយប្រភពទុនវិនិយោគមកពីប្រទេសចិនបានឈរនៅលំដាប់លេខរៀងទីមួយ ឬទី២ជាបន្តបន្ទាប់ក្នុងរយៈពេលជាង១ទសវត្សរ៍ចុងក្រោយនេះ ។
លោកស្រី លី ជៀ( Li Jie ) ប្រធានក្រុមហ៊ុន Xingtai Shunhe Biotechnology បានបង្ហាញពីបំណងរបស់ក្រុមហ៊ុនក្នុងវិនិយោគក្នុងប្រទេសកម្ពុជា នៅក្នុងវិស័យថាមពលស្អាត និងថាមពលកកើតឡើងវិញ ជាពិសេសសំដៅលើកកម្ពស់សុវត្ថិភាពថាមពលក្នុងព្រះរាជាណាចក្រកម្ពុជា និងធានាកាត់បន្ថយផលប៉ះពាល់បរិស្ថាន។
បំណងនៃការវិនិយោគរបស់ក្រុមហ៊ុនចិននេះ បានបង្ហាញពីសញ្ញាវិជ្ជមានថ្មីមួយទៀតនៃប្រភពទុនវិនិយោគមកពីប្រទេសចិន ដែលនឹងធ្វើឱ្យប្រភពទុនវិនិយោគពីប្រទេសមួយនេះ នៅកម្ពុជាកាន់តែមានកំណើនខ្ពស់ឡើងជាបន្តបន្ទាប់ ។ ជាការកត់សម្គាល់ គម្រោងវិនិយោគធំៗរបស់ចិនមួយចំនួនដែលបានសាងសង់រួច និងកំពុងដំណើរការសាងសង់ បានចូលរួមចំណែកដល់ដំណើរការសេដ្ឋកិច្ចកម្ពុជា ដូចជាគម្រោងផ្លូវល្បឿនលឿនភ្នំពេញ ក្រុងព្រះសីហនុ គម្រោងអគារខ្ពស់ៗនៅកណ្ដាលរាជធានីភ្នំពេញ ក្រុងព្រះសីហនុ និងគម្រោងជាច្រើនទៀត ៕
Account
Security
Favourite Content