ភ្នំពេញ៖ ធុរកិច្ចបង្កើតថ្មី និង សហគ្រាសធុនតូច និងមធ្យម ចំនួន ៣២ បានទទួលជំនួយហិរញ្ញវត្ថុពីសហគ្រិនខ្មែរ ដែលពិធីប្រគល់កញ្ចប់ជំនួយនេះបានប្រព្រឹត្តទៅនាថ្ងៃទី១៣ ខែមីនា ឆ្នំាំ២០២៥ ក្រោមវត្តមាន ឯកឧត្ដម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ។ គំនិតផ្តួចផ្តើមនេះមានគោលបំណងធ្វើឱ្យប្រសើរឡើងនូវប្រតិបត្តិការអាជីវកម្ម លើកកម្ពស់ភាពប្រកួតប្រជែង និងជំរុញសក្តានុពលនាំចេញ ដើម្បីពង្រឹងប្រព័ន្ធអេកូឡូស៊ីសហគ្រិនភាពរបស់ប្រទេសកម្ពុជា។ 

ឯកឧត្ដម ហែម វណ្ណឌី បានលើកឡើងថា៖

«សហគ្រិនខ្មែរបានកសាងមូលដ្ឋានគ្រឹះដ៏រឹងមាំ និងភាពជាដៃគូទូលំទូលាយទាំងក្នុងស្រុក និងក្រៅស្រុក។ ជាមួយ នឹងសមិទ្ធផលសំខាន់ៗ សហគ្រិនខ្មែរបាននិងបន្តជំរុញផ្នត់គំនិតសហគ្រិនភាព, អភិវឌ្ឍសមត្ថភាពតាមរយៈ ការបណ្តុះបណ្តាលគ្រប់ជ្រុងជ្រោយ, បង្កើតឱកាសបណ្តាញទំនាក់ទំនង, កៀរគរទុនវិនិយោគ និងផ្តល់ការគាំទ្រ ផ្នែកហិរញ្ញវត្ថុដោយផ្ទាល់ ទៅដល់ធុរកិច្ចបង្កើតថ្មី និងសហគ្រាសធុនតូច និងមធ្យម»។

ចាប់តាំងពីឆ្នាំ២០២០រហូតមក សហគ្រិនខ្មែរបានអនុវត្ដកម្មវិធីជាច្រើន ដើម្បីគាំទ្រសហគ្រិនភាពនៅកម្ពុជា។ កម្មវិធី ទាំងនោះរួមមាន ការប្រកួតប្រជែងផែនការអាជីវកម្មសម្រាប់និស្សិតដើម្បីលើកទឹកចិត្ដដល់ការច្នៃប្រឌិត និងផ្នត់គំនិតសហគ្រិនភាព,វគ្គសិក្សាអភិវឌ្ឍន៍សមត្ថភាពដែលគ្របដណ្ដប់លើប្រធានបទសំខាន់ៗ ដូចជាការគ្រប់គ្រងហិរញ្ញវត្ថុ ការលក់ និងទីផ្សារ និងយុទ្ធសាស្រ្តនាំចេញ, ព្រមទាំងការកសាងបណ្តាញភ្ជាប់ធុរកិច្ចបង្កើតថ្មី និងសហគ្រាសធុនតូច និងមធ្យម ជាមួយវិនិយោគិន ស្ថាប័នហិរញ្ញវត្ថុ និងដៃគូអាជីវកម្មសំខាន់ៗ ដើម្បីពង្រឹងប្រព័ន្ធអេកូឡូស៊ីសហគ្រិនភាព។

ឯកឧត្ដមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាលទទួលបន្ទុកជានាយកប្រតិបត្ដិសហគ្រិនខ្មែរ បានសង្កត់ធ្ងន់លើការប្ដេជ្ញាចិត្ដរបស់សហគ្រិនខ្មែរ ក្នុងការពង្រឹងប្រព័ន្ធអេកូឡូស៊ីធុរកិច្ចបង្កើតថ្មី និងសហគ្រាសធុនតូច និងមធ្យម។

ឯកឧត្ដមបានលើកឡើងថា៖

«ជំនួយហិរញ្ញវត្ថុដែលផ្តល់ដល់ធុរកិច្ចបង្កើតថ្មី និងសហគ្រាស ធុនតូច និងមធ្យម គឺជាសក្ខីភាពមួយចំពោះការគាំទ្រ និងការយកចិត្ដទុកដាក់ដោយផ្ទាល់របស់រាជរដ្ឋាភិបាល ក្នុងការកសាងប្រព័ន្ធអេកូឡូស៊ីសហគ្រិនភាពឱ្យមានភាពរឹងមាំ និងភាពធន់។ នេះបានគូសបញ្ជាក់ពីការចូលរួម ចំណែករបស់សហគ្រិនខ្មែរជាមួយក្របខណ្ឌគោលនយោបាយបច្ចុប្បន្ន  ក្នុងគោលបំណងលើកកម្ពស់អាជីវកម្ម និងកែលម្អលទ្ធភាពទទួលបានទីផ្សារ»។

គួរជម្រាបថា ៖ សហគ្រិនខ្មែរ ជាវេទិកាជាតិសម្រាប់ការគាំទ្រសកម្មភាពសហគ្រិនភាព ដោយផ្ដោតជាពិសេសលើធុរកិច្ចបង្កើតថ្មី និងសហគ្រាសធុនតូចនិងមធ្យម។ តាមរយៈការជំរុញវិស័យឯកជនឱ្យមានភាពរឹងមាំ និង រស់រវើក សហគ្រិនខ្មែរមានគោលបំណងលើកកម្ពស់កំណើន និងនវានុវត្ដន៍អាជីវកម្ម។  កិច្ចខិតខំប្រឹងប្រែងទាំងនេះស្របតាមយុទ្ធសាស្ត្ររបស់រដ្ឋាភិបាលក្នុងការជំរុញការអភិវឌ្ឍសេដ្ឋកិច្ចប្រកប​ដោយ​និរន្តរភាពនិងវិបុលភាពយូរអង្វែង។

សហគ្រិនខ្មែរ ដែលជាបរធនបាលកិច្ចរបស់រាជរដ្ឋាភិបាលកម្ពុជា មានការប្តេជ្ញាចិត្តក្នុងការជំរុញប្រព័ន្ធអេកូឡូស៊ីសហគ្រិនភាព ប្រកបដោយភាពរស់រវើក និងនិរន្តរភាពនៅកម្ពុជា។ ជាមួយនឹងអាណត្តិក្នុងការប្រមូលផ្តុំវិនិយោគ និងគ្រប់គ្រងធនធាន សហគ្រិនខ្មែរ គាំទ្រអាជីវកម្មដែលជំរុញនវានុវត្ដន៍ និងបង្កើតតម្លៃបន្ថែមសម្រាប់សេដ្ឋកិច្ចជាតិ។ ក្នុងនាមជាវេទិកាជាតិសម្រាប់ការអភិវឌ្ឍសហគ្រិនភាព សហគ្រិនខ្មែរផ្តោតលើវិស័យអាទិភាពចំនួនបួន៖១-បច្ចេកវិទ្យាព័ត៌មានវិទ្យា និងគមនាគមន៍ – គាំទ្រធុរកិច្ចថ្មីផ្នែកបច្ចេកវិទ្យា ដើម្បីពន្លឿនការផ្លាស់ប្តូរឌីជីថល ២-សេវាកម្ម – លើកកម្ពស់បដិសណ្ឋារកិច្ច និងភស្តុភារ ដើម្បីពង្រឹង​វិស័យសេវាកម្មរបស់កម្ពុជា ៣-កសិកម្ម៖ ជំរុញការកែច្នៃកសិផលសម្រាប់ការប្រើប្រាស់ក្នុងស្រុក និងការនាំចេញនិងទី៤-កម្មន្ដសាល ៖ លើកកម្ពស់ការជំនួសការនាំចូលដើម្បីបង្កើនផលិតកម្មក្នុងស្រុក៕