ភ្នំពេញ៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា អាមរិក គឺជាទីផ្សារនាំចេញដ៏ធំមួយរបស់កម្ពុជា ហើយអាមរិកក៏ជាដៃគូវិនិយោគដ៏ចម្បងរបស់កម្ពុជាផងដែរ ជាក់ស្ដែងនាពេលបច្ចុប្បន្ននេះ មានក្រុមហ៊ុនធំៗជាច្រើនរបស់អាមរិក បាន និងកំពុងវិនិយោគនៅកម្ពុជាលើវិស័យជាច្រើន។

ក្នុងឱកាសជួបពិភាក្សាការងារជាមួយគណៈប្រតិភូធុរកិច្ចអាមេរិក នាថ្ងៃទី១០ ខែធ្នូ ឆ្នាំ២០២៤ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានជម្រាបជូនគណៈប្រតិភូធុរកិច្ចអាមេរិកអំពីការអភិវឌ្ឍសេដ្ឋកិច្ច កាលានុវត្តភាព កម្លាំងពលកម្មវ័យក្មេង និងទីផ្សារដ៏ទូលំទូលាយរបស់កម្ពុជា។

អ្នកឧកញ៉ា លឹម ហេង បានស្វាគមន៍យ៉ាងកក់ក្តៅចំពោះគណៈប្រតិភូធុរកិច្ចអាមេរិក និងបានគូសបញ្ជាក់អំពីសារៈសំខាន់នៃទស្សនកិច្ចនេះថា ជាការរួមចំណែកដ៏សំខាន់ដល់ការជំរុញទំនាក់ទំនងសេដ្ឋកិច្ចរវាងប្រទេសទាំងពីរព្រមទាំងបានជំរុញលើកទឹកចិត្តធុរជនអាមេរិកចាប់ដៃគូជាមួយធុរជនកម្ពុជាដើម្បីទាញយកកាលានុវត្តភាពធុរកិច្ចនៅកម្ពុជា។

គួរជម្រាបថា៖ គណៈប្រតិភូធុរកិច្ចអាមេរិក ដែលកំពុងបំពេញបេសកកម្មធុរកិច្ចនៅកម្ពុជានាពេលនេះ រួមមាន ក្រុមហ៊ុនមកពីវិស័យបច្ចេកវិទ្យា កសិកម្ម អប់រំ និងផលិតផលប្រើប្រាស់ប្រចាំថ្ងៃ។ ដោយឡែក ក្រុមហ៊ុនធំៗរបស់អាមេរិកដែលបានវិនិយោគនៅកម្ពុជា រួមមាន ក្រុមហ៊ុន Caltex, Chevron, Coca-Cola, Unocal, Conoco, Jupiter, Northbridge និង R.M. Asia ហើយថ្មីៗនេះក្រុមហ៊ុន Ford បានបើករោងចក្រដំឡើងរថយន្តនៅខេត្តពោធិ៍សាត់ផងដែរ។

លោក គឹមឆា ហួត ប្រធានគណៈប្រតិភូធុរកិច្ចអាមេរិក និងជាប្រធានការិយាល័យតំណាងសភាពាណិជ្ជកម្មកម្ពុជាប្រចាំរដ្ឋកាលីហ្វ័រញ៉ា សហរដ្ឋអាមេរិក បានបញ្ជាក់ថា៖ ក្រុមហ៊ុនអាមេរិកដែលអញ្ជើញមកបំពេញបេសកកម្មធុរកិច្ចនៅកម្ពុជា មានបំណងសិក្សារស្វែងយល់អំពីបរិយាកាសទីផ្សារកម្ពុជា និងស្វែងរកដៃគូសហប្រតិបត្តិការផ្អែកទៅតាមវិស័យរៀងៗខ្លួន។

លោកបានសង្កត់ធ្ងន់ថា៖ ក្នុងចំណោមក្រុមហ៊ុនសំខាន់ៗ ដែលចូលរួមក្នុងបេសកកម្មធុរកិច្ចរួមមាន៖ ក្រុមហ៊ុន Plug and Play ដែលជាក្រុមហ៊ុនបង្កើតថ្នាលនវានុវត្តន៍សាកល និងក្រុមហ៊ុន CK One Marketing, Inc., ជាក្រុមហ៊ុនតំណាងឲ្យ អ្នកចែកចាយធំៗនៅអាមេរិក Costco Wholesale Worldwide និងSprouts Farmer’s Market ។

លើសពីនេះទៅទៀត California State University ដែលជាសាកលវិទ្យាល័យដ៏ធំមួយនៅរដ្ឋកាលីហ្វ័រញ៉ាក៏បានបង្ហាញពីចំណាប់អារម្មណ៍ទៅលើកិច្ចសហប្រតិបត្តិការលើវិស័យអប់រំជាមួយវិស័យឯកជន និង ស្ថាប័នរដ្ឋនៅកម្ពុជាផងដែរ។ ទន្ទឹមនឹងនេះក៏មានក្រុមហ៊ុនអាមេរិកផ្សេងៗទៀតដែលបានបរិយាយអំពីចំណាប់អារម្មណ៍ក្នុងការវិនិយោគក្នុងប្រទេសកម្ពុជា និងជំរុញកិច្ចសហប្រតិបត្តិការផ្នែកពាណិជ្ជកម្មជាមួយធុរជនកម្ពុជាថែមមួយកម្រិតទៀត។

សភាពាណិជ្ជកម្មកម្ពុជា រួមនិងការិយាល័យតំណាងសភាពាណិជ្ជកម្ពុជាប្រចាំរដ្ឋកាលីហ្វ័រញ៉ាសហរដ្ឋអាមេរិក តែងតែជំរុញសកម្មភាពពាណិជ្ជកម្ម និងវិនិយោគរវាងកម្ពុជា – សហរដ្ឋ​អាមេរិក ដើម្បីផលប្រយោជន៍រួមគ្នា។ បេសកកម្មធុរកិច្ចនាពេលនេះពិតជាមានសារៈសំខាន់ដល់ការកសាងភាពជាដៃគូពាណិជ្ជកម្មដែលរួមចំណែកដល់ការអភិវឌ្ឍសេដ្ឋកិច្ចកម្ពុជា។

សូមជម្រាបថា ៖ ទំហំពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកឈានដល់ ៨,៤៥ ប៊ីលានដុល្លារក្នុងរយៈពេល ១០ ខែដំបូងនៃឆ្នាំ ២០២៤ កើនឡើង ៩,៧ ភាគរយបើធៀបនឹងរយៈពេលដូចគ្នាក្នុងឆ្នាំ ២០២៣។ នេះបើយោងតាមទិន្នន័យនាំចូល-នាំចេញរបស់អគ្គនាយកដ្ឋានគយនិងរដ្ឋាករកម្ពុជា។

ចាប់ពីខែមករា ដល់ខែតុលា ឆ្នាំ២០២៤ កម្ពុជាបាននាំចេញទំនិញទៅសហរដ្ឋអាមេរិកមានតម្លៃ ៨.២៣ ប៊ីលានដុល្លារ កើនឡើង ៩.៨ ភាគរយ ហើយការនាំចូលវិញមានតម្លៃ២១៧ លានដុល្លារ កើនឡើង ៧.៥ ភាគរយ។ ទំនិញនាំចេញរបស់កម្ពុជាទៅកាន់សហរដ្ឋអាមេរិក រួមមានសម្លៀកបំពាក់ ផលិតផលធ្វើដំណើរ កង់ និងផលិតផលប្រើប្រាស់ផ្សេងៗទៀត ខណៈដែលទំនិញដែលកម្ពុជានាំចូលពីសហរដ្ឋអាមេរិកមានដូចជា រថយន្ត គ្រឿងចក្រ គ្រឿងអលង្ការ គ្រឿងសម្អាង គ្រឿងអេឡិចត្រូនិក និងទំនិញប្រើប្រាស់ផ្សេងៗទៀត៕