សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កែប ៖ កែប ជាខេត្តមួយដែលមានផ្ទៃដីតូចជាងគេនៅក្នុងចំណោមបណ្ដាខេត្តនានាទូទាំងប្រទេស ប៉ុន្តែខេត្តមួយនេះសម្បូរទៅដោយផ្លូវជាតិសំខាន់ៗតភ្ជាប់ពីបណ្ដាខេត្តផ្សេងទៀត និងជាខេត្តដែលមានសក្ដានុពលខ្ពស់ស្ទើរគ្រប់វិស័យ ។
យោងតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ថ្លែងក្នុងពិធីសម្ពោធដាក់ឱ្យប្រើប្រាស់ វិថីតេជោសន្តិភាពឆ្នេរអង្កោល ប្រវែងសរុបជាង ១២គីឡូម៉ែត្រកាលពីថ្ងៃទី១១ ខែវិច្ឆិកា ឆ្នាំ២០២៤ បានឱ្យដឹងថា ខេត្តកែបតូចពិតមែន តែសម្បូរផ្លូវជាតិ និងផ្លូវកៅស៊ូ ជាក់ស្ដែងពេលចេញពីភ្នំពេញ អាចធ្វើដំណើរតាមផ្លូវជាតិលេខ៣ ផ្លូវលេខ៤ ភ្ជាប់តាមផ្លូវជាតិ៤១ ផ្លូវលេខ៣១ និងផ្លូវលេខ៣៣ ។
សម្ដេចបន្តថា ក្រៅពីផ្លូវទាំងនោះ នៅពេលឆាប់ៗខាងមុខនេះដែរ ខេត្តកែបក៏នឹងមានផ្លូវសំខាន់មួយទៀតគឺផ្លូវទឹក គឺព្រែកជីកហ្វូណនតេជោ ដែលបានបើកការដ្ឋានសាងសង់កាលពីថ្ងៃទី ៥ ខែសីហា ឆ្នាំ២០២៤កន្លងទៅនេះ។ ដូច្នេះ នៅពេលខាងមុខបងប្អូនប្រជាពលរដ្ឋអាចធ្វើដំណើរទៅលេងខេត្តកែបតាមផ្លូវទឹកថ្មីក៏បាន។
សម្ដេចបន្តទៀតថា ៖
«ខេត្តកែប គឺជាខេត្តដែលមានសក្ដានុពលខ្ពស់ផងដែរ ដូច្នេះហើយរដ្ឋបាលខេត្ត ក៏ដូចជាអាជ្ញាធរខេត្តកែប ត្រូវចេះកែច្នៃតំបន់ទេសចរណ៍នានានៅក្នុងខេត្តកែបដើម្បីទាក់ទាញភ្ញៀវទេសចរជាតិ និងអន្តរជាតិ មកទស្សនា កម្សាន្តនៅក្នុងខេត្តកែបឱ្យបានកាន់តែច្រើន ដែលអាចនឹងផ្ដល់ប្រាក់ចំណូលដល់ប្រជាពលរដ្ឋ អាជីវករលក់ដូរនៅក្នុងខេត្តកែបបានបន្ថែមទៀត»។
សម្ដេចធិបតីក៏បានកោតសរសើរដល់រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលបានផ្ដួចផ្ដើមគម្រោងសាងសង់ផ្លូវជិះកង់តាមតំបន់ឆ្នេរ ដោយចាប់ផ្ដើមពីខេត្តកែប ទៅកាន់ខេត្តកំពត បន្តទៅកាន់ខេត្តព្រះសីហនុ និងទៅកាន់កោះកុង ។ គម្រោងផ្លូវជិះកង់នេះដែរ នឹងអាចទាក់ទាញភ្ញៀវទេសចរ ជាពិសេសអាចបង្កើតព្រឹត្តិការណ៍ទេសចរណ៍សំខាន់ៗរៀបចំនៅតំបន់ឆ្នេរកាន់តែច្រើន កាន់តែញឹកញាប់បានថែមទៀតផង ។
គួរបញ្ជាក់ថា ដើម្បីជំរុញ និងទាក់ទាញការវិនិយោគ និងទេសចរណ៍នៅក្នុងខេត្តកែប រាជរដ្ឋាភិបាលកម្ពុជា បានសម្រេចបង្កើតឆ្នេរថ្មីមួយនៅក្នុងខេត្តកែបជាឆ្នេរខ្សាច់កម្សាន្តសាធារណៈកម្រិតខ្ពស់ឈ្មោះថា ឆ្នេរតេជោសន្តិភាពកែប ដែលមានប្រវែងជិត៣គីឡូម៉ែត្រ ។
នៅក្នុងគម្រោងអភិវឌ្ឍន៍ឆ្នេរនេះដែរ ក៏មានអភិវឌ្ឍន៍វិថី និងអនុវិថីចូលឆ្នេរសមុទ្រចំនួន៥ខ្សែ ដែលមានផ្លូវថ្មើជើង ផ្លូវថ្មើជើងសម្រាប់ជនមានពិការភ្នែក និងផ្លូវជិះកង់ ។ អភិវឌ្ឍន៍រង្វង់មូលគយគន់ទេសភាពចំនួន ២កន្លែង ក្នុងនោះរង្វង់មូលទី១ មានអង្កត់ផ្ចិតប្រវែង៩៩ម៉ែត្រ ស្ថិតនៅចុងវិថីចូលឆ្នេរសមុទ្រទី១ ដែលគ្រោងតម្កល់រូបចម្លាក់លោកយាយជំទាវម៉ៅក្នុងទម្រង់មេទ័ពជាញជ័យ និងរង្វង់មូលទី២មានអង្កត់ផ្ចិត៩៩ម៉ែត្រដូចគ្នា ស្ថិតនៅចុងវិថីចូលឆ្នេរសមុទ្រទី២ ដែលគ្រោងរក្សាទុកជាលម្អសាធារណៈ សម្រាប់ប្រារព្ធពិធីបុណ្យ និងពិព័រណ៍នានា ។ ដូច្នេះ នៅពេលឆ្នេរតេជោសន្តិភាពកែប អភិវឌ្ឍរួចរាល់រំពឹងថានឹងទទួល បានភ្ញៀវទេសចរជាតិអន្តរជាតិជាច្រើនទៀតចូលមកកម្សាន្ត និងទស្សនានៅក្នុងខេត្តកែប ៕
Account
Security
Favourite Content