បរទេស៖ យោងតាមប្រភពព័ត៌មានពី DW បានរាយការណ៍ថា បន្ទាប់ពីលោក Donald Trump បានឈ្នះការបោះឆ្នោតជាប្រធានាធិបតីសហរដ្ឋអាម៉េរិក អ្នកវិភាគបានព្យាករណ៌ពីឥទ្ធិពលមួយចំនួនដែលអាចធ្វើឱ្យស្ថានភាពសេដ្ឋកិច្ចពិភពលោកមានការប្រែប្រួលខុសពីការគ្រប់គ្រងអំណាចដោយប្រធានាធិបតីអាណត្តិកន្លងទៅ។

អ្នកវិភាគជាច្រើនបានយល់ឃើញថា គោលនយោបាយរបស់ Trump នឹងជះឥទ្ធិពលវិជ្ជមានយ៉ាងធំធេងលើសេដ្ឋកិច្ចអាមេរិក ប៉ុន្តែក៏អាចមានឥទ្ធិពលអវិជ្ជមានមួយចំនួនផងដែរពាក់ព័ន្ធទៅនឹងបញ្ហាពាណិជ្ជកម្មជាមួយបណ្តាប្រទេសមួយចំនួន ជាពិសេសប្រទេសចិន។ ។ យ៉ាងណាក៏ដោយ លោក Donald Trump បានសន្យាថា នឹងពិចារណាទៅលើបញ្ហាពន្ធនៃការនាំចូល បញ្ជាឱ្យនិរទេសជនអន្តោប្រវេសន៍ទ្រង់ទ្រាយធំ ប៉ុន្តែគេមិនច្បាស់ថា គោលនយោបាយទាំងនោះអាចត្រូវបានអនុម័តនៅពេលណា ឬត្រូវធ្វើឡើងដោយរបៀបណានោះទេ។ ប្រសិនបើគណបក្សសាធារណរដ្ឋបានគ្រប់គ្រងព្រឹទ្ធសភាអាមេរិកទៀតនោះ វាកាន់តែងាយស្រួលសម្រាប់ Trump អនុម័តគោលនយោបាយទាំងនោះ។ គោលនយោបាយ​សេដ្ឋកិច្ច​ជាច្រើន​របស់​ Trump ​គឺ​ស្រដៀង​នឹង​ការ​កាន់​អំណាច​ដំបូង​របស់លោក។

Donald Trump សន្យាថា នឹងដំឡើងពន្ធ ១០ ឬ ២០ ភាគរយលើទំនិញទាំងអស់ដែលនាំចូលមកសហរដ្ឋអាមេរិក និងដំឡើងពន្ធខ្ពស់រហូតដល់ ៦០ ភាគរយលើទំនិញដែលផលិតដោយចិន។ បន្ថែមពីនេះ គាត់បានសន្យាថា នឹងបង្កើនការផលិតក្នុងស្រុក កាត់បន្ថយពន្ធ និងនិរទេសជនអន្តោប្រវេសន៍ខុសច្បាប់រាប់លាននាក់។ យ៉ាងណាក៏ដោយ បើទោះបីជាការសន្យាទាំងនេះមានចំណុចមួយចំនួនហាក់ដូចជាហួសហេតុក៏ដោយ ប៉ុន្តែវាបានបញ្ចុះបញ្ចូលអ្នកបោះឆ្នោតជាច្រើនដែលកំពុងជួបបញ្ហាជាមួយនឹងតម្លៃអាហារ និងតម្លៃដែលចំណាយលើការស្នាក់នៅទទួលយកគោលនយោបាយរបស់ ពីព្រោះពួកគេចង់ឲ្យសេដ្ឋកិច្ចមានភាពប្រសើរឡើង។ គោលនយោបាយរបស់ Trump នឹងជះឥទ្ធិពលយ៉ាងធំធេងលើសេដ្ឋកិច្ចអាមេរិក ប៉ុន្តែក៏នឹងមានឥទ្ធិពលយ៉ាងខ្លាំងនៅទូទាំងពិភពលោកផងដែរ។ នៅមុនការបោះឆ្នោត អាជីវកម្មជុំវិញពិភពលោកបានត្រៀមខ្លួនធ្វើផែនការបន្ទាន់ ប្រសិនបើគណបក្សប្រជាធិបតេយ្យ ឬសាធារណរដ្ឋទទួលបានជ័យជម្នះ។

បន្ទាប់ពីលោក Donald Trump បានឈ្នះឆ្នោត ទីផ្សារភាគហ៊ុនពិភពលោកមានប្រតិកម្មចម្រុះគ្នា ជាពិសេសទីផ្សារភាគហ៊ុននៅអាស៊ី។ ទីផ្សារហ៊ុន Nikkei របស់ជប៉ុន និង S&P/ASX 200 របស់អូស្ត្រាលីឡើងថ្លៃ ខណៈពេលដែលទីផ្សារហ៊ុន Hang Seng របស់ហុងកុងធ្លាក់ចុះ ខណៈដែលទីផ្សារហ៊ុនចិនដីគោកមិនបានផ្លាស់ប្តូរច្រើនទេ ប៉ុន្តែមិនទាន់មានដំណឹងពីទីផ្សារអឺរ៉ុបនោះទេ។ ទន្ទឹមនឹងនេះ ទីផ្សារហ៊ុនអាមេរិកបានកើនឡើងខ្ពស់គួរឲ្យកត់សម្គាល់ ដោយសន្ទស្សន៍ S&P 500 បានកើនឡើង ២,៤ ភាគរយ, Dow Jones Industrial Average បានកើនឡើង ៣,៤ ភាគរយ, និង Nasdaq Composite កើនឡើង ២,៧ ភាគរយ។ កាលពីថ្ងៃពុធ សន្ទស្សន៍ទាំង ៣ បានឡើងដល់កម្រិតខ្ពស់បំផុត ខណៈដែលសន្ទស្សន៍ភាគហ៊ុនពិភពលោក MSCI កើនឡើង ១,៣ ភាគរយ។ មិនត្រឹមតែប៉ុណ្ណោះ លោក Trump បានសន្យាថានឹងធ្វើឱ្យអាមេរិកក្លាយជាកន្លែងគ្រីបតូកំពូលរបស់ពិភពលោក ហើយការគាំទ្ររបស់លោកចំពោះរូបិយប័ណ្ណឌីជីថលបានផ្តល់ក្តីសង្ឃឹមដល់ឧស្សាហកម្មនៅសហរដ្ឋអាមេរិក។ ដូច្នោះហើយ បុគ្គល និងក្រុមហ៊ុនគ្រីបតូមួយចំនួនចង់ឃើញគាត់ជាប់ឆ្នោត និងបានបរិច្ចាគប្រាក់រាប់លានដល់ Super PACs ដើម្បីគាំទ្របេក្ខជនតាមជម្រើសរបស់ពួកគេ។ បន្ទាប់ពី Trump ឈ្នះឆ្នោតកាលពីថ្ងៃពុធ តម្លៃ Bitcoin ដែលជារូបិយប័ណ្ណគ្រីបតូដ៏ពេញនិយមបំផុតបានកើនឡើងជាង ៧៥ ០០០ ដុល្លារ។

យ៉ាងណាក៏ដោយ បើទោះបីជាតម្លៃ Bitcoin បានកើនឡើងខ្ពស់ក៏ពិតមែន ប៉ុន្តែរូបិយប័ណ្ណផ្សេងមួយចំនួនមិនបានដំណើរការល្អនោះទេបើធៀបនឹងប្រាក់ដុល្លារអាមេរិក។ លើសពីនេះ សហភាពអឺរ៉ុប ចិន ជប៉ុន និងម៉ិកស៊ិក កំពុងព្រួយបារម្ភពីការដំឡើងពន្ធរបស់សហរដ្ឋអាម៉េរិក ខណៈដែលរូបិយប័ណ្ណរបស់ពួកគេបានបាត់បង់តម្លៃធៀបនឹងប្រាក់ដុល្លារអាមេរិកដែលកំពុងកើនឡើង។ ប្រាក់ប៉េសូម៉ិកស៊ិកបានធ្លាក់ចុះខ្លាំងបំផុតក្នុងរយៈពេល ៣ ខែ ដោយសារវាងាយរងគ្រោះពីពន្ធថ្មីរបស់សហរដ្ឋអាមេរិក ដែលជាដៃគូពាណិជ្ជកម្មធំបំផុតរបស់ប្រទេស។ មិនត្រឹមតែប៉ុណ្ណោះ ប្រាក់ដុល្លារដែលថ្លៃជាងនឹងធ្វើឱ្យទំនិញរបស់សហរដ្ឋអាមេរិកមានតម្លៃថ្លៃសម្រាប់អ្នកទិញដែលប្រើប្រាស់រូបិយប័ណ្ណផ្សេង។ នេះមានន័យថា ទំនិញសកលដែលមានតម្លៃជាដុល្លារដូចជាប្រេង នឹងមានតម្លៃថ្លៃជាងមុនសម្រាប់អ្នកទិញដែលបង់ប្រាក់ជារូបិយប័ណ្ណផ្សេងទៀត។

ក្រៅពីផលលំបាកផ្នែកពាណិជ្ជកម្ម និងពន្ធ បណ្តាប្រទេសនៅអឺរ៉ុបខាងកើតមួយចំនួនក៏មានភាពភ័យខ្លាចថា Trump អាចនឹងធ្វើឲ្យការគាំទ្រដ៏សំខាន់របស់អាមេរិកសម្រាប់អង្គការណាតូមានការចុះខ្សោយ។ លើសពីនេះ ពួកគេក៏ព្រួយបារម្ភអំពីអនាគតនៃសង្រ្គាមនៅអ៊ុយក្រែន និងទាញទម្លាក់តម្លៃរូបិយប័ណ្ណអឺរ៉ុបខាងកើតមួយចំនួន។ ដូច្នោះហើយ គេយល់ឃើញថា អឺរ៉ុបប្រហែលជាត្រូវបង្កើនការចំណាយលើវិស័យការពារជាតិ និងការគាំទ្ររបស់ខ្លួនសម្រាប់អ៊ុយក្រែនជាពិសេស ដើម្បីផ្គាប់ចិត្ត Trump។ លើសពីនោះ គោលនយោបាយជាច្រើនរបស់ Trump អាចប៉ះពាល់ដល់សមត្ថភាពរបស់ប្រទេសដទៃទៀតក្នុងការខ្ចីប្រាក់ និងបណ្តាលឲ្យសេដ្ឋកិច្ចរបស់ពួកគេមានអតិផរណា។

លោក Piotr Matys អ្នកវិភាគ FX ជាន់ខ្ពស់នៅក្រុមហ៊ុន In Touch Capital Markets បានលើកឡើងថា គោលនយោបាយរបស់ Trump នឹងមានផលវិបាក និងអវិជ្ជមានខ្លាំងសម្រាប់ប្រទេសម៉ិកស៊ិក និងតំបន់ចាយប្រាក់អឺរ៉ូ។

លោក Thilo Brodtmann ប្រធានសមាគមឧស្សាហកម្មវិស្វកម្មមេកានិកអាល្លឺម៉ង់ បានលើកឡើងថា អាណត្តិទី២ របស់លោក Donald Trump អាចនឹងក្លាយជាបញ្ហាប្រឈមសម្រាប់ឧស្សាហកម្មអាល្លឺម៉ង់ និងអឺរ៉ុបធំជាងអាណត្តិដំបូងរបស់គាត់។ ដូច្នោះ ពួកគេត្រូវតែយកចិត្តទុកដាក់ជាពិសេសលើការប្រកាសពន្ធរបស់ Trump ដោយសារការដំឡើងពន្ធអាចនឹងប៉ះពាល់ដល់ពាណិជ្ជកម្មពិភពលោក ហើយជាលទ្ធផល ប្រទេសចិន និងបណ្តាប្រទេសអឺរ៉ុបនឹងប្រឹងអភិវឌ្ឍខាងសេដ្ឋកិច្ចរបស់ពួកគេបន្ថែមទៀត៕