ភ្នំពេញ៖ អគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានឱ្យដឹងថា គិតត្រឹមថ្ងៃទី០៣ ខែវិច្ឆិកា ឆ្នាំ២០២៤ កម្ពុជា ចម្រាញ់រ៉ែមាស បានចំនួនជិត១៣តោន តាមរយៈសកម្មភាពរបស់ក្រុមហ៊ុន Renaissance Minerals នៅក្នុងខេត្ដមណ្ឌលគិរី។

ឯកឧត្តម អ៊ឺង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ នៃក្រសួងរ៉ែ និងថាមពល បានឱ្យដឹងថា ចំពោះក្រុមហ៊ុន Renaissance Minerals គិតត្រឹមថ្ងៃទី០៣ ខែវិច្ឆិកា ឆ្នាំ២០២៤ បានផលិតមាស៨០៧ដុំ គិតជាទម្ងន់សរុបប្រមាណ ១២ ៥៣៦គីឡូក្រាម ចំណែកឯក្រុមហ៊ុន Rong Cheng ផលិតមាសបាន ១២ដុំ ស្មើនឹងប្រមាណ២២គីឡូក្រាម។

បើតាមការបញ្ជាក់របស់អគ្គនាយកនៃអគ្គនាយកដ្ឋានធនធានរ៉ែ ដំណើរការអាជីវកម្មរបស់ក្រុមហ៊ុន Renaiss​ance Minerals (Cambodia) Ltd ស្ថិតក្នុងតំបន់អូរខ្វាវ ស្រុកកែវសីម៉ា ខេត្តមណ្ឌលគិរី គឺមានដំណើរការទៅតាមផែនការល្អ មិនមានបញ្ហា និងភាពប្រឈមនោះទេ។

ដោយឡែក ក្រុមហ៊ុន Rong Cheng ស្ថិតនៅតំបន់ចុងផ្លាស់ ខេត្ដមណ្ឌលគិរី នៅមានជួបបញ្ហា ដោយសារការជីកអណ្ដូងចុះមានលិចធ្លាយទឹក មួយវិញទៀតនៅមានអណ្ដូងរ៉ែអនាធិបតេយ្យមួយចំនួន ដែលជាបញ្ហាធំ ធ្វើឱ្យមានការប៉ះពាល់ទៅដល់សង្វាក់ផលិតកម្ម។ នេះបើតាមការបញ្ជាក់ របស់ឯកឧត្តម អ៊ឺង ឌីប៉ូឡា ។

ឯកឧត្តម អ៊ឺង ឌីប៉ូឡា បានលើកឡើងបន្ថែមថា ក្រសួងរ៉ែ និងថាមពល បានប្តេជ្ញាបញ្ចប់នូវសកម្មភាពរ៉ែអនាធិបតេយ្យ និងជំរុញឱ្យមានការធ្វើអាជីវកម្មរ៉ែដោយស្របច្បាប់ដែលនាំមកនូវផលប្រយោជន៍ជាតិជាច្រើន ដែលមានជាអាទិ៍ ៖

– ការបង្កើតឱ្យមានឱកាសការងារនៅនឹងកន្លែង និងដោយប្រយោល
– ការចូលរួមចំណែកដល់ការបង្កើតប្រភពចំណូលថវិកាជាតិបន្ថែម
– ការបំបាត់នូវផលប៉ះពាល់ធ្ងន់ធ្ងរដល់បរិស្ថាន និងសង្គម ព្រមទាំងចូលរួមចំណែកអភិវឌ្ឍសហគមន៍មូលដ្ឋាន តាមរយៈការធ្វើអាជីវកម្មរ៉ែប្រកបដោយចីរភាព។

សូមជម្រាបថា កាលពីអាណត្តិអតីតនាយករដ្ឋមន្ត្រី សម្តេចតេជា ហ៊ុន សែន បានប្រកាសដាក់ឱ្យដំណើរការ ការដ្ឋានអាជីវកម្ម និងរោងចក្រចម្រាញ់ «រ៉ែមាស» ជាលក្ខណៈឧស្សាហកម្មលើកដំបូងរបស់កម្ពុជា នៅតំបន់អូខ្វោវ ស្រុកកែវសី​មា ខេត្តមណ្ឌលគិរី នៅថ្ងៃទី២១ ខែមិថុនា ឆ្នាំ២០២១។

ក្រុមហ៊ុន  រ៉ឺនេសង់ មីនើរ៉ល (ខេមបូឌា) លីមីតធីត Renaissance Minerals ជាក្រុមហ៊ុនទីមួយរបស់ប្រទេសអូស្ត្រាលីដែលបានចាប់ផ្តើមធ្វើអាជីវកម្មរ៉ែមាសដំបូងនៅកម្ពុជា ជាលក្ខណៈឧស្សាហកម្មតាមស្តង់ដារអន្តរជាតិ។ ដំណើរការរោងចក្រចម្រាញ់រ៉ែមាសមួយនេះ ក្រោយចំណាយពេលរុករកធនធានធម្មជាតិអស់រយៈពេលប្រមាណ១៤ឆ្នាំ ។ ក្រុមហ៊ុនអាចផលិតមាសសុទ្ធបានប្រមាណ ៣តោនក្នុង១ឆ្នាំ​ និងបានដំណើរការផលិតមាសកាលពីថ្ងៃទី១០ ខែមិថុនា ឆ្នាំ២០២១ ជាមាសដុំពាក់កណ្តាលសម្រេចដែលបានអត្រាមាស៩០ភាគរយ (Gold Dore Bars)។

ប្រមុខរដ្ឋាភិបាល ក៏បានរំពឹងថា ការផលិតផលមាសជាលក្ខណៈឧស្សាហកម្មពីជម្រករ៉ែតំបន់អូខ្វោវ ស្រុកកែវសីមា ដោយក្រុមហ៊ុនRenaissance Mineralsនោះ នឹងផ្តល់ចំណូលដុលជាមធ្យមប្រមាណ១៨៥លានដុល្លារ ក្នុងមួយឆ្នាំ។ ក្នុងចំណោមចំណូលដុលនោះ ចំណូលថវិកាជាតិពីសួយសារ និងសារពើពន្ធផ្សេងៗ ជាមធ្យមប្រមាណ៤០លានដុល្លារក្នុងមួយឆ្នាំ»។ ថវិកាទាំងនេះ នឹងត្រូវយកមកប្រើប្រាស់ក្នុងចរន្តថវិកាជាតិ ដើម្បីអភិវឌ្ឍសេដ្ឋកិច្ច និងសង្គម។

សូមជម្រាបថា បច្ចុប្បន្ន មានក្រុមហ៊ុនចំនួន១០ ដែលកំពុងតែចម្រាញ់រ៉ែមាសនៅក្នុងប្រទេសកម្ពុជា រួមមាន៖   ទី១- ក្រុមហ៊ុន Renaissance Minerals (Cambodia) Ltd ស្ថិតក្នុងខេត្តមណ្ឌល​គិរី ទី២- ក្រុមហ៊ុន Xinshan ស្ថិតនៅខេត្ដព្រះវិហារ ទិ៣-ក្រុមហ៊ុន ឌែលខម (Delcom Cambodia) ស្ថិតនៅខេត្ដព្រះវិហារ ទី៤- ក្រុមហ៊ុន Rong Cheng ស្ថិតនៅខេត្ដមណ្ឌលគិរី ទី៥- ក្រុមហ៊ុន Jiangxia Mining Energy Development  Co., Ltd. ស្ថិតនៅ ខេត្តក្រចេះ ទី៦- ក្រុមហ៊ុន LATE CHENG MINING DEVELOPMENT CO., LTD ស្ថិតតំបន់ភ្នំជី ខេត្តកំពង់ធំ ទី៧- ក្រុមហ៊ុន Phu Yuan ស្ថិតនៅភ្នំព្រឹកខេត្ដបាត់ដំបង ទី៨- ក្រុមហ៊ុន Cambodia K88 ស្ថិតនៅភ្នំជី ខេត្ដកំពង់ធំ ទី៩- ក្រុមហ៊ុន Oriental Wisdow ស្ថិតនៅភ្នំប៉ាង ខេត្ដរតនគិរី ទី១០- ក្រុមហ៊ុន Mesco Gold ស្ថិតនៅអូរយ៉ាវដាវ ខេត្ដរតនគិរី៕