សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានផ្តល់ជូននូវទស្សនទានសំខាន់ៗចំនួន៧ចំណុច ដល់សហព័ន្ធស្រូវអង្ករកម្ពុជា និងម្ចាស់រោងម៉ាស៊ីនកិនស្រូវ-កែច្នៃអង្ករ ដើម្បីជំរុញការអភិវឌ្ឍវិស័យស្រូវអង្ករកម្ពុជាកាន់តែរីកចម្រើន។ ការលើកឡើងនូវទស្សនទានសំខាន់ៗទាំងនេះ ត្រូវបានធ្វើឡើងនៅក្នុងមហាសន្និបាតសហព័ន្ធស្រូវអង្ករកម្ពុជា និងការបោះឆ្នោតជ្រើសរើសប្រធានសហព័ន្ធ ប្រធាន និងសមាជិកក្រុមប្រឹក្សាភិបាលអាណត្តិទី៥ កាលពីរសៀលថ្ងៃទី២៦ ខែសីហា ឆ្នាំ២០២៥ ។
ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) បានមានប្រសាសន៍ថា ធនាគារអភិវឌ្ឍន៍ជនបទ និងកសិកម្ម នឹងនៅតែបន្តគាំទ្រដល់វិស័យស្រូវអង្កររហូតដល់គោលដៅកំណត់របស់រាជរដ្ឋាភិបាល និងសម្រេចឱ្យបាននូវចក្ខុវិស័យច្បាស់លាស់របស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា/ប្រមុខរដ្ឋស្តីទី នាពេលបច្ចុប្បន្ននេះ គឺការនាំចេញអង្ករឱ្យបាន១លានតោនក្នុងមួយឆ្នាំ និងសូមផ្តល់ជាទស្សនវិស័យមួយចំនួនដូចខាងក្រោម៖
១- ពង្រឹងការកៀរគរ និងការគ្រប់គ្រងហិរញ្ញវត្ថុ តម្លាភាព និងគណនេយ្យភាព សំដៅធ្វើឱ្យសហព័ន្ធស្រូវអង្ករឯករាជ្យផ្នែកហិរញ្ញវត្ថុពេញលេញ។
២- ចូលរួមលើកកម្ពស់ និងអភិវឌ្ឍសមត្ថភាពកសិករ ដើម្បីឱ្យក្លាយជាកសិករសហគ្រិន និងវិស័យស្រូវអង្ករទាំងមូល តាមរយៈការធ្វើស្ថាប័ននីយកម្មលើ ក/ ការងារអភិវឌ្ឍ ពូជស្រូវ ខ/ ពង្រឹងខ្សែច្រវាក់ផ្គត់ផ្គង់ជីកសិ កម្ម និងថ្នាំពុលកសិកម្ម ប្រកបដោយគុណភាព គ/ អភិវឌ្ឍនិងធ្វើពិពាធកម្មទីផ្សារ ឃ/ ផ្នែកសហគមន៍កសិកម្ម និងកិច្ចសន្យាកសិកម្ម ង/ ផ្នែកកែច្នៃ និងស្តង់ដាផលិតកម្មកែច្នៃ និង ច/ ចីរភាព កសិកម្ម និងការដាំដុះ និងកិន-កែច្នៃដែលបញ្ចេញឧស្ម័នកាបូនិកទាបទៅក្នុងបរិយាកាស។
៣- សូមសហព័ន្ធស្រូវអង្ករកម្ពុជា បន្តនូវបេសកកម្មរបស់ខ្លួន និងអនុវត្តការងារឱ្យកាន់តែមានប្រសិទ្ធភាព ក្នុងការគាំទ្រដល់គ្រប់តួអង្គ ក្នុងខ្សែច្រវាក់ផលិតកម្មស្រូវអង្ករ សំដៅចូលរួមចំណែកអភិវឌ្ឍន៍សេដ្ឋកិច្ច សង្គមកម្ពុជា ជាពិសេសជំរុញនាំចេញអង្ករឱ្យបាន១លានតោនក្នុង១ឆ្នាំ។
៤- សូមសហព័ន្ធស្រូវអង្ករកម្ពុជា និងសមាជិកទាំងអស់ បន្តអនុវត្តនូវស្មារតីសាមគ្គីភាព ស្មារតីចែករំលែក និងស្មារតីជួយគ្នាទៅវិញទៅមក ឱ្យដូចនឹងពាក្យ ខ្មែរតែមួយ។
៥- ម្ចាស់រោងម៉ាស៊ីនកិន កែច្នៃស្រូវអង្ករទាំងអស់ និងក្រុមហ៊ុននាំចេញអង្ករ ត្រូវអភិវឌ្ឍន៍ខ្លួនឆ្ពោះទៅរក Stage II Business។ Stage II Business ឬអាចហៅម្យ៉ាងទៀតថា Growth Stage សំដៅដល់ដំណាក់កាលមួយ ដែលអាជីវកម្មទាមទារឱ្យមានការផ្លាស់ប្តូរ ទៅរកការពង្រីកវិសាលភាពប្រតិបត្តិការ ការពង្រីកវិសាលភាពទីផ្សារ ការធ្វើទំនើបកម្មប្រព័ន្ធគ្រប់គ្រង និងដំណើរការផ្ទៃក្នុង និងការពង្រឹងភាពប្រកួត ប្រជែងជាដើម។ ពោលគឺ ម្ចាស់រោងម៉ាស៊ីនកិន កែច្នៃស្រូវអង្ករ អាចពិនិត្យលទ្ធភាពពង្រីកអាជីវកម្មរបស់ខ្លួន ទៅលើការកែច្នៃ និងប្រើប្រាស់ឱ្យអស់លទ្ធភាព នូវបំណែកផ្សេងៗ ដែលនៅសល់ពីការកិនស្រូវទៅជាអង្ករ។
៦- សូមម្ចាស់រោងម៉ាស៊ីនកិន កែច្នៃស្រូវអង្ករ និងក្រុមហ៊ុននាំចេញអង្ករ ធ្វើការវិនិយោគសម្រាប់អនាគត (Investment for Future) ដែលជាការវិនិយោគមួយដែលមិនត្រឹមតែទទួលផលចំណេញសម្រាប់ពេលបច្ចុប្បន្ននោះទេ ប៉ុន្តែថែមទាំងផ្តល់ផលចំណេញដល់អ្នកជំនាន់ក្រោយដែលជាកូន ជាចៅ ឬចៅទួតរបស់របស់យើង ដែលក្នុងនោះមានមរតកជា ជំនាញ គុណតម្លៃ និងចក្ខុវិស័យ ក៏ដូចជា ចីរភាពបរិស្ថាន (sustainability and Enrironment) សំដៅរួមគ្នាកសាងជាតិយើងឱ្យកាន់តែមានបរិយាប័ន្ន មានចីរភាព មានភាពប្រកួតប្រជែងខ្ពស់ និងមានភាពធន់នឹងកត្តាខាងក្រៅ។
៧- សូមម្ចាស់រោងម៉ាស៊ីនកិន កែច្នៃស្រូវអង្ករ និងកសិករ ត្រូវទទួលយកទស្សនាទានថា៖ តួអង្គទាំង២ ប្រៀបបានដូចទឹកនិងត្រី ដែលមិនអាចបាត់បង់តួអង្គណា មួយបានទេ ដូចនេះ សូមមេត្តា បន្តការប្រមូលទិញស្រូវពីប្រជាកសិករជាប្រចាំឱ្យអស់លទ្ធភាពក្នុងតម្លៃសមរម្យណាមួយ ដែលអនុញ្ញាតឱ្យភាគីទាំងអស់ ក្នុងខ្សែច្រវាក់តម្លៃស្រូវអង្ករទទួលបានផលចំណេញគ្រប់ៗគ្នា។
ឯកឧត្តមបណ្ឌិត កៅ ថាច ក៏បានផ្តល់ជូនដល់ម្ចាស់រោងម៉ាស៊ីនកិន-កែច្នៃស្រូវអង្ករ ក្រុមហ៊ុននាំចេញអង្ករ ដែលជាសហគ្រិនទាំងអស់នូវសារសម្រាប់ការចងចាំទស្សនាទានមួយឃ្លាថា «សហគ្រិនទាំងអស់គ្នាមិនត្រឹមតែកំពុងកសាងធុរកិច្ចរបស់ខ្លួនទេ ប៉ុន្តែថែមទាំងកំពុងតែចូលរួមកសាងជាតិយើងយ៉ាងសកម្មជាមួយគ្នា» នេះហើយជាមោទនភាពជាតិរបស់សហគ្រិន និយាយឱ្យចំ គឺការខិតខំអភិវឌ្ឍន៍អាជីវកម្មរបស់ខ្លួនឱ្យបានល្អ គឺជាការកសាងជាតិឱ្យកាន់តែប្រសើរ៕
Account
Security
Favourite Content