សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាប់ចាប់គិតពីមានជម្លោះព្រំដែនតាំងពីចុងខែឧសភា រហូតមកដល់ចុងខែសីហានេះ ពលករកម្ពុជាដែលធ្លាប់បម្រើការងារនៅប្រទេសថៃ បានត្រឡប់ចូលមកក្នុងប្រទេសកម្ពុជាវិញ មានចំនួនប្រមាណជិត ១លាននាក់ហើយ។ នេះបើយោងតាមក្រសួងការងារ និងបណ្ដុះបណ្ដាលវិជ្ជាជីវៈ។ ក្នុងអំឡុងពេលនេះ ប្រជាពលរដ្ឋទាំងប្រមាណ១លាននាក់នោះ កំពុងតែស្វះស្វែងរកការងារធ្វើជាបន្តបន្ទាប់ ដើម្បីអាចដោះស្រាយកត្តាជីវភាពរបស់ពួកគេ។ ក្នុងនោះ ពលករប្រមាណជាង ៦ម៉ឺននាក់ហើយ ដែលបានទទួលឱកាសការងារតាមរយៈក្រសួងជាសេនាធិការ។
បើទោះបីជាយ៉ាងនេះក្ដី ចំនួននៃការងារហាក់នៅមិនទាន់អាចបង្គ្រប់តម្រូវការរបស់ពលករបានភ្លាមៗឡើយ ដូច្នេះហើយស្ថានភាពនេះ អ្នកជំនាញបានលើកទឹកចិត្តឱ្យពលករដែលត្រឡប់មកពីប្រទេសថៃមានការអត់ធ្មត់បន្តិចសិន ដើម្បីប្រយោជន៍រយៈពេលវែង។
មានប្រសាសន៍នៅក្នុងកិច្ចសម្ភាសន៍កម្មវិធី «អប្សរាយប់នេះ» លោកបណ្ឌិត ច័ន្ទ សុផល នាយកនៃមជ្ឈមណ្ឌលសិក្សាគោលនយោបាយ បានលើកឡើងយ៉ាងដូច្នេះថា៖
«សម្រាប់ពលករ ខ្ញុំយល់ថាគួរចូលរួមចំណែកដោយមិនរំពឹងថានឹងបានការងារភ្លាមៗ ហើយបានប្រាក់ខែខ្ពស់ដូចនៅថៃ ទោះជាទាបជាងខ្លះ ក៏យើងគួរតែអត់ធ្មត់…នេះជាការរួមចំណែកជួយជាតិ ម្យ៉ាងទៀតបើទោះជាខុសជំនាញក៏ដោយ គួរមានភាពបត់បែន និងតស៊ូអត់ធ្មត់មួយរយៈសិន»។
លោកបណ្ឌិតក៏បានបន្តលើកទឹកចិត្តថា សូមឱ្យចាត់ទុកពេលវេលានេះជាអន្តរកាល ពេលណាមួយឱកាសការងារនឹងអាចល្អជាងនេះ ហើយបងប្អូនពលករក៏អាចឈោងឡើងចាប់យកអ្វីដែលប្រសើរជាងបច្ចុប្បន្ន។ ទន្ទឹមជាមួយគ្នានេះ លោកយល់ថា ពលករគួរតែយកឱកាសនេះដើម្បីរៀនជំនាញថ្មី ឬពង្រឹងជំនាញដែលមានស្រាប់បន្ថែមទៀត តាមរយៈការចូលរួមក្នុងវគ្គបណ្ដុះបណ្ដាលរបស់ក្រសួងការងារ ដើម្បីធានាថាពួកគេរួចរាល់សម្រាប់ឱកាសការងារល្អៗ។ ខណៈពេលនេះ រាជរដ្ឋាភិបាលតាមរយៈក្រសួងការងារដែលជាសេនាធិការ បានចេញនូវសកម្មភាពជាច្រើនដូចជា៖ ផ្សារភ្ជាប់ពលករទៅនឹងរោងចក្រ សហគ្រាសដែលត្រូវការកម្លាំងពលកម្មបន្ថែម សម្របសម្រួលជាមួយនឹងវិស័យឯកជនទៅលើការបើកវគ្គបណ្ដុះបណ្ដាលតាមជំនាញរបស់ស្ថាប័ន ការប្រារព្ធវេទិកាការងារ ដោយចុះទៅជួបផ្ទាល់ជាមួយបងប្អូនពលករ ដើម្បីផ្ដល់ព័ត៌មានអំពីឱកាសការងារជាដើម ។ល។
ដោយឡែក ក្រៅពីការចូលរួមរបស់ពលករខ្លួនឯងទៅ លោកបណ្ឌិត ច័ន្ទ សុផល ក៏បានបង្ហាញការយល់ឃើញទៀតថា រាជរដ្ឋាភិបាលក៏គួរតែសម្រួលទៅដល់វិស័យហិរញ្ញវត្ថុក្នុងការផ្ដល់ទុនដល់សហគ្រាសធុនតូច និងមធ្យមក្នុងស្រុក ដើម្បីឱ្យពួកគេមានលទ្ធភាពក្នុងការពង្រីកផលិតកម្ម និងអាចឈានទៅបង្កើតការងារបន្ថែមជូនប្រជាពលរដ្ឋ។ ម្យ៉ាងទៀត រាជរដ្ឋាភិបាលគួរសម្រួលដល់ការវិនិយោគថ្មីៗ ក៏ដូចជារោងចក្រសហគ្រាសធំៗដែលកំពុងមានវត្តមាននៅក្នុងប្រទេសកម្ពុជាស្រាប់ ធ្វើយ៉ាងណាឱ្យពួកគេមានភាពងាយស្រួលក្នុងការប្រកបធុរកិច្ច សម្រួលដល់ការនាំចេញ និងការរត់ច្បាប់ឯកសារផ្សេងៗ។
សូមជម្រាបថា ពលករអាចស្វែងរកឱកាសការងារក្រោមការសម្របសម្រួលពីក្រសួងការងារ និងបណ្ដុះបណ្ដាលវិជ្ជាជីវៈ តាមរយៈទូរសព្ទលេខ ១២៩៧ ដែលមានមន្ត្រីធ្វើការងារប្រចាំការ៧ថ្ងៃក្នុង១សប្តាហ៍៕
Account
Security
Favourite Content