គូឡាឡាំពួរ ៖ ចិន បានចុះហត្ថលេខាជាផ្លូវការជាមួយនឹងអាស៊ានសម្រាប់ពង្រីកកិច្ចព្រមព្រៀងពាណិជ្ជកម្មសេរី ACFTA ឲ្យប្រសើរជាងមុន និងជំរុញទំនាក់ទំនងចំពេលដែលពិភពលោកមានភាពមិនប្រាកដប្រជាដោយសារភាពតានតឹងពាណិជ្ជកម្មជាមួយអាម៉េរិក នេះបើយោងតាមការរាយការណ៍ពី CNA។

ការធ្វើបច្ចុប្បន្នភាពនៃកិច្ចព្រមព្រៀងនេះត្រូវបានចុះហត្ថលេខាដោយរដ្ឋមន្ត្រីក្រសួងពាណិជ្ជកម្មចិន លោក Wang Wentao និងរដ្ឋមន្ត្រីវិនិយោគពាណិជ្ជកម្ម និងឧស្សាហកម្មរបស់ម៉ាឡេស៊ី លោក Tengku Zafrul Abdul Aziz ខណៈដែលមាននាយករដ្ឋមន្ត្រី ចិន លោក Li Qiang និងនាយករដ្ឋមន្ត្រីម៉ាឡេស៊ី លោក Anwar Ibrahim ។ ម៉ាឡេស៊ី​ ជា​ប្រធាន​​អាស៊ានសម្រាប់កិច្ចប្រជុំកំពូលឆ្នាំ២០២៥ ​ដែល​មាន​សមាជិក​១១​ប្រទេស ​រួម​ទាំង​ទីម័រខាងកើត​ដែល​ទើប​ចូលជាសមាជិក​ថ្មី​ទី១១។

ក្នុង​សុន្ទរកថា​បើក​កិច្ចប្រជុំ​កំពូល​អាស៊ាន​-​ចិន នាយករដ្ឋមន្ត្រីម៉ាឡេស៊ី លោក Anwar Ibrahim បានលើកឡើងថា ការធ្វើឲ្យប្រសើរឡើងនៃកិច្ចព្រមព្រៀង​នេះគឺជា​ជំហាន​សំខាន់​មួយ​ក្នុង​កិច្ចសហប្រតិបត្តិការ​សេដ្ឋកិច្ច​រវាង​ភាគី​ទាំង​ពីរ​។​ លោក​បានថ្លែងអំណរ​គុណ​ដល់សហការីនៅ​ក្នុង​អាស៊ាន និង​ចិន​ ចំពោះ​ស្នាដៃ​ដ៏​អស្ចារ្យ​នេះ​ក្នុង​លក្ខខណ្ឌ​នៃ​កិច្ចព្រមព្រៀង​ពាណិជ្ជកម្ម​សេរី​អាស៊ាន​-​ចិន​។ នាយករដ្ឋមន្ត្រីចិនលោក Li Qiang បានលើកឡើងថា កិច្ចព្រមព្រៀងបានបង្ហាញពីឱកាសថ្មីមួយដើម្បីពង្រីក និងលើកកម្ពស់កិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី។

មិនត្រឹមតែប៉ុណ្ណោះ ការចុះហត្ថលេខាលើកិច្ចព្រមព្រៀងនេះធ្វើឡើងចំពេលដែលសហរដ្ឋអាម៉េរិក និងចិនកំពុងមានភាពតានតឹងនៅក្នុងជម្លោះពាណិជ្ជកម្មពាក់ព័ន្ធនឹងការរឹតបន្តឹងនៃការនាំចេញរ៉ែកម្ររបស់ចិន និងការគំរាមរបស់ប្រធានាធិបតីអាម៉េរិក Donald Trump ដំឡើងពន្ធ ១០០% បន្ថែមលើការនាំចូលពីចិន។ យ៉ាងណាមិញ ទីក្រុងប៉េកាំងកំពុងបង្កើនកិច្ចខិតខំប្រឹងប្រែងនៅក្នុងពាណិជ្ជកម្មសេរី និងសេដ្ឋកិច្ចបើកចំហ បើទោះបីជាមានការរិះគន់អំពីការរឹតបន្តឹងទៅលើការនាំចេញលើរ៉ែកម្រសំខាន់ៗរបស់ខ្លួនក៏ដោយ។  

តាមរយៈ ACFTA 3.0 នឹងលើកកម្ពស់ការរួមបញ្ចូលយ៉ាងស៊ីជម្រៅនៃសង្វាក់ផលិតកម្ម និងការផ្គត់ផ្គង់នៃភាគីទាំងពីរសម្រាប់ពាណិជ្ជកម្មក្នុងតំបន់ និងពិភពលោក ព្រមជាមួយនឹងការប្រកាន់ខ្ជាប់នូវភាពបើកចំហ បរិយាប័ន្ន និងកិច្ចសហប្រតិបត្តិការឈ្នះ-ឈ្នះ។ លើសពីនេះ ACFTA 3.0 ក៏មានគោលបំណងពង្រឹងភាពធន់នៃខ្សែសង្វាក់ផ្គត់ផ្គង់ និងផ្តល់សិទ្ធិអំណាចដល់សហគ្រាសខ្នាតតូច និងមធ្យមក្នុងតំបន់។

គួរឲ្យបញ្ជាក់ដែរថា ចិន គឺជាដៃគូពាណិជ្ជកម្មដ៏ធំបំផុតរបស់អាស៊ានក្នុងរយៈពេល ១៦ ឆ្នាំជាប់ៗគ្នា។ ក្នុងរយៈពេល ៣ ត្រីមាសដំបូងនៃឆ្នាំ២០២៥ ពាណិជ្ជកម្មរបស់ចិនជាមួយអាស៊ានមានចំនួនសរុប ៧៨៣,៣ ពាន់លានដុល្លារ ដែលកើនឡើង ៩,៦% ធៀបនឹងរយៈពេលដូចគ្នាកាលពីឆ្នាំមុន។ ដោយឡែក អាស៊ាន គឺជាសេដ្ឋកិច្ចធំជាងគេទី ៥ ក្នុងពិភពលោក ជាមួយនឹងផលិតផលក្នុងស្រុកសរុប (GDP) ៣,៩ ទ្រីលានដុល្លារ៕