ភ្នំពេញ ៖ ក្នុង​អាណត្តិទី​៧​នេះ ក្រសួង​រៀបចំដែនដី នគរូបនីយកម្ម និងសំណង់ បាន និងកំពុងជំរុញពន្លឿនឱ្យបញ្ចប់ការ​​វាស់វែង​ចុះបញ្ជី​ដីធ្លីនៅទូទាំង​ប្រទេស ដើម្បី​បញ្ចប់​ភាពមិនច្បាស់លាស់ ជាពិសេស វិវាទដីធ្លីនៅកម្ពុជា ជាក់ស្ដែង ត្រឹមរយៈពេល​មិនដល់ ៣ឆ្នាំផង ក្រសួង​រៀបចំដែនដី បានចុះបញ្ជីដីរហូតដល់ប្រ​មាណ ​​៥លាន​​ក្បាល​ដី ។​

ឯកឧត្តម ​សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រី ក្រសួង​រៀបចំដែនដី នគរូបនីយកម្ម​ និងសំណង់ បាន​មានប្រសាសន៍ថា​ វិវាទដីធ្លីនៅក្នុង​សង្គមជាតិ​ គឺជារឿង​ដែលមិនផ្ដល់​ផលប្រយោជន៍អ្វីទាល់តែសោះដល់​សង្គមជាតិ​​​ ហើយបើសិនជា​​នៅតែរវល់​នឹងរឿង​នេះ យើងនឹងជំពប់​ជើង​ដួល​នៅថ្ងៃណាមួយ ។ ដូច្នេះ យើងត្រូវប្ដេជ្ញា​លុប​បំបាត់​បញ្ហានេះ មិនឱ្យកើត​មានតទៅទៀត​នោះទេ ។

ឯកឧត្តមមានប្រសាសន៍ថា កិច្ចការ​សំខាន់ទី១​ដែលក្រសួងរៀបចំដែនដី ត្រូវធ្វើគឺត្រូវ​ចុះបញ្ជី​ដីធ្លី​ឱ្យចប់ ដើម្បីបញ្ចប់វិវាទ ភាពមិនច្បាស់លាស់ផ្លូវច្បាប់​ក្នុងការគ្រប់គ្រ​ងអចលនទ្រព្យ  ។ ដើមអាណត្តិ​នេះ យើងមាន៥លានក្បាលដី ហើយក៏បានចុះបញ្ជីស្ទើរតែរួចរាល់ទាំង​ស្រុង​ហើយ ដោយនៅសល់​ត្រឹមតែប្រមា​ណ​​ជិត​១ម៉ឺនក្បាលដីទៀត​ប៉ុណ្ណោះនឹងត្រូវចុះបញ្ជីបញ្ចប់ទាំងស្រុង ។​​ ចំពោះក្បាលដីដែលមិនទាន់​បានចុះបញ្ជី ដោយសារតែនៅជាប់ពាក់ព័ន្ធនឹង​ភាពមិនច្បាស់លាស់ គឺនៅមានវិវាទ​ព្រំប្រទល់​ដែលត្រូវ​ដោះស្រាយឱ្យរួចស្រេច​សិន ។

ឯកត្តម​បានបញ្ជាក់ថា កម្ពុជា​មានក្បាលដីសរុប​ចំនួន១៤លាន​ក្បាលដី ទាំង​ឯកជន​ និងរដ្ឋ ។ ដីធ្លីដែលជាកម្មសិទ្ធិ​របស់រដ្ឋ​ ដូចជា ​ដីសម្បទានសេដ្ឋកិច្ច ដីព្រៃ​បម្រុងរបស់ក្រសួងកសិកម្ម រុក្ខា​ប្រមាញ់ និងនេសាទ ​ដីអភិរក្ស​របស់ក្រសួង​បរិស្ថាន ដីប្រឡាយ បឹងបួរ របស់ក្រសួង​ធនធាទឹក ដីនៅតំបន់​បុរាណឋានរបស់ក្រសួង​វប្បធម៌​ និង​វិចិត្រ​សិល្បៈ និងផ្លូវថ្នល់​នានា​ទូទាំង​ប្រទេស​ដែលជាកម្មសិទ្ធិរបស់​ក្រសួងសាធារណការ ​និងដឹកជញ្ជូន ​។ ដីទាំងនេះ នឹង​ត្រូវចុះបញ្ជីឱ្យ​បានចប់​​ដើម្បីបញ្ជាក់ពីកម្មសិទ្ធិរបស់ក្រសួង​ណា​មួយ ។​

ទាក់ទិន​នឹង​ការ​ចុះបញ្ជី​ដីធ្លី​បង្ហើយនៅទូទាំង​ប្រទេស​នេះដែរ សម្ដេច​មហា​បវរធិបតី ហ៊ុន ម៉ាណែត នាយករដ្ឋមន្ត្រីនៃ​ព្រះរាជាណាចក្រកម្ពុជា​បានលើកឡើងថា ក្រៅអំពីការផ្ដល់ភាពស្របច្បាប់​ដល់​ម្ចាស់ដីធ្លី ការ​ចុះ​បញ្ជី ចេញ​បណ្ណកម្មសិទ្ធិ​លើដីធ្លីទូទាំងប្រទេស​នេះដែរ នឹងអាច​សម្រួលដល់ការ​វិនិយោគ​ ជាពិសេស​ផ្ដល់​ទំនុក​ចិត្តដល់​វិនិយោគិន​ដែល​ចង់មកបណ្ដាក់ទុននៅកម្ពុជា ។

សម្ដេច​ធិបតី បានលើក​ឡើងថា នៅពេល​គេចង់វិនិយោគ​ ឬចង់បណ្ដាក់ទុនវិនិយោគ ជា​ដំបូង​គេនឹង​ស្វែងរកទីតាំង​ដី និងសិក្សាលម្អិត​ ហើយនៅពេលដឹងថាដីមានបញ្ហា​ មិនមានឯកសារ​ច្បាស់លាស់​​ វា​នឹងអាច​ធ្វើឱ្យ​វិនិយោគិន​រារែក​ចិត្ត ប៉ុន្តែបើសិនជា​ដីនោះមានប្លង់រឹង មានឯកសារ​ច្បាស់លាស់ វិនិយោគិន​នឹង​មិនចាំបាច់គិតគូរយូរទៀត​នោះទេ បើពេញចិត្ត​ទីតាំង​នោះគឹនឹងធ្វើសកម្មភាព វិនិយោគ​តែម្ដង ។

គួររម្លឹកថា គិតត្រឹមឆ្នាំ២០២៥នេះ បណ្ដាខេត្តមួយចំនួន​​បានប្រកាស​បញ្ចប់ការ​វាស់វែងដីធ្លីមានលក្ខណៈជា​ប្រព័ន្ធ នឹង​បន្ត​សកម្មភាពចុះបញ្ជី និងចេញបណ្ណជូនពលរដ្ឋ​ឱ្យបានចប់​សព្វគ្រប់ក្នុងពេលឆាប់ៗនេះ ហើយ​ក៏មាន​បណ្ដាខេត្តមួយចំនួនចាប់ផ្ដើមប្រគល់បណ្ណកម្មសិទ្ធដីធ្លីជូន​ពលរដ្ឋ​ជា​ម្ចាស់ដី​ជា​បន្តបន្ទាប់ផងដែរ និងឈានដល់ការ​ចែកបញ្ចប់​ក្នុងពេលឆាប់ៗ ៕