សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា រដ្ឋាភិបាលអូស្ត្រាលីគ្រោងនឹងបង្កើតច្បាប់ឈានមុខគេមួយលើពិភពលោក គឺដាក់បំរាមហាមក្មេងអាយុក្រោម ១៦ ឆ្នាំប្រើប្រាស់ប្រព័ន្ធផ្សព្វផ្សាយសង្គម។
នាយករដ្ឋមន្ត្រីអូស្ត្រាលី លោក Anthony Albanese បានលើកឡើងថា ច្បាប់ដែលបានស្នើឡើងនឹងត្រូវដាក់ពិភាក្សាក្នុងសភានៅសប្តាហ៍ក្រោយ ក្នុងគោលបំណងកាត់បន្ថយគ្រោះថ្នាក់ពីប្រព័ន្ធផ្សព្វផ្សាយសង្គមដែលកំពុងរំលោភលើសិទ្ធកុមារអូស្ត្រាលី។ ស្របពេលដែលឪពុកម្តាយកំពុងព្រួយបារម្ភពីសុវត្ថិភាពកូនៗនៅលើប្រព័ន្ធអ៊ីនធឺណែត ហើយចង់ឱ្យគ្រួសារអូស្ត្រាលីដឹងថា រដ្ឋាភិបាលនឹងជាខ្នងបង្អែកដើម្បីគាំទ្រពួកគេ។ រដ្ឋាភិបាលបាននិយាយថា ការហាមប្រាមនេះនឹងមិនអនុវត្តចំពោះយុវជនដែលមានប្រព័ន្ធផ្សព្វផ្សាយសង្គមរួចហើយនោះទេ។ បន្ថែមពីនេះ វានឹងមិនមានការលើកលែងសូម្បីតែកុមារដែលទទួលបានការយល់ព្រមពីឪពុកម្តាយរបស់ពួកគេហើយក៏ដោយ។ មិនត្រឹមតែប៉ុណ្ណោះ ក្រុមហ៊ុនប្រព័ន្ធផ្សព្វផ្សាយសង្គមនឹងត្រូវបង្ហាញថាពួកគេកំពុងចាត់វិធានការត្រឹមត្រូវ ដើម្បីរារាំងការចូលប្រើប្រាស់ពីក្មេងក្រោមអាយុហាមឃាត់។
លោកនាយករដ្ឋមន្ត្រីបន្ថែមថា អ្នកប្រើប្រាស់នឹងមិនប្រឈមមុខទៅលើការពិន័យណាមួយឡើយ ប៉ុន្តែ eSafety Commissioner ដែលជានិយ័តករអ៊ីនធឺណែតរបស់ប្រទេសអូស្ត្រាលីនឹងទទួលខុសត្រូវចំពោះការអនុវត្តបទប្បញ្ញត្តិនេះ។ ច្បាប់នេះនឹងចូលជាធរមានរយៈពេល ១២ ខែបន្ទាប់ពីត្រូវបានអនុម័ត ហើយនឹងត្រូវពិនិត្យឡើងវិញបន្ទាប់ពីវាចូលជាធរមាន។
ទោះបីជាអ្នកជំនាញភាគច្រើនយល់ស្របថា វេទិកាប្រព័ន្ធផ្សព្វផ្សាយសង្គមអាចប៉ះពាល់ដល់សុខភាពផ្លូវចិត្តរបស់មនុស្សវ័យជំទង់ ប៉ុន្តែក៏មានការខ្វែងគំនិតគ្នាទាក់ទងនឹងប្រសិទ្ធភាពនៃការប៉ុនប៉ងហាមឃាត់ពួកគេទាំងស្រុង។ អ្នកជំនាញខ្លះអះអាងថា ការហាមឃាត់គ្រាន់តែពន្យាពេលការប៉ះពាល់របស់ក្មេងពីកម្មវិធីដូចជា TikTok, Instagram និង Facebook ប៉ុណ្ណោះ ប៉ុន្តែគួរជំនួសមកជាការបង្រៀន ឬ ណែនាំពួកគេវិញ។ កាលពីមុន សហភាពអឺរ៉ុប និងប្រទេសមួយចំនួនធ្លាប់រឹតបន្តឹងការចូលប្រើប្រាស់ប្រព័ន្ធបណ្តាញសង្គម ប៉ុន្តែវាទទួលបានភាពបរាជ័យ ដោយសារអ្នកប្រើប្រាស់អាចបន្លំអាយុបាន។
មិនត្រឹមតែប៉ុណ្ណោះ ក្រុមតស៊ូមតិមួយចំនួនលើសិទ្ធិកុមាររបស់អូស្ត្រាលីបានរិះគន់ការហាមឃាត់នេះ ដោយសារពួកគេយល់ថាជាវិធានការណ៍មិនច្បាស់លាស់។ កាលពីខែតុលា ក្រុមការពារសិទ្ធិកុមារអូស្ត្រាលី ដែលត្រូវបានគាំទ្រដោយអង្គការសង្គមស៊ីវិលចំនួន ២០ និងអ្នកសិក្សាជាង ១០០ នាក់បានផ្ញើលិខិតបើកចំហមួយទៅកាន់រដ្ឋាភិបាល ក្នុងគោលបំណងឱ្យនាយករដ្ឋមន្ត្រី Anthony Albanese ពិចារណាលើការអនុវត្តស្តង់ដារសុវត្ថិភាពនៅលើប្រព័ន្ធផ្សព្វផ្សាយសង្គមវិញ។ ក្រុមនេះក៏បានលើកឡើងពីដំបូន្មានរបស់អង្គការសហប្រជាជាតិថា គោលនយោបាយជាតិដែលត្រូវបានបង្កើតឡើងដើម្បីគ្រប់គ្រងប្រព័ន្ធអនឡាញ គួរតែមានគោលបំណងផ្តល់ឱកាសឱ្យកុមារទទួលបានអត្ថប្រយោជន៍ពីការចូលរួមក្នុងពីភពឌីជីថល និងធានាសុវត្ថិភាពរបស់ពួកគេក្នុងការចូលប្រើប្រាស់។
យ៉ាងណាមិញ អ្នកធ្វើយុទ្ធនាការមួយចំនួនផ្សេងទៀតបានបញ្ចុះបញ្ចូលរដ្ឋាភិបាលអូស្ត្រាលីសម្រាប់ច្បាប់ហាមឃាត់មួយនេះដែរ ដោយសារការហាមឃាត់គឺមានភាពសំខាន់ចាំបាច់ក្នុងការការពារកុមារពីមាតិកាដែលបង្កគ្រោះថ្នាក់ ព័ត៌មានមិនពិត ការគំរាមកំហែង និងសម្ពាធសង្គមផ្សេងទៀត។ គំនិតផ្តួចផ្តើមមួយដែលមានហត្ថលេខាជាង ១២៥ ០០០ នាក់បានលើកហេតុផលថា កុមារមិនទាន់ត្រៀមខ្លួនរួចរាល់ក្នុងការប្រើប្រាស់បណ្តាញសង្គមអនឡាញដោយសុវត្ថិភាពនោះទេ ដរាបណាពួកគេមានអាយុចាប់ពី ១៦ ឆ្នាំ។ ការប្រើប្រាស់ប្រព័ន្ធផ្សព្វផ្សាយសង្គមច្រើនពេកអាចពង្វក់ខួរក្បាលក្មេងខ្ចីរបស់ពួកគេ និងផ្លូវចិត្ត ដែលវាបណ្តាលឲ្យមានការរីករាលដាលនៃជំងឺផ្លូវចិត្ត។
ទន្ទឹមនឹងនេះ មានសំណួរសួរទៅកាន់លោក Albanese ថាតើគួរតែមានកិច្ចខិតខំប្រឹងប្រែងទូលំទូលាយក្នុងការអប់រំកុមារអំពីរបៀបរុករកអត្ថប្រយោជន៍ និងហានិភ័យនៃការប្រើអ៊ីនធឺណិតឬអត់នោះ? លោកនាយករដ្ឋមន្ត្រី ក៏បានឆ្លើយតបថា វិធីសាស្រ្តបែបនេះនឹងមិនគ្រប់គ្រាន់នោះទេ ព្រោះវាមានទំនាក់ទំនងស្មើគ្នាទាំងអត្ថប្រយោជ៍ និងហានិភ័យ។ លើសពីនេះ ក្រុមហ៊ុនបច្ចេកវិទ្យាទាំងនោះមានឥទ្ធិពលខ្លាំងខ្លា ដោយសារកម្មវិធីទាំងនោះមាន algorithms អាចបង្ហាញអ្វីជាក់លាក់មួយដល់អ្នកប្រើប្រាស់៕
Account
Security
Favourite Content