ភ្នំពេញ៖ ស្វាយចន្ទីជាកសិផលដ៏សំខាន់មួយរបស់កម្ពុជា ហើយគិតត្រឹមឆ្នាំ២០២៤នេះ ប្រទេសកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំងប្រទេស ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង១ហិកតា។ នេះបើតាមស្ថិតិរបស់ក្រសួងកសិកម្ម រុក្ខាប្រមាញ់ និងនេសាទ។

នៅក្នុងរយៈពេល៧ខែដើមឆ្នាំ២០២៤ កម្ពុជាផលិតគ្រាប់គ្រាប់​ស្វាយចន្ទីឆៅបានជាង៨៣ម៉ឺនតោន កើនឡើង ៣៦,៧ភាគរយ ដែលធ្វើឱ្យកម្ពុជា ជាប់ចំណាត់ថ្នាក់លេខ២ ជាប្រទេសផលិត និងនាំចេញគ្រាប់ស្វាយចន្ទីច្រើនជាងគេលើពិភពលោក។

រាជរដ្ឋាភិបាលកម្ពុជាបានដាក់ចេញនូវទស្សនវិស័យប្រែក្លាយកម្ពុជាទៅជាប្រទេសនាំចេញគ្រាប់ស្វាយចន្ទីច្រើនជាងគេលើពិភពលោក និងជាអធិរាជស្វាយចន្ទីនាពេលអនាគត។ ក្នុងគោលដៅនេះ រាជរដ្ឋាភិបាលបានរៀបចំ និងដាក់ចេញនូវ «គោលនយោបាយជាតិ ស្តីពីស្វាយចន្ទី ឆ្នាំ២០២២-២០២៧»។

ជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី១២ ខែកញ្ញា ឆ្នាំ ២០២៤នេះ​ថា ដើម្បី​សម្រេចបាននូវការងារនេះ ក្រសួងកសិកម្ម កំពុងចងក្រងបង្កើតសហគមន៍កសិកម្មទំនើប​ស្វាយ​ចន្ទីចំនួន៣ នៅខេត្តកំពង់ធំ ដោយការចងក្រងសហគមន៍កសិកម្មទំនើបស្វាយចន្ទីនេះ នឹងផ្សារភ្ជាប់​សហគមន៍ទៅកាន់ទីផ្សារដោយផ្ទាល់តាមរយៈការសម្របសម្រួលពីក្រសួង។ មិនត្រឹមតែប៉ុណ្ណោះ ក្រសួងនឹងជួយគាំទ្រផ្នែកទុន និងបច្ចេកទេស ដើម្បីធានាថា សហគមន៍​អាចដំណើរ​ការបានដោយរលូន និងទទួលបានតម្លៃបន្ថែម ព្រមទាំងផល​ចំណេញខ្ពស់។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា៖ កម្ពុជាបានត្រៀមខ្លួនជាស្រេចក្នុងការស្វាគមអ្នកវិនិយោគដែលចាប់អារម្មណ៍លើការកែច្នៃផលិតផលកសិកម្មគ្រាប់ស្វាយចន្ទី។ ឯកឧត្តមក៏បានលើកទឹកចិត្តដល់សិប្បករកែច្នៃស្វាយចន្ទី ឱ្យរៀបចំផែនការកែច្នៃគ្រាប់ស្វាយចន្ទីឱ្យបានច្បាស់លាស់ មានកិច្ចសន្យាទីផ្សារ ដើម្បីទទួលបានទំនុកចិត្ត ការគាំទ្របន្ថែមពីដៃគូសហការ ក៏ដូចជាការផ្តល់កម្ចី ដើម្បីពង្រីកអាជីវកម្មជាដើម។ ទន្ទឹមនឹងនេះដែរ សិប្បករត្រូវពិនិត្យលទ្ធភាពក្នុងការប្រមូលទិញគ្រាប់ស្វាយចន្ទី មកសម្ងួត និងស្តុកទុក ដើម្បីធានាស្ថិរភាពនៃការផ្គត់ផ្គង់ពេញមួយឆ្នាំ ក៏ដូចជាតម្លៃទីផ្សារល្អផងដែរ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា រយៈពេល ៨ ខែកន្លងមកនេះ ទិន្នផលស្វាយចន្ទីដែលប្រមូលបានប្រមាណ៨៧ ម៉ឺនតោននៃការផលិតទូទៅ ហើយក្នុងនោះបាននាំចេញទៅវៀតណាមប្រមាណ ៨០ ម៉ឺនតោន ដែលមានទឹក​ប្រាក់​ប្រមាណ ១ពាន់ ២រយលានដុល្លារ។

ប្រធានសមាគមស្វាយចន្ទីកម្ពុជាបានឱ្យដឹងថា៖ ទិន្នផលស្វាយចន្ទីបានកើនឡើងគួឱ្យកត់សម្គាល់នៅឆ្នាំ២០២៤ ទោះបីប្រឈមមុខនឹងបាតុភូតអេលនីណូ។ កំណើននេះ ដោយសារសមាគមបានផ្ដល់ដំណោះស្រាយដល់កសិករតាំងពីខែកញ្ញា ឆ្នាំ២០២៣មកម្ល៉េះ។ បច្ចុប្បន្ន ការកែច្នៃស្វាយចន្ទីនៅកម្ពុជាមិនទាន់ល្អប្រសើរទេ ដោយសារតែកង្វះ​ទុនទិញគ្រាប់ស្វាយចន្ទីស្តុកទុក ដែលធ្វើឱ្យការកែច្នៃក្នុងស្រុកធ្លាក់ចុះបន្តិចបើប្រៀបឆ្នាំ២០២៣ ខណៈដែលបច្ចុប្បន្នតម្លៃគ្រាប់ស្វាយចន្ទីលក់បាន ១៥៧០ ដុល្លារ ក្នុងមួយតោន។

លោក ស៊ុយ កុកធាន អនុប្រធានសមាគមស្វាយចន្ទី ធ្លាប់បានមានប្រសាសន៍ថា ៖ សមាគមជប៉ុន-កម្ពុជា បាននាំធុរជនជប៉ុន ចុះសិក្សាពីលទ្ធភាពធ្វើអាជីវកម្មក្នុងវិស័យស្វាយចន្ទី ខណៈឥណ្ឌូនេស៊ី ចិន កូរ៉េខាងត្បូង និងប្រទេសមួយចំនួនទៀត ក៏បានបង្ហាញគោលបំណងចង់វិនិយោគវិស័យស្វាយចន្ទីផងដែរ។

ជាមួយគ្នាដែរ លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម បានឱ្យដឹងថា គ្រាប់ស្វាយចន្ទីកែច្នៃរួចដែលជាផលិតផលរបស់ខ្មែរ នឹងត្រូវដាក់លក់នៅតាមផ្សារនៃអាកាសយានដ្ឋាន និងក្រុមហ៊ុនអាកាសចរណ៍ស៊ីវិល ជាពិសេសនៅតាមម៉ាតនានាក្នុងប្រទេសកម្ពុជា។ នេះជាការជំរុញវិស័យស្វាយចន្ទីឱ្យកាន់តែរីកធំ។

គួរបញ្ជាក់ថា រដ្ឋាភិបាលកម្ពុជាបានដាក់គោលនយោបាយជាតិ ស្តីពីស្វាយចន្ទី ឆ្នាំ២០២២-២០២៧ ដែលត្រូវបានអនុម័តនៅក្នុងកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី១៣ ខែមករា ឆ្នាំ២០២៣ និងត្រូវបានប្រកាសដាក់ឱ្យប្រើប្រាស់ជាផ្លូវការ កាលពីថ្ងៃទី១៤ ខែមិថុនា ឆ្នាំ២០២៣ កន្លងទៅ។

ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) បានលើកឡើងថា គោលនយោបាយជាតិស្តីពីស្វាយចន្ទីឆ្នាំ២០២២-២០២៧ មានភាពមុតស្រួច និងចំគោលដៅ ដើម្បីរុញច្រានខ្សែច្រវាក់ផលិតកម្ម និងកែច្នៃស្វាយចន្ទីដែលជាដំណាំយុទ្ធសាស្ត្ររបស់កម្ពុជាឱ្យអស់ពីសក្តានុពល។ ភាពចាំបាច់នៃយុទ្ធសាស្ត្រផលិត, កែច្នៃ, និងនាំចេញ គឺជាបេះដូងនៃការពង្រឹង និងពង្រីកការផ្គត់ផ្គង់ស្វាយចន្ទីឱ្យកាន់តែរីកធំធាត់ប្រកបដោយនវានុវត្តន៍, សមស្របទៅតាមតម្រូវការទីផ្សារ, ប្រែក្លាយកសិករទៅជាកសិពាណិជ្ជករ, និងមានភាពប្រកួតប្រជែងខ្ពស់។

សូមបញ្ជាក់ថា ៖ រាជរដ្ឋាភិបាលកម្ពុជា និងវិស័យឯកជន បាន និងកំពុងយកចិត្តទុកដាក់ ជំរុញការនាំចេញគ្រាប់ស្វាយចន្ទីឱ្យបានច្រើនជាងគេនៅលើពិភពលោកនាពេលខាងមុខ។ ទន្ទឹមនឹងនេះ សមាគមស្វាយចន្ទីកម្ពុជាក៏រំពឹងថា កម្ពុជានឹងក្លាយជាប្រទេសដែលមានគ្រាប់ស្វាយចន្ទីល្អ និងឆ្ងាញ់ជាងគេផងដែរ។

នៅឆ្នាំ២០២៣ កម្ពុជាសម្រេចបាននូវការនាំចេញគ្រាប់ស្វាយចន្ទីឆៅទៅទីផ្សារអន្តជាតិចំនួន ៦៥ ម៉ឺន ៦ ពាន់តោន ។ នេះបើតាមរបាយការណ៍សមាគមស្វាយចន្ទីកម្ពុជា៕